La 98:1-9
-
Yehowa ji Yi Wami Helɔ kɛ Kojolɔ nɛ da
-
Yehowa ha nɛ a le e yi wami hemi ɔ (2, 3)
-
La nɛ a po.
98 Nyɛ la la ehe ha Yehowa,Ejakaa e pee nyakpɛ níhi.
E hiɔ nine, e nine klɔuklɔu ɔ ngɔ yi wami hemi kɛ ba.*
2 Yehowa ha nɛ a le e yi wami hemi ɔ;E je e dami ɔ kpo ngɛ je ma amɛ a hɛ mi.
3 E kai e suɔmi nɛ se pui ɔ kɛ e we anɔkuale yemi ɔ nɛ e je kpo kɛ tsɔɔ Israel we ɔ.
Zugba a nyagbe he ɔmɛ tsuo na wa Mawu ɔ yi wami hemi ɔ.*
4 Nyɛ je ɔ tsuo, nyɛ he ose kɛ je Yehowa yi kaa nihi nɛ a ye kunimi.
Nyɛɛ kɛ bua jɔmi nɛ wo nyɛ gbi nɔ nɛ nyɛ la yi jemi lahi.*
5 Nyɛɛ fia saku kɛ la yi jemi lahi* kɛ ha Yehowa,Nyɛɛ ngɔ saku kɛ fia la ngɔngɔɛ.
6 Nyɛɛ ngɔ titimati kɛ bɛ kpamiKɛ he ose ngɛ Matsɛ Yehowa hɛ mi kaa nihi nɛ a ye kunimi.
7 Wo ɔ kɛ e mi níhi tsuo nɛ a wo gbi,Zugba a* kɛ nihi tsuo nɛ a ngɛ nɔ ɔ hu nɛ a nya.
8 Pa amɛ nɛ a fia a dɛ;Yoku ɔmɛ nɛ a pee kake kɛ la kɛ bua jɔmi
9 Ngɛ Yehowa hɛ mi, ejakaa e ma* nɛ e ba kojo zugba a.
E kɛ dami maa kojo nihi nɛ a ngɛ zugba a nɔ ɔ,*Nɛ e maa kojo ni ɔmɛ ngɛ dami nya.
Sisi Ningmahi
^ Aloo “e nine klɔuklɔu ha nɛ e ye kunimi.”
^ Aloo “wa Mawu ɔ kunimi yemi ɔ.”
^ Aloo “nyɛɛ fia la.”
^ Aloo “kɛ la.”
^ Aloo “Zugba nɛ baa ní ɔ.”
^ Aloo “ejakaa e ba.”
^ Aloo “zugba nɛ baa ní ɔ.”
