Maako Sane Kpakpa a 9:1-50
-
Yesu tsakemi ɔ (1-13)
-
A tsa nyumuyo ko nɛ daimoniohi ngɛ lɛ haoe (14-29)
-
A ma nyɛ maa pee nɔ́ fɛɛ nɔ́ kɛ ha nɔ nɛ e ngɛ hemi kɛ yemi ɔ (23)
-
-
A gba Yesu gbenɔ ɔ kɛ fɔ si ekohu (30-32)
-
Kaseli ɔmɛ sã nya ngɛ a kpɛti nɔ nɛ ji nɔmlɔ ngua pee kulaa a he (33-37)
-
Nɔ fɛɛ nɔ nɛ e ti si wui wɔ ɔ ngɛ wa blɔ fa mi (38-41)
-
Nane tɔ̃tɔ̃mi tɛhi (42-48)
-
“Nyɛ ha nɛ ngo nɛ hi nyɛ mi” (49, 50)
9 Jehanɛ se hu ɔ, e de mɛ ke: “I ngɛ nyɛ dee ngɛ anɔkuale mi ke, nihi nɛ a daa si ngɛ hiɛ ɔ, a ti ni komɛ be a nya gbenɔ sae kulaa kɛ yaa si be nɛ a maa na Mawu Matsɛ Yemi ɔ kaa nɔ́ nɛ e ba momo ngɛ he wami mi kekle.”
2 Ngɛ ligbi ekpa se ɔ, Yesu ngɔ Petro kɛ Yakobo kɛ Yohane kɛ piɛɛ e he, nɛ e nyɛɛ a hɛ mi kɛ kuɔ kɛ ho yoku gagaaga ko nɔ ya. Mɛ pɛ nɛ a ya lejɛ ɔ. E tsake ngɛ a hɛ mi;
3 tade nɛ e wo ngɛ e tade ɔ nɔ ɔ bɔni kpɛmi, nɛ e hiɛ futafuta pe bɔ nɛ níhi a he fɔlɔ ko ngɛ zugba a nɔ ma nyɛ ma ha nɛ e hiɛ futaa jã.
4 Jehanɛ hu ɔ, Eliya kɛ Mose je a he kpo kɛ tsɔɔ mɛ, nɛ a kɛ Yesu ngɛ ní sɛɛe.
5 Kɛkɛ nɛ Petro de Yesu ke: “Rabi, e hi kaa wa ngɛ hiɛ ɔ. Enɛ ɔ he ɔ, ha nɛ waa ma bo tsu etɛ, o nɔ́ kake, Mose nɔ́ kake, kɛ Eliya hu nɔ́ kake.”
6 Ngɛ anɔkuale mi ɔ, e li bɔ nɛ e maa pee ha, ejakaa a ye gbeye wawɛɛ.
7 Nɛ bɔku ko wo, nɛ benɛ e ha a nɔ ɔ, gbi ko pɛ kɛ je bɔku ɔ mi ke: “Ye Bi nɛ i suɔ lɛ, nɛ ye bua jɔ e he ji nɛ ɔ nɛ. Nyɛɛ bu lɛ tue.”
8 Kɛkɛ nɛ tlukaa a, benɛ a po a hɛ nɛ a hyɛ ɔ, a na kaa nɔ ko nɔ ko be a kasa nya hu kaa ja Yesu pɛ.
9 Benɛ a ngɛ yoku ɔ kplee kɛ ma a, e bɔ mɛ kɔkɔ kaa a ko sɛɛ nɔ́ nɛ a na a kɛ ha nɔ ko nɔ ko kɛ yaa si be nɛ nɔmlɔ Bi ɔ maa te si kɛ je gbeje.
10 A ngɔ munyu ɔ kɛ to a tsui mi,* se mɛ sɔuu a susu nɔ́ nɛ si temi kɛ je gbeje nɛ ɔ tsɔɔ ɔ he.
11 Nɛ a bɔni lɛ sane bimi ke: “Mɛni he je nɛ womi ngmali ɔmɛ deɔ ke e sa nɛ Eliya nɛ ba kekle ɔ?”
12 E de mɛ ke: “Niinɛ, Eliya maa ba kekle nɛ e ma ba dla níhi tsuo; se mɛni he je nɛ a ngma ngɛ nɔmlɔ Bi ɔ he kaa e sa nɛ e na amanehlu babauu nɛ a pue e hɛ mi si ɔ?
13 Se i ngɛ nyɛ dee ke, Eliya ba momo, nɛ a pee lɛ nɔ́ fɛɛ nɔ́ nɛ a suɔ kaa bɔ nɛ a ngma ngɛ e he ɔ.”
14 Benɛ a ba kaseli kpa amɛ a ngɔ ɔ, a na kaa nimli babauu bɔle mɛ, nɛ womi ngmali ɔmɛ kɛ mɛ ngɛ nya sãe.
15 Se benɛ asafo kuu ɔ tsuo hɛ ngmɛ gba e nɔ ɔ, a nya kpɛ a he, nɛ a tu fo kɛ ya ná lɛ konɛ a fɔ lɛ.
16 Kɛkɛ nɛ e bi mɛ ke: “Mɛni he nyɛɛ kɛ mɛ ngɛ nya sãe ngɛ ɔ?”
17 Nɛ asafo kuu ɔ mi nɔ ko ha lɛ heto ke: “Tsɔɔlɔ, i ngɔ ye binyumu kɛ ba ha mo, ejakaa mumi ko nɛ ha we nɛ nɔ tuɔ munyu ngɛ e mi.
