La 95:1-11
95 Nyɛɛ ba nɛ waa kɛ bua jɔmi nɛ je Yehowa yi!
Nyɛ ha nɛ wa he ose kɛ je Tɛsa nɛ heɔ wa yi wami ɔ yi kaa nihi nɛ a ye kunimi.
2 Nyɛ ha nɛ waa ba e hɛ mi kɛ si nami;Nyɛ ha nɛ wa la nɛ wa he ose kɛ je e yi kaa nihi nɛ a ye kunimi.
3 Ejakaa Yehowa ji Mawu nɛ e he kle,Matsɛ ngua ngɛ mawu kpahi tsuo a nɔ.
4 Zugba a sisi he nɛ kuɔ pe kulaa a ngɛ e dɛ mi;Nɛ yokuhi nɛ a ka amɛ hu e níhi.
5 Lɛ nɛ e pee wo ɔ, nɛ e ji e nɔ,E ninehi lɛ e kɛ pee zugba gbigbli ɔ.
6 Nyɛɛ ba nɛ wa ja lɛ nɛ wa kplã si ha lɛ;Nyɛ ha nɛ wa kplã si ngɛ Yehowa wa Bɔlɔ* ɔ hɛ mi.
7 Ejakaa lɛ ji wa Mawu,Nɛ wa ji nihi nɛ e hyɛɔ wa nɔ,Wa ji e jijɔhi nɛ e hyɛɛ a nɔ.*
Mwɔnɛ ɔ, ke nyɛ nu e gbi ɔ,
8 Nyɛ ko kplii nyɛ tsui kaa bɔ nɛ e ba ngɛ Meriba* a,Kaa bɔ nɛ e ba ngɛ Masa* ngɛ nga a nɔ ɔ,
9 Benɛ nyɛ nɛmɛ ɔmɛ ka mi nɛ a hyɛ ɔ;A je mi atsinyɛ, pohu a na ye ní tsumi ɔmɛ.
10 Jamɛ a yi nɔ ɔ he tai pee mi jeha 40, nɛ i de ke:
“A ji nihi nɛ a tlaa blɔ ngɛ a tsui mi be fɛɛ be;A li ye blɔ ɔmɛ.”
11 Lɔ ɔ he ɔ, i kɛ abofu kã kita ke:
“A be ye he jɔɔmi ɔ mi sɛe.”
Sisi Ningmahi
^ Aloo “Peelɔ.”
^ Ngɛ Hebri gbi mi ɔ, “Jijɔhi nɛ a ngɛ e nine nɔ.”
^ E sisi ji, “Pɛ.”
^ E sisi ji, “Ka.”
