Luka Sane Kpakpa a 19:1-48
19 Lɔ ɔ se ɔ, e sɛ Yɛriko nɛ e gu ma a mi kɛ yaa.
2 Nyumu ko ngɛ lejɛ ɔ nɛ a tsɛɛ lɛ ke Zakeo; e ji tó tsulɔ nɔkɔtɔma, nɛ e ji niatsɛ hulɔ.
3 Ngɛ anɔkuale mi ɔ, e ngɛ mɔde bɔe kaa e maa na Yesu, se e nyɛ we nɛ e na lɛ, ejakaa ni ɔmɛ a he hiɛ, nɛ nɔmlɔ kpiti ji lɛ hulɔ.
4 Enɛ ɔ he ɔ, e tu fo kɛ sɛ hlami, nɛ e ya kuɔ sikamɔ tso ko konɛ e nyɛ nɛ e na lɛ, ejakaa e be kɛe nɛ e maa gu jamɛ a blɔ ɔ nɔ kɛ be.
5 Benɛ Yesu su lejɛ ɔ, e wo e yi nɔ nɛ e de lɛ ke: “Zakeo, kple si esɔ, ejakaa mwɔnɛ ɔ, o we ɔ mi nɛ ma to.”
6 Kɛkɛ nɛ e kple si esɔesɔ, nɛ e kɛ bua jɔmi nya e he kaa nubwɔ.
7 Benɛ ni ɔmɛ na nɔ́ nɛ ɔ, mɛ tsuo a tu munyu huitihuiti, nɛ a ngɛ dee ke: “E ya to nyumu ko nɛ e ji yayami peelɔ we mi.”
8 Se Zakeo te si kɛ da si nɛ e de Nyɔmtsɛ ɔ ke: “Hyɛ! Nyɔmtsɛ, níhi nɛ i ngɛ ɔ, ma ngɔ e mi fã kɛ ke ohiatsɛmɛ, nɛ ke i fia nɔ ko ojo* ɔ, nɔ́ nɛ i kpɔ̃ ngɛ e dɛ ɔ, ma bɔ he si eywiɛ kɛ ha lɛ.”
9 Enɛ ɔ he ɔ, Yesu de lɛ ke: “Mwɔnɛ ɔ, yi wami hemi ba we nɛ ɔ mi, ejakaa lɛ hu Abraham bi ji lɛ.
10 Ejakaa nɔmlɔ Bi ɔ ba konɛ e ba hla nɔ́ nɛ e laa a nɛ e he e yi wami.”
11 Benɛ a ngɛ ní nɛ ɔmɛ tue bue ɔ, e kɛ nɔ́ he tomi nɔ́ kpa ko hu tsu ní, ejakaa e piɛ bɔɔ nɛ e maa su Yerusalɛm nɛ nihi susu kaa Mawu Matsɛ Yemi ɔ ma je e he kpo amlɔ nɔuu.
12 Lɔ ɔ he ɔ, e de mɛ ke: “Odehe ko hia blɔ kɛ ho zugba ko nɔ ya ngɛ he ko tsitsaa konɛ a ya wo lɛ matsɛ nɛ́ e kpale kɛ ba.
13 E tsɛ e nyɔguɛ ɔmɛ a kpɛti nihi nyɔngma nɛ e ha mɛ mina* nyɔngma, nɛ e de mɛ ke: ‘Nyɛɛ ngɔ kɛ ye jua kɛ yaa si be nɛ ma ba.’
14 Se e ma a mi bi ɔmɛ nyɛ lɛ, nɛ a tsɔ a nane mi dali kɛ nyɛɛ e se, konɛ a ya de ke, ‘Wa sume kaa nyumu nɛ ɔ nɛ e ba ye wa nɔ matsɛ.’
15 “Nyagbenyagbe ɔ, a ya wo lɛ matsɛ ɔ,* nɛ benɛ e kpale e se kɛ ba a, e tsɛ nyɔguɛ ɔmɛ nɛ́ e ha mɛ sika a,* konɛ e hyɛ nɔ́ nɛ a ná kɛ je a jua yemi ɔ mi.
