La 97:1-12
97 Yehowa ba pee Matsɛ!
Zugba a bua nɛ jɔ.
Zugba kpɔhi tsuo nɛ nyu bɔle mɛ ɔ nɛ a nya.
2 Bɔku kɛ diblii kpii bɔle lɛ kɛ kpe;Dami kɛ dami sane yemi ji e matsɛ sɛ ɔ sisi tomi.
3 La jeɔ e hɛ mi,Nɛ e sãã e he nyɛli ɔmɛ ngɛ he fɛɛ he.
4 E we oslabai ɔ haa nɛ je mi tsɔɔ;Zugba a naa, nɛ e hosoɔ.
5 Yoku ɔmɛ sileɔ kaa hwo gbaku ngɛ Yehowa hɛ mi,Ngɛ zugba a tsuo Nyɔmtsɛ ɔ hɛ mi.
6 Hiɔwe ɔmɛ jajeɔ e dami ɔ,Nɛ ni ɔmɛ tsuo naa e hɛ mi nyami ɔ.
7 Zo nɛ gbe nihi tsuo nɛ a jaa amagahi,Nihi tsuo nɛ a kɛ a yaka mawu ɔmɛ fĩaa a.
Nyɛ mawuhi tsuo, nyɛ kplã si ha* lɛ.
8 Zion nuɔ he nɛ e nyaa;Oo Yehowa, o kojomi ɔmɛ a he je ɔ,Yuda ma amɛ* a bua jɔɔ.
9 Oo Yehowa, mo ji Nɔ Nɛ E Nɔ Kuɔ Pe Kulaa ngɛ zugba a nɔ tsuo;O nɔ kuɔ kulaa pe mawu kpa amɛ tsuo.
10 Oo nyɛ nihi nɛ nyɛ suɔ Yehowa, nyɛɛ hiɔ nɔ́ yayami.
E buɔ nihi nɛ a yeɔ lɛ anɔkuale ɔ a wami* he;E kpɔ̃ɔ mɛ kɛ jeɔ yiwutsotsɛmɛ a dɛ.*
11 La kpɛ ha dalɔ,Nɛ nihi nɛ a da ngɛ a tsui mi ɔ nɛ a nya.
12 Nyɛ dali, nyɛ nya ngɛ Yehowa mi,Nɛ́ nyɛɛ kɛ sina nɛ ha e biɛ* klɔuklɔu ɔ.
Sisi Ningmahi
^ Aloo “nyɛ ja.”
^ Ngɛ Hebri gbi mi ɔ, “biyi ɔmɛ.”
^ Aloo “klaa.”
^ Aloo “a he wami mi.”
^ Ngɛ Hebri gbi mi ɔ, “e kaimi.”
