La 99:1-9
99 Yehowa ba pee Matsɛ. Ma amɛ a he nɛ do blibliibli.
E hii si ngɛ matsɛ sɛ nɔ ngɛ kerubhi a yi nɔ.* Zugba a nɛ mimiɛ.
2 Yehowa je agbo ngɛ Zion,Nɛ e nɔ kuɔ pe ma amɛ tsuo.
3 Á je o biɛ ngua a yi,Ejakaa biɛ ɔ he ngɛ gbeye, nɛ e ngɛ klɔuklɔu.
4 E ji matsɛ nɛ he wa nɛ e suɔ dami sane yemi.
O ngɔ dami kɛ ma si kpɛii.
O ha Yakob dami sane yemi kɛ dami.
5 Nyɛ wo Yehowa wa Mawu ɔ nɔ, nɛ́ nyɛ kplã si* ngɛ nɔ́ nɛ e kɛ e nane maa nɔ ɔ hɛ mi;E ngɛ klɔuklɔu.
6 Mose kɛ Aaron piɛɛ e we osɔfo ɔmɛ a he,Nɛ Samuel piɛɛ nihi nɛ a tsɛɔ e biɛ ɔ a he.
A tsɛɛ Yehowa,Nɛ e heɔ mɛ nɔ.
7 E kɛ mɛ tuɔ munyu kɛ jeɔ bɔku titima a mi.
A ye e kaimi ɔmɛ kɛ mlaa nɛ e kɛ ha mɛ ɔ nɔ.
8 Oo Yehowa wa Mawu, o he mɛ nɔ.
Mo ji Mawu nɛ ngɔ a yayami ɔmɛ kɛ ke mɛ,Se o gbla a tue* ngɛ a ní yayami ɔmɛ a he.
9 Nyɛ wo Yehowa wa Mawu ɔ nɔ,Nɛ́ nyɛ kplã si* ngɛ e yoku klɔuklɔu ɔ hɛ mi,Ejakaa Yehowa wa Mawu ɔ ngɛ klɔuklɔu.
Sisi Ningmahi
^ Baiblo komɛ de ke “ngɛ kerubhi a kpɛti.”
^ Aloo “nyɛ ja lɛ.”
^ Ngɛ Hebri gbi mi ɔ, “o ye lue ngɛ a nɔ.”
^ Aloo “Nɛ́ nyɛ ja lɛ.”
