Maako Sane Kpakpa a 16:1-8
-
A tle Yesu si (1-8)
16 Enɛ ɔ he ɔ, benɛ He Jɔɔmi Ligbi ɔ be ɔ, Maria Magdalena, kɛ Maria nɛ ji Yakobo yayo, kɛ Salome ya he tsopahi kɛ a he via konɛ a kɛ ba kpa e gbogboe ɔ.
2 Mɔtu mla benɛ pu je ngɛ otsi ɔ we kekleekle ligbi ɔ nɔ ɔ, a ba yɔkɔ* ɔ he.
3 A ngɛ a sibi bie ke: “Mɛnɔ ma kpɛne tɛ ɔ kɛ je yɔkɔ ɔ nya ha wɔ?”
4 E ngɛ mi kaa tɛ ɔ kle agbo mohu lɛɛ, se benɛ a wo a yi nɔ ɔ, a na kaa a kpɛne tɛ ɔ kɛ ya se.
5 Benɛ a sɛ yɔkɔ ɔ mi ɔ, a na niheyo ko nɛ e hii si ngɛ hiɔ nɔ je kɛ e he tade hiɔ klɔii, nɛ a tsui po.
6 E de mɛ ke: “Nyɛ ko ye gbeye. Nyɛ ngɛ Yesu, Nazarɛt no ɔ nɛ a gbe lɛ ngɛ tso nɔ ɔ hlae. A tle lɛ si. E be hiɛ ɔ. Nyɛɛ hyɛ, he nɛ a kɛ lɛ fɔ ɔ ji nɛ ɔ nɛ.
7 Se nyɛɛ ya, nyɛ ya de e kaseli ɔmɛ kɛ Petro ke, ‘E ngɛ nyɛ hlami sɛe kɛ yaa Galilea. Nyɛ maa na lɛ ngɛ lejɛ ɔ kaa bɔ nɛ e de nyɛ ɔ.’”
8 Enɛ ɔ he ɔ, benɛ a je kpo ɔ, a tu fo kɛ je yɔkɔ ɔ he. A he ngɛ doe blibliibli nɛ fĩɛ ngmangu pue a nɔ. Nɛ a de we nɔ ko nɔ ko nɔ́ ko, ejakaa gbeye nu mɛ.*
Sisi Ningmahi
^ Aloo “kaimi yɔkɔ.”
^ Ngɛ blema womi kpohi nɛ a kɛ nine ngma nɛ nihi he ye kaa a mi munyu ɔmɛ da amɛ a mi ɔ, munyu nɛ ngɛ kuku 8 ɔ mi ɔ ji nyagbe munyu ngɛ Maako Sane Kpakpa a mi.
