Luka Sane Kpakpa a 24:1-53
24 Se mɔtu mla ngɛ otsi ɔ we kekleekle ligbi ɔ nɔ ɔ, a ngɔ tsopa kɛ e he via nɛ a dla a kɛ ba yɔkɔ* ɔ he.
2 Se a na kaa a kpɛne tɛ ɔ kɛ je yɔkɔ* ɔ nya,
3 nɛ benɛ a sɛ mi ɔ, a nɛ Nyɔmtsɛ Yesu gbogboe ɔ.
4 Benɛ a he mi po nɛ a li nɔ́ nɛ a maa pee ɔ, hyɛ! nyumuhi enyɔ nɛ a wo tade nɛ ngɛ kpɛe ba da si ngɛ a kasa nya.
5 Yi ɔmɛ ye gbeye nɛ a ma a yi si, enɛ ɔ he ɔ, nyumu ɔmɛ de mɛ ke: “Mɛni he je nɛ nyɛ ngɛ nɔ nɛ e hɛ ngɛ ɔ hlae ngɛ gbogboehi a kpɛti ɔ?
6 E be hiɛ ɔ, mohu ɔ, a tle lɛ si. Nyɛ kai nɔ́ nɛ e de nyɛ benɛ e ngɛ Galilea a.
7 E de nyɛ ke a maa ngɔ nɔmlɔ Bi ɔ kɛ wo yayami peeli a dɛ mi, nɛ a maa gbe lɛ ngɛ tso nɔ, nɛ ligbi etɛne ɔ nɔ ɔ, e maa te si.”
8 Kɛkɛ nɛ a kai e munyu ɔmɛ,
9 nɛ a kpale a se kɛ je yɔkɔ* ɔ he, nɛ a ya sɛɛ ní nɛ ɔmɛ tsuo kɛ ha Ni Nyɔngma Kɛ Kake ɔmɛ kɛ ni kpa amɛ tsuo.
10 Mɛ ji Maria Magdalena, Yohana, kɛ Yakobo yayo Maria. Jehanɛ se hu ɔ, yi kpa amɛ nɛ a piɛɛ a he ɔ ya ngɛ bɔfo ɔmɛ ní nɛ ɔmɛ dee.
11 Se a susu kaa juɛmi be níhi nɛ yi ɔmɛ ngɛ dee ɔ mi, nɛ a he we mɛ yi.
12 Se Petro te si nɛ e tu fo kɛ ya yɔkɔ ɔ he, nɛ e ya kɔkɔ e yi si, nɛ e na klala amɛ pɛ. Lɔ ɔ he ɔ, e je kɛ ho, nɛ nɔ́ nɛ ba a pee lɛ nyakpɛ nɛ e ngɛ he susue.
13 Se hyɛ! jamɛ a ligbi ɔ nɔuu ɔ, nyumuhi enyɔ ngɛ blɔ hiae kɛ yaa kɔpe ko nɛ a tsɛɛ ke Emao ɔ mi. Kɛ je Yerusalɛm kɛ yaa lejɛ ɔ mi kɛmi maa pee si tomi kpaago.*
14 Benɛ a ngɛ blɔ ɔ nɔ kɛ yaa a, a ngɛ ní nɛ ɔmɛ tsuo nɛ a ya nɔ ɔ he ní sɛɛe.
15 Jehanɛ ɔ, benɛ a ngɛ ní nɛ ɔmɛ a he ní sɛɛe ɔ, Yesu nitsɛ su a he, nɛ e kɛ mɛ bɔni nyɛɛmi,
16 se a ha nyumu ɔmɛ a hɛ ngmɛ ɔmɛ a nɔ nɛ a nyɛ we nɛ a yɔse lɛ.
17 E de mɛ ke: “Mɛni sanehi a he atsinyɛ nɛ nyɛ ngɛ jee ngɛ blɔ ɔ nɔ ɔ?” Nɛ a da si kɛ a hɛ mi mɔbɔmɔbɔ.
18 Kɛkɛ nɛ nɔ kake nɛ a tsɛɛ lɛ ke Kleopa a de lɛ ke: “Anɛ nubwɔ ji mo ngɛ Yerusalɛm nɛ mo pɛ lɛ o ngɛ, nɛ lɔ ɔ he ɔ, o li* níhi nɛ ya nɔ ngɛ ligbi nɛ ɔmɛ a mi ɔ lo?”
19 E bi mɛ ke: “Mɛni níhi?” A de lɛ ke: “Níhi nɛ kɔɔ Yesu, Nazarɛt no ɔ he ɔ. E tsɔɔ kaa e ji gbalɔ nɛ e ngɛ he wami ngɛ ní peepee kɛ munyu tumi mi ngɛ Mawu kɛ ni ɔmɛ tsuo a hɛ mi.