16 Enɛ ɔ he ɔ, kekleekle nɔ ɔ ba nɛ e ba de ke, ‘Nyɔmtsɛ, o mina a fɔ mina nyɔngma.’
17 E de lɛ ke, ‘Ayekoo, nyɔguɛ kpakpa! Ejakaa o tsɔɔ kaa anɔkualetsɛ ji mo ngɛ nɔ́ nyafii mi, moo ye ma nyɔngma nɔ.’
18 Jehanɛ ɔ, nɔ enyɔne ɔ ba nɛ e ba de ke, ‘Nyɔmtsɛ, o mina a fɔ mina enuɔ.’
19 E de nɔ nɛ ɔ hu ke, ‘Mo hu ye ma enuɔ nɔ.’
20 Se nɔ kpa hu ba nɛ e ba de ke, ‘Nyɔmtsɛ, o mina a ji nɛ ɔ nɛ. I ngɔ kɛ laa ngɛ bo ko mi.
21 O le, i ye mo gbeye, ejakaa o sane he wa; nɔ́ nɛ o kɛ to we si ɔ, lɔ ɔ nɛ o ngɔɔ, nɛ nɔ́ nɛ o du we ɔ, lɔ ɔ nɛ o kpaa.’
22 Nyɔmtsɛ ɔ de lɛ ke, ‘Nyɔguɛ yayami, mo nitsɛ o nya mi munyu nɛ ma kɛ kojo mo. Tse o le kaa ye sane he wa, nɛ nɔ́ nɛ i kɛ to we si ɔ, lɔ ɔ nɛ i ngɔɔ, nɛ nɔ́ nɛ i du we ɔ, lɔ ɔ nɛ i kpaa, aloo pi jã?
23 Lɛɛ mɛni he je mɔ nɛ o ngɔɛ ye sika a* kɛ ya to we ngɛ sika tomi he ɔ? Kaa o pee jã a, jinɛ benɛ i ba nɛ ɔ, i ko ba ngɔ ye ní kɛ hekpa.’
24 “Kɛkɛ nɛ e de nihi nɛ a daa si ngɛ lejɛ ɔ ke, ‘Nyɛɛ ngɔ mina a ngɛ e dɛ nɛ nyɛ kɛ ha nɔ nɛ e ngɛ mina nyɔngma a.’
25 Se a de lɛ ke, ‘Nyɔmtsɛ, e ngɛ mina nyɔngma!’—
26 ‘I ngɛ nyɛ dee ke nɔ fɛɛ nɔ nɛ e ngɛ nɔ́ ko ɔ, a ma ha lɛ fuu, se nɔ nɛ e be nɔ́ ko ɔ, nɔ́ nɛ e ngɛ ɔ po a ma kpɔ̃ ngɛ e dɛ.
27 Jehanɛ ɔ, nyɛɛ ngɔ ye he nyɛli nɛ ɔmɛ nɛ a sume kaa ma ye a nɔ matsɛ ɔ kɛ ba hiɛ ɔ nɛ nyɛ ba gbe mɛ ngɛ ye hɛ mi.’”
28 Benɛ e de ní nɛ ɔmɛ ta a, e sɛ a hlami kɛ ngɛ kuɔe kɛ yaa Yerusalɛm.
29 Nɛ benɛ e piɛ bɔɔ nɛ e maa su Betfage kɛ Betania ngɛ yoku nɛ a tsɛɔ ke Oliv Yoku ɔ nɔ ɔ, e tsɔ e kaseli ɔmɛ a kpɛti ni enyɔ,
30 nɛ e de mɛ ke: “Nyɛɛ ya kɔpe ɔ nɛ wa ngɛ hyɛe nɛ ɔ mi, nɛ ke nyɛ sɛ mi ɔ, nyɛ maa na teji ku nyafii ko nɛ nɔ ko hí e nɔ hyɛ nɛ a muɔ lɛ si. Nyɛɛ pɛne lɛ nɛ nyɛɛ ngɔ lɛ kɛ ba hiɛ ɔ.
31 Se ke nɔ ko bi nyɛ ke, ‘Mɛni he je nɛ nyɛ ngɛ lɛ pɛnee ɔ?’ nyɛ de lɛ ke, ‘E he hia Nyɔmtsɛ ɔ.’”
32 Lɔ ɔ he ɔ, nihi nɛ e tsɔ mɛ ɔ pue nɔ kɛ ho nɛ a ya na kaa bɔ nɛ e de mɛ ɔ pɛpɛɛpɛ.
33 Se benɛ a ngɛ teji ku nyafii ɔ pɛnee ɔ, nɔtsɛmɛ ɔmɛ bi mɛ ke: “Mɛni he je nɛ nyɛ ngɛ teji ku nyafii ɔ pɛnee ɔ?”
34 A de mɛ ke: “E he hia Nyɔmtsɛ ɔ.”
35 Nɛ a ngɔ lɛ kɛ ba ha Yesu, nɛ a ngɔ tadehi nɛ a wo ngɛ a tade ɔmɛ a nɔ ɔ kɛ pue teji ku nyafii ɔ nɔ, nɛ a ngɔ Yesu kɛ hi nɔ.