18 He fɛɛ he nɛ e maa nu lɛ ngɛ ɔ, e sakeɔ lɛ kɛ fɔɔ zugba, nɛ e nya mi fiaa hwɔli, nɛ e kpeɔ e lungu nya, kɛkɛ ɔ, e pee gbedee. I de o kaseli ɔmɛ kaa a hia lɛ, se a nyɛ we nɛ a pee jã.”
19 E de mɛ ke: “Oo yi nɔ nɛ be hemi kɛ yemi, mɛni be i kɛ nyɛ maa hi si kɛ ya si? Mɛni be ma ná nyɛ he tsui kɛ ya si? Nyɛɛ ngɔ lɛ kɛ ba ha mi.”
20 Kɛkɛ nɛ a ngɔ nyumuyo ɔ kɛ ba ha lɛ, se ngɛ e hɛ mi nɔuu ɔ, mumi ɔ ha nɛ si nɔɔmi hiɔ nɔ jokuɛ ɔ nɔ. Benɛ e nɔ zugba a, e ngɛ kpɛnee kɛ ngɛ yae kɛ ngɛ bae, nɛ e nya mi ngɛ hwɔli fiae.
21 Kɛkɛ nɛ Yesu bi jokuɛ ɔ tsɛ ɔ ke: “Mɛni be nɛ nɔ́ nɛ ɔ bɔni lɛ peemi?” E he nɔ ke: “Kɛ je e jokuɛ mi,
22 nɛ e pɔɔ lɛ sakemi ngɔ fɔɔ la mi, kɛ nyu mi hulɔ, konɛ e kpata e hɛ mi. Se ke o ma nyɛ maa pee nɔ́ ko ngɛ he ɔ, lɛɛ moo na wɔ mɔbɔ nɛ o ye bua wɔ.”
23 Yesu de lɛ ke: “Jamɛ a munyu nɛ ji, ‘Ke o ma nyɛ’ ɔ! Ngɛ anɔkuale mi ɔ, a ma nyɛ maa pee nɔ́ fɛɛ nɔ́ kɛ ha nɔ nɛ e ngɛ hemi kɛ yemi ɔ.”
24 Amlɔ nɔuu nɛ jokuɛ ɔ tsɛ ɔ kpa ngmlaa nɛ e de ke: “I ngɛ hemi kɛ yemi! Moo ye bua mi ngɛ he nɛ i hia hemi kɛ yemi ngɛ ɔ!”
25 Benɛ Yesu na kaa nihi babauu sa fo kɛ ma a ngɔ ɔ, e kã mumi nɛ e he tsɔ we ɔ hɛ mi, nɛ e de lɛ ke: “Mo mumi nɛ o ha we nɛ nɔ tuɔ munyu nɛ o ha we nɛ nɔ nuɔ nɔ́, i ngɛ mo fãe ke, jee kpo kɛ je e mi nɛ o ko sɛ e mi hu!”
26 Benɛ e kpa ngmlaa nɛ si nɔɔmi hiɔ nɔ e nɔ si abɔ se ɔ, e je kpo, nɛ jokuɛ ɔ pee kaa nɔ ko nɛ e gbo. Enɛ ɔ ha nɛ ni ɔmɛ a kpɛti nihi fuu ngɛ dee ke: “E gbo!”
27 Se Yesu pɛtɛ e nine he nɛ e wo e nɔ, nɛ e te si kɛ da si.
28 Jehanɛ ɔ, benɛ e ya sɛ we ko mi ɔ, e kaseli ɔmɛ bi lɛ ngɛ laami mi ke: “Mɛni he je nɛ wɔɔ lɛɛ wa nyɛ we nɛ waa hia mumi yayami ɔ?”
29 E de mɛ ke: “Sɔlemi pɛ lɛ ma nyɛ maa hia kikɛmɛ a henɔ nɛ ɔ.”
30 A je lejɛ ɔ nɛ a ya gu Galilea, se e sume kaa nɔ ko nɛ le he nɔ́ ko.
31 Ejakaa e ngɛ e kaseli ɔmɛ ní tsɔɔe nɛ e ngɛ mɛ dee ke: “A maa tsɔɔ nɔmlɔ Bi ɔ se blɔ nɛ a maa ngɔ lɛ kɛ wo nimli a dɛ mi, nɛ a maa gbe lɛ, se ngɛ gbemi nɛ a maa gbe lɛ ɔ tsuo se ɔ, e maa te si ngɛ ligbi etɛne ɔ nɔ.”