20 Wa we osɔfo nikɔtɔma amɛ kɛ nɔ yeli ɔmɛ ngɔ lɛ kɛ ha nɛ a bu lɛ gbenɔ fɔ, nɛ a sɛu lɛ.
21 Se jinɛ wa hɛ kɛ nɔ fɔmi ji kaa nyumu nɛ ɔ ji nɔ nɛ e ma ba kpɔ̃ Israel ɔ nɛ. Ee, ngɛ ní nɛ ɔmɛ tsuo a se ɔ, mwɔnɛ ɔ ji ligbi etɛ nɛ ní nɛ ɔmɛ ya nɔ.
22 Jehanɛ se hu ɔ, yi komɛ nɛ a ngɛ wa kpɛti ɔ hu ha nɛ wa nya kpɛ wa he, ejakaa a ya yɔkɔ* ɔ he mla,
23 nɛ benɛ a ya nɛ e gbogboe ɔ, a ba nɛ a ba de ke a na nyakpɛ nɔ́ ko hulɔ, a na hiɔwe bɔfohi, nɛ a de mɛ ke e hɛ ngɛ.
24 Kɛkɛ nɛ wa kpɛti ni komɛ pue nɔ kɛ ho yɔkɔ* ɔ he ya, nɛ a ya na kaa bɔ nɛ yi ɔmɛ de ɔ pɛpɛɛpɛ, se a nɛ lɛ.”
25 Enɛ ɔ he ɔ, e de mɛ ke: “Oo nyɛ nihi nɛ nyɛ be juɛmi, nɛ nyɛ tsui he we níhi tsuo nɛ gbali ɔmɛ de ɔ yi mla!
26 Anɛ jinɛ e he hia we nɛ Kristo ɔ nɛ e na amanehlu nɛ ɔmɛ tsuo nɛ e sɛ e hɛ mi nyami ɔ mi lo?”
27 Nɛ e je sisi kɛ je Mose kɛ Gbali ɔmɛ tsuo a nɔ, nɛ e tsɔɔ mɛ níhi tsuo nɛ ngɛ Ngmami ɔ mi nɛ kɔɔ lɛ nitsɛ e he ɔmɛ a sisi.
28 Nyagbe ɔ, benɛ e piɛ bɔɔ nɛ a maa su kɔpe ɔ nɛ a yaa mi ɔ mi ɔ, lɛɛ lɛɛ e pee kaa nɔ́ nɛ e ngɛ nɔ tsae kɛ yaa.
29 Se a kpa lɛ pɛɛ wawɛɛ kaa e ko ya, nɛ a de lɛ ke: “Mo ba to wɔ, ejakaa je ngɛ jɔe, nɛ e piɛ bɔɔ nɛ du ma bu.” Kɛkɛ nɛ e kɛ mɛ ho nɛ e ya to mɛ.
30 Nɛ benɛ e kɛ mɛ ngɛ ní ɔ yee ɔ, e kɛ̃ abolo, nɛ e jɔɔ nɔ, nɛ e ku mi, nɛ e kɛ bɔni mɛ hami.
31 Kɛkɛ nɛ a hɛ ngmɛ ɔmɛ bli saminya, nɛ a yɔse lɛ; se a nɛ lɛ hu.
32 Nɛ a de a sibi ke: “Benɛ wa ngɛ blɔ ɔ nɔ nɛ e kɛ wɔ ngɛ munyu tue, nɛ e ngɛ Ngmami ɔ mi blɛkee saminya* kɛ ngɛ wɔ tsɔɔe ɔ, anɛ e tɛ wa tsui he lo?”*
33 Kɛkɛ nɛ a te si ngɛ jamɛ a ngmlɛfia a mi nɔuu nɛ a kpale a se kɛ ho Yerusalɛm ya, nɛ a ya na Ni Nyɔngma Kɛ Kake ɔmɛ kɛ nihi nɛ a kɛ mɛ bua a he nya a,
34 nɛ a de ke: “Ngɛ anɔkuale mi ɔ, a tle Nyɔmtsɛ ɔ si, nɛ e je e he kpo ngɔ tsɔɔ Simon!”