36 Benɛ e yaa a, a ngɔ tadehi nɛ a wo ngɛ a tade ɔmɛ a nɔ ɔ kɛ ngɛ gbɛjegbɛ ɔ nɔ puee.
37 Benɛ e piɛ bɔɔ pɛ nɛ e maa su gbɛjegbɛ ɔ nɛ je Oliv Yoku ɔ nɔ kɛ kple ɔ he ɔ, kaseli babauu ɔ tsuo bɔni nyami, nɛ a kɛ gbi nɛ nya wa ngɛ Mawu yi jee ngɛ he wami níhi tsuo nɛ a na a he je,
38 nɛ a ngɛ dee ke: “A jɔɔ nɔ nɛ e ma kaa Matsɛ ngɛ Yehowa* biɛ ɔ mi ɔ! Tue mi jɔmi ngɛ hiɔwe, nɛ hɛ mi nyami ngɛ hiɔwe lokoo!”
39 Se Farisi bi ɔmɛ nɛ a ngɛ asafo kuu ɔ mi ɔ de lɛ ke: “Tsɔɔlɔ, kã o kaseli ɔmɛ a hɛ mi.”
40 Se e he nɔ nɛ e de mɛ ke: “I ngɛ nyɛ dee ke, ke ni nɛ ɔmɛ ma a nya a, tɛ ɔmɛ ma kpa ngmlaa.”
41 Benɛ e su ta nɛ e na ma a, e fo ya ha lɛ,
42 nɛ e de ke: “Kaa mwɔnɛ ɔ ligbi nɛ ɔ, mo nitsɛ o kɔ níhi nɛ a ma ha nɛ o ná tue mi jɔmi ɔ se ɔ—se amlɔ nɛ ɔ, a ngɔ kɛ laa o hɛ ngmɛhi.
43 Ejakaa ligbi ɔmɛ ma nɛ́ o he nyɛli ɔmɛ maa ngɔ tsohi kɛ a nya piɔpiɔɔpiɔ kɛ sa o yi, nɛ a maa bɔle mo kɛ kpe, nɛ a maa wo o he ka* ngɛ he fɛɛ he.
44 A maa ngɔ mo kɛ o bimɛ nɛ a ngɛ o mi ɔ kɛ fiaa zugba, nɛ a be tɛ ko sie ngɛ tɛ ko nɔ ngɛ o mi, ejakaa be nɛ a ba ngɛ mo hyɛe ɔ, o kɔ we se.”
45 Lɔ ɔ se ɔ, e sɛ sɔlemi we ɔ nɛ e bɔni nihi nɛ a ngɛ ní juae ɔ fiemi.
46 E de mɛ ke: “A ngma ke, ‘A ma tsɛ ye we ɔ ke sɔlemi we,’ se nyɛɛ lɛɛ nyɛ ngɔ kɛ pee juli a tɛ puɔ mi.”
47 Daa ligbi ɔ, e yaa nɔ nɛ e tsɔɔ ní ngɛ sɔlemi we ɔ. Se osɔfo nikɔtɔma amɛ kɛ womi ngmali ɔmɛ kɛ nimli nguanguahi nɛ a ngɛ ma a mi ɔ ngɛ blɔ nɔ nɛ a maa gu kɛ gbe lɛ ɔ hlae;
48 se a nɛ blɔ ko nɛ a maa gu nɔ kɛ pee enɛ ɔ, ejakaa ni ɔmɛ tsuo bua wo e he konɛ a bu lɛ tue.
Sisi Ningmahi
^ Aloo “ke i po nɔ ko nya yaka nɛ i kpɔ̃ nɔ́ ko ngɛ e dɛ.”
^ Hela mina kake jiɔmi ji gram 340, nɛ peeɔ drakma 100.
^ Aloo “e nine ya su matsɛ yemi ɔ nɔ.”
^ Hela, “sika hiɔ ɔ.”
^ Hela, “sika hiɔ ɔ.”
^ Hyɛ Munyu Komɛ A Sisi Tsɔɔmi.
^ Aloo “a maa hao mo.”