32 Se a nui e munyu ɔ sisi, nɛ a ngɛ gbeye yee kaa a ma bi lɛ sane ko hulɔ.
33 Kɛkɛ nɛ a ba su Kapenaum. Jehanɛ ɔ, benɛ e ngɛ we ɔ mi ɔ, e bi mɛ ke: “Mɛni he nyɛ ngɛ nya sãe ngɛ ngɛ blɔ ɔ nɔ ɔ?”
34 A pui e nya mi, ejakaa benɛ a ngɛ blɔ ɔ nɔ ɔ, a ngɛ nya sãe ngɛ nɔ nɛ ji nɔmlɔ ngua ngɛ a kpɛti ɔ he.
35 Enɛ ɔ he ɔ, e hi si nɛ e tsɛ Ni Nyɔngma Kɛ Enyɔ ɔmɛ nɛ e de mɛ ke: “Ke nɔ ko suɔ kaa e ye kekleekle blɔ he ɔ, e sa nɛ e pee nyɛ tsuo nyɛ sekpɛlɔ kɛ nyɛ tsuo nyɛ sɔmɔlɔ.”
36 Kɛkɛ nɛ e ngɔ jokuɛ nyafii ko, nɛ e ngɔ lɛ kɛ ba da si ngɛ a kpɛti; nɛ benɛ e ngɔ e nine kɛ fɔ e kuɛ mi ɔ, e de mɛ ke:
37 “Nɔ fɛɛ nɔ nɛ e ma ha jokuɛwi kaa kikɛ nɛ ɔmɛ a kpɛti nɔ kake hɛ mi ngɛ ye biɛ ɔ he je ɔ, e ha imi hu hɛ mi; nɛ nɔ fɛɛ nɔ nɛ e ma ha mi hɛ mi ɔ, pi imi pɛ hɛ mi nɛ e ha, se e ha Nɔ nɛ e tsɔ mi ɔ hu hɛ mi.”
38 Yohane de lɛ ke: “Tsɔɔlɔ, wa na nɔ ko nɛ e ngɔ o biɛ kɛ ngɛ daimoniohi hiae nɛ wa bɔ mɔde kaa wa maa tsi lɛ blɔ, ejakaa e nyɛɛ we wa se.”
39 Se Yesu de ke: “Nyɛ ko bɔ mɔde kaa nyɛ maa tsi lɛ blɔ, ejakaa nɔ ko be nɛ e ma tsu he wami ní tsumi ko ngɛ ye biɛ mi nɛ e kɛ oya yemi ma nyɛ maa tu ye he munyu yayami.
40 Ejakaa nɔ fɛɛ nɔ nɛ e ti si wui wɔ ɔ, e ngɛ wa blɔ fa mi.
41 Nɛ nɔ fɛɛ nɔ nɛ e ma ha nyɛ nyu kplu kake kaa nyɛɛ nu akɛnɛ Kristo nihi ji nyɛ he je ɔ, i ngɛ nyɛ dee ngɛ anɔkuale mi ke, e hiɔwo be lɛ bɔe kɔkɔɔkɔ.
42 Se nɔ fɛɛ nɔ nɛ e maa tɔ̃tɔ̃ ni nyafii nɛ ɔmɛ nɛ a ngɛ hemi kɛ yemi ɔmɛ a ti nɔ kake nane ɔ, afani nɛ a fĩ wɛ tɛ nɛ teji kɛ wɛɛɔ nɔ́ ɔ ngɔ wo e kuɛ, nɛ a ya sake lɛ ngɔ fɔ wo ɔ mi.
43 “Ke e ba kaa o nine ha nɛ o nane ngɛ tɔ̃tɔ̃e ɔ, poo ngɔ fɔ he. Afani nɛ o kɛ nine kake maa sɛ wami mi pe nɛ o kɛ nine enyɔ maa ya Gehena,* ngɛ la nɛ a be nyɛe maa gbe ɔ mi.
44 ——
45 Nɛ ke o nane ha nɛ o nane ngɛ tɔ̃tɔ̃e ɔ, poo ngɔ fɔ he. Afani nɛ o kɛ nane kake maa sɛ wami mi pe nɛ o ngɛ nane enyɔ nɛ a ma sake mo ngɔ fɔ Gehena.*
46 ——
47 Nɛ ke o hɛ ngmɛ ha nɛ o nane ngɛ tɔ̃tɔ̃e ɔ, sake ngɔ fɔ he. Afani nɛ o kɛ hɛ ngmɛ kake maa sɛ Mawu Matsɛ Yemi ɔ mi pe nɛ o ngɛ hɛ ngmɛ enyɔ nɛ a ma sake mo ngɔ fɔ Gehena,*
48 he nɛ gɔgɔ gbo we ngɛ nɛ a gbi la a hulɔ ɔ.
49 “Ejakaa a maa ngɔ la kɛ wo nɔ fɛɛ nɔ ngo.
50 Ngo hi, se ke ngo nya nyu gbo ɔ, mɛni a kɛ ma ha nɛ e doo ekohu? Nyɛ ha nɛ ngo nɛ hi nyɛ mi, nɛ nyɛɛ kɛ nyɛ sibi nɛ hi si ngɛ tue mi jɔmi mi daa.”
Sisi Ningmahi
^ E ma nyɛ maa pee kaa “ma a nya ngɔ to munyu ɔ nɔ.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
