Manyadali 13:1-25
13 Israel bi ɔmɛ kpale pee ní yayamihi ngɛ Yehowa hɛ mi ekohu, nɛ Yehowa ngɔ mɛ kɛ wo Filisti bi ɔmɛ a dɛ mi jeha 40.
2 Jamɛ a be ɔ mi ɔ, nyumu ko ngɛ Zora nɛ́ e je Dan bi ɔmɛ a weku ɔ mi nɛ a tsɛɛ lɛ ke Manoa. E yo ɔ ji yosa, nɛ e be bi.
3 Pee se ɔ, Yehowa bɔfo ko je e he kpo kɛ tsɔɔ yo ɔ nɛ e de lɛ ke: “Hyɛ, yosa ji mo, nɛ o be bi. Se o maa ngɔ hɔ nɛ o ma fɔ binyumu.
4 Lɔ ɔ he ɔ, hyɛ nɛ hi nɛ o ko nu wai aloo dã nɛ nya wa ko, nɛ koo ye nɔ́ ko nɛ he tsɔ we hulɔ.
5 Hyɛ! O maa ngɔ hɔ nɛ o ma fɔ binyumu, nɛ yi sɛmi ha ko nɛ ko ya e yi mi, ejakaa jokuɛ ɔ maa pee Nazir no ha Mawu kɛ je e fɔmi* mi, nɛ e maa nyɛɛ hɛ mi kɛ he Israel yi wami kɛ je Filisti bi ɔmɛ a dɛ mi.”
6 Kɛkɛ nɛ yo ɔ ho nɛ e ya de e huno ɔ ke: “Anɔkuale Mawu ɔ nɔmlɔ ko ba ye ngɔ, nɛ e ngɛ kaa anɔkuale Mawu ɔ bɔfo, e he ngɛ gbeye wawɛɛ. I bi we lɛ he nɛ e je, nɛ lɛ hu e tsɔɔ we mi e biɛ.
7 Se e de mi ke, ‘Hyɛ! O maa ngɔ hɔ nɛ o ma fɔ binyumu. Lɔ ɔ he ɔ, koo nu wai aloo dã nɛ nya wa ko, nɛ koo ye nɔ́ ko nɛ he tsɔ we hulɔ, ejakaa jokuɛ ɔ maa pee Nazir no ha Mawu kɛ je e fɔmi* mi kɛ yaa si ligbi nɛ e ma gbo.’”
8 Manoa kpa Yehowa pɛɛ nɛ e de lɛ ke: “I kpa mo pɛɛ, Yehowa. I kpa mo pɛɛ nɛ o ha nɛ anɔkuale Mawu ɔ nɔmlɔ ɔ nɛ o tsɔ lɛ piɔ ɔ nɛ kpale kɛ ba ekohu nɛ́ e ba tsɔɔ wɔ bɔ nɛ e sa kaa waa hɛɛ jokuɛ ɔ nɛ a ma fɔ ɔ ha.”
9 Enɛ ɔ he ɔ, anɔkuale Mawu ɔ bu Manoa tue, nɛ anɔkuale Mawu ɔ bɔfo ɔ kpale kɛ ba yo ɔ ngɔ ekohu benɛ e hii si ngɛ nga a nɔ ɔ; e huno Manoa be e kasa nya.
10 Lɔ ɔ he ɔ, yo ɔ tu fo esɔesɔ nɛ e ya de e huno ɔ ke: “Hyɛ! Nyumu ɔ nɛ e ba ye ngɔ lingmi ɔ je e he kpo kɛ tsɔɔ mi.”
11 Kɛkɛ nɛ Manoa te si nɛ e kɛ e yo ɔ ho. E ba su nyumu ɔ ngɔ nɛ e bi lɛ ke: “Anɛ mo ji nyumu ɔ nɛ e kɛ ye yo ɔ tu munyu ɔ lo?” E de ke: “Ee, imi.”