35 Kɛkɛ nɛ mɛ hu a bɔ mɛ níhi nɛ ya nɔ ngɛ blɔ ɔ nɔ ɔ, kɛ bɔ nɛ a gu abolo ɔ nɛ e ku mi ɔ nɔ kɛ yɔse lɛ ha a.
36 Benɛ a ngɛ ní nɛ ɔmɛ a he munyu tue ɔ, lɛ nitsɛ e ba da si ngɛ a kpɛti, nɛ e de mɛ ke: “Tue mi jɔmi ha nyɛ.”
37 Se akɛnɛ a tsui po nɛ a ye gbeye he je ɔ, a susu kaa mumi ko nɛ a ngɛ hyɛe ɔ nɛ.
38 Lɔ ɔ he ɔ, e de mɛ ke: “Mɛni he je nɛ nyɛ hao, nɛ mɛni he je nɛ nyɛ ngɛ nɔ́ jee ngɛ nyɛ tsui mi ɔ?
39 Nyɛɛ hyɛ ye nine ɔmɛ kɛ ye nane ɔmɛ nɛ nyɛ maa na kaa imi nitsɛnitsɛ; nyɛɛ pɛtɛ ye he nɛ nyɛɛ hyɛ, ejakaa mumi be he lo kɛ wuhi kaa bɔ nɛ nyɛ na kaa i ngɛ ɔ.”
40 Benɛ e tu munyu nɛ ɔ, e ngɔ e nine ɔmɛ kɛ e nane ɔmɛ kɛ tsɔɔ mɛ.
41 Se benɛ bua jɔmi sɔuu kɛ a nya nɛ kpɛ a he ɔ ha nɛ a he we yi ɔ, e bi mɛ ke: “Anɛ nyɛ ngɛ nɔ́ ko nɛ a yeɔ lo?”
42 Lɔ ɔ he ɔ, a ha lɛ pa mi lo kpɔ ko nɛ a sã,
43 nɛ e ngɔ nɛ e kpe ngɛ a hɛ mi.
44 Lɔ ɔ se ɔ, e de mɛ ke: “Benɛ i kɛ nyɛ ngɛ ɔ, i de nyɛ ní nɛ ɔmɛ kaa níhi tsuo nɛ a ngma ngɛ ye he ngɛ Mose Mlaa a kɛ Gbali ɔmɛ kɛ La amɛ a mi ɔ, e sa nɛ a ba mi.”
45 Kɛkɛ nɛ e bli a juɛmi nya saminya konɛ a nu Ngmami ɔ sisi,
46 nɛ e de mɛ ke: “Nɔ́ nɛ a ngma a ji nɛ ɔ nɛ: a ngma kaa Kristo ɔ maa na amanehlu, nɛ e maa te si ngɛ gbogboe ɔmɛ a kpɛti ngɛ ligbi etɛne ɔ nɔ,
47 nɛ ngɛ e biɛ ɔ mi ɔ, a maa fiɛɛ tsui tsakemi kɛ ha yayami pami ngɛ je ma amɛ tsuo a mi. A maa je sisi kɛ je Yerusalɛm.
48 Nyɛ lɛ nyɛ maa pee ní nɛ ɔmɛ a he odasefohi.
49 Nɛ hyɛ! i ngɛ nɔ́ nɛ ye Tsɛ ɔ wo he si ɔ tsɔe kɛ ba nyɛ nɔ. Se nyɛɛ lɛɛ, nyɛɛ hi ma a mi kɛ yaa si be nɛ a maa je hiɔwe kɛ wo nyɛ he wami.”
50 Lɔ ɔ se ɔ, e kɛ mɛ je kpo nɛ e nyɛɛ a hɛ mi hluu kɛ ya su Betania, nɛ e wo e nine nɔ nɛ e jɔɔ mɛ.
51 Benɛ e ngɛ mɛ jɔɔe ɔ, a je lɛ kɛ je a kpɛti nɛ a ngɔ lɛ kɛ ho hiɔwe ya.
52 Nɛ a kpla si ha lɛ, nɛ a kpale a se kɛ ho Yerusalɛm ya kɛ bua jɔmi babauu.
53 Nɛ be fɛɛ be ɔ, a ngɛ sɔlemi we ɔ, nɛ a ngɛ Mawu yi jee.
Sisi Ningmahi
^ Aloo “kaimi yɔkɔ.”
^ Aloo “kaimi yɔkɔ.”
^ Aloo “kaimi yɔkɔ.”
^ Maa pee kilomita 11. Hela, “stadia.” Stadium kake peeɔ mita 185. (nanewɛɛ 606.95).
^ E ma nyɛ maa pee kaa “mo pɛ ji nubwɔ ngɛ Yerusalɛm nɛ o li lo?”
^ Aloo “kaimi yɔkɔ.”
^ Aloo “kaimi yɔkɔ.”
^ Aloo “mi tsɔɔe fitsofitso.”
^ Hela, “anɛ wa tsui he dɔɛ la ngɛ wa mi lo?”