12 Kɛkɛ nɛ Manoa de ke: “O munyu ɔmɛ nɛ ba mi! Kɛ jokuɛ ɔ maa ba e je mi ha kɛɛ, nɛ mɛni e ma ba tsu?”
13 Lɔ ɔ he ɔ, Yehowa bɔfo ɔ de Manoa ke: “E sa nɛ o yo ɔ nɛ yu e he kɛ je nɔ́ fɛɛ nɔ́ nɛ i de lɛ ɔ he.
14 E sɛ nɛ e ye nɔ́ ko nɛ jeɔ wai tso mi, e sɛ nɛ e nu wai aloo dã nɛ nya wa ko, nɛ e sɛ nɛ e ye nɔ́ ko nɛ he tsɔ we hulɔ. Nɔ́ fɛɛ nɔ́ nɛ i fã lɛ kaa e pee ɔ, ha nɛ e pee.”
15 Jehanɛ ɔ, Manoa de Yehowa bɔfo ɔ ke: “I kpa mo pɛɛ nɛ o mlɛ nɛ waa ngɔ apletsi wayoo kɛ pee niye ní ha mo.”
16 Se Yehowa bɔfo ɔ de Manoa ke: “Ke i mlɛ po ɔ, i be o niye ní ɔ yee; se ke o suɔ kaa o maa sã sami afɔle ha Yehowa a, o ma nyɛ maa sã.” Manoa li kaa e ji Yehowa bɔfo.
17 Kɛkɛ nɛ Manoa bi Yehowa bɔfo ɔ ke: “Kɛ a tsɛɛ mo kɛɛ, konɛ ke o munyu ɔ ba mi ɔ, waa wo o hɛ mi nyami?”
18 Se Yehowa bɔfo ɔ de lɛ ke: “Mɛni he je nɛ o ngɛ mi ye biɛ bie? E ji nyakpɛ biɛ.”
19 Kɛkɛ nɛ Manoa ngɔ apletsi wayoo ɔ, kɛ ngma afɔle ɔ nɛ e kɛ sã afɔle ngɛ tɛ sa a nɔ ha Yehowa. Nɛ Mawu ngɛ nyakpɛ nɔ́ ko pee nɛ Manoa kɛ e yo ɔ ngɛ hyɛe.
20 Benɛ la lilɛ ɔ nɛ je afɔle sami la tɛ ɔ nɔ ɔ ngɛ hiɔwe yae ɔ, Yehowa bɔfo ɔ gu la lilɛ nɛ je afɔle sami la tɛ ɔ nɔ ɔ mi kɛ ho hiɔwe ya be mi nɛ Manoa kɛ e yo ɔ ngɛ hyɛe. Amlɔ nɔuu nɛ a kɛ a hɛ mi bu zugba.
21 Yehowa bɔfo ɔ je we e he kpo kɛ tsɔɔ we Manoa kɛ e yo ɔ hu. Kɛkɛ nɛ Manoa yɔse kaa e ji Yehowa bɔfo.
22 Lɔ ɔ he ɔ, Manoa de e yo ɔ ke: “Wa ma gbo kokooko, ejakaa Mawu lɛ wa na a nɛ.”
23 Se e yo ɔ de lɛ ke: “Ke ji kaa Yehowa ngɛ hlae nɛ e gbe wɔ ɔ, jinɛ e ko he we sami afɔle kɛ ngma afɔle ngɛ wa dɛ, jinɛ e ko tsɔɔ we wɔ ní nɛ ɔmɛ tsuo, nɛ e ko de we wɔ ní nɛ ɔmɛ ekoeko.”
24 Pee se ɔ, yo ɔ fɔ binyumu nɛ e wo lɛ biɛ ke Samson; nɛ benɛ jokuɛ nyumuyo ɔ ngɛ wae ɔ, Yehowa ya nɔ nɛ e jɔɔ lɛ.
25 Pee se ɔ, Yehowa mumi ɔ bɔni lɛ he wami womi ngɛ Mahane Dan, nɛ ngɛ Zora kɛ Eshtaol a kpɛti ɔ.
