Manyadali 14:1-20
14 Kɛkɛ nɛ Samson kple kɛ ho Timna ya, nɛ e ya na Filisti yo ko* ngɛ Timna.
2 Lɔ ɔ he ɔ, e ho nɛ e ya de e tsɛ kɛ e nyɛ ke: “I na Filisti yo ko ngɛ Timna nɛ ye bua jɔ e he, nɛ i suɔ nɛ nyɛ ya ngɔ lɛ ha mi kaa ye yo.”
3 Se e tsɛ ɔ kɛ e nyɛ ɔ de lɛ ke: “Anɛ o nɛ yo ko ngɛ o weku li ɔmɛ kɛ wa we bi ɔmɛ tsuo a kpɛti lo? Anɛ e sa nɛ o ya ngɔ yo ngɛ Filisti bi mɔmlɔtɔtsɛmɛ nɛ ɔmɛ a kpɛti lo?” Se Samson de e tsɛ ɔ ke: “Yaa ngɔ lɛ ha mi, ejakaa lɛ nɛ e muɔ ye hɛ.”
4 E tsɛ kɛ e nyɛ li tete kaa nɔ́ nɛ ɔ je Yehowa ngɔ, ejakaa e* ngɛ Filisti bi ɔmɛ a he blɔ hlae akɛnɛ jamɛ a be ɔ mi ɔ, Filisti bi ɔmɛ ngɛ Israel nɔ yee ɔ he je.
5 Lɔ ɔ he ɔ, Samson kɛ e tsɛ ɔ kɛ e nyɛ ɔ kple kɛ ho Timna ya. Benɛ Samson su Timna wai ngmɔ ɔmɛ a mi ɔ, hyɛ! jata ko* ngɛ huãe kɛ ma e ngɔ.
6 Kɛkɛ nɛ Yehowa mumi ɔ wo lɛ he wami, nɛ e fɛ jata a mi enyɔ kaa bɔ nɛ nɔ ko ngɔɔ e nine kɛkɛ kɛ fɛɔ apletsi wayoo mi enyɔ ɔ. Se e de we e tsɛ ɔ aloo e nyɛ ɔ nɔ́ nɛ e pee ɔ.
7 Kɛkɛ nɛ e kple kɛ ho nɛ e kɛ yo ɔ ya tu munyu. Loloolo ɔ, lɛ ji nɔ nɛ muɔ Samson hɛ.
8 Pee se benɛ e kpale kɛ yaa konɛ e ya ngɔ yo ɔ kɛ ho we mi ya a, e gba kɛ ya hyɛ jata gbogboe ɔ, nɛ e ya na hwohi a kuu nɛ a to hwo ngɛ jata gbogboe ɔ mi.
9 Lɔ ɔ he ɔ, e nyla hwo ɔ kɛ wo e dɛ mi, nɛ e ngɛ yee kɛ ngɛ nyɛɛe. Benɛ e ya ná e tsɛ ɔ kɛ e nyɛ ɔ, e ha mɛ eko kaa a ye. Se e de we mɛ kaa e nyla hwo ɔ kɛ je jata gbogboe ko mi.
10 E tsɛ ɔ kple kɛ ho yo ɔ ngɔ ya, nɛ Samson ngmɛ okplɔɔ ngɛ lejɛ ɔ, ejakaa lɔ ɔ ji nɔ́ nɛ nihewi ɔmɛ pɔɔ peemi.
11 Benɛ a na lɛ ɔ, a ngɔ nyumuhi 30 kɛ ba ha lɛ kaa ayɛflo huno ɔ huɛmɛ nɛ́ a ba piɛɛ e he.
12 Kɛkɛ nɛ Samson de mɛ ke: “I kpa nyɛ pɛɛ, nyɛ ha nɛ ma sia nyɛ ajo ko. Ke nyɛ na nya, nɛ nyɛ tsɔɔ mi sisi ngɛ okplɔɔ ngmɛmi ligbi kpaago nɛ ɔmɛ a mi ɔ, ma ha nyɛ klala tadehi 30 kɛ he dlami tadehi 30.
13 Se ke nyɛ nyɛ we nɛ nyɛɛ tsɔɔ mi sisi ɔ, lɛɛ nyɛ ma ha mi klala tadehi 30 kɛ he dlami tadehi 30.” A de ke: “Moo sia wɔ o we ajo ɔ; wa suɔ nɛ waa nu.”
14 Kɛkɛ nɛ e de mɛ ke:
“Nɔ́ ko nɛ a yeɔ je ní yelɔ ɔ mi,Nɛ nɔ́ ngɔngɔɛ ko je he walɔ ɔ mi.”
Ligbi etɛ ba be nɛ a nyɛ we nɛ a tsɔɔ ajo ɔ sisi.
15 Ligbi eywiɛne ɔ nɔ ɔ, a de Samson yo ɔ ke: “Moo gbe o huno ɔ yi mi konɛ e tsɔɔ wɔ ajo ɔ sisi. Ke pi jã a, waa kɛ la maa sã mo kɛ o tsɛ we ɔ. Anɛ o fɔ wɔ nine kɛ ba hiɛ ɔ konɛ o ba ngɔ wa níhi ngɛ wa dɛ lo?”
16 Enɛ ɔ he ɔ, Samson yo ɔ fo ya pue e nɔ, nɛ e de ke: “I na kaa o ngɛ ye he ninyɛ; o sume mi. O sia ye we bi ɔmɛ ajo, se o tsɔɔ we mi sisi.” Kɛkɛ nɛ Samson de lɛ ke: “Hyɛ, imi nitsɛ ye tsɛ kɛ ye nyɛ po i tsɔɔ we mɛ sisi! Anɛ e sa nɛ ma tsɔɔ mo sisi lo?”
17 Se yo ɔ ya nɔ nɛ e fo ya pue e nɔ ngɛ ligbi nɛ piɛ ngɛ okplɔɔ ngmɛmi ligbi kpaago ɔmɛ a mi. Nyagbenyagbe ɔ, Samson tsɔɔ lɛ sisi ngɛ ligbi kpaagone ɔ nɔ, ejakaa yo ɔ ngɛ lɛ haoe tsɔ. Kɛkɛ nɛ e ya tsɔɔ e we bi ɔmɛ ajo ɔ sisi.
18 Enɛ ɔ he ɔ, ligbi kpaagone ɔ nɔ ɔ, loko pu maa nɔ si ɔ,* ma a mi nyumu ɔmɛ de Samson ke:
“Mɛni ngɔɔ pe hwo,Nɛ mɛni ngɛ he wami pe jata?”
E ha mɛ heto ke:
“Kaa nyɛɛ kɛ ye na bi ɔ ya hu we ɔ,Jinɛ nyɛ ko nyɛ we ye we ajo ɔ sisi tsɔɔmi.”
19 Kɛkɛ nɛ Yehowa mumi ɔ wo lɛ he wami, nɛ e kple kɛ ya Ashkelon nɛ e ya gbe a nyumu ɔmɛ a kpɛti nihi 30, nɛ e ngɔ a tade ɔmɛ, nɛ e kɛ a he dlami tade ɔmɛ ba ha nihi nɛ a tsɔɔ ajo ɔ sisi ɔ. Benɛ e kpale kɛ yaa e tsɛ we ɔ, e mi mi fu wawɛɛ.
20 Nɛ a ngɔ Samson yo ɔ kɛ ha nyumuhi nɛ a ba piɛɛ e he kaa ayɛflo huno ɔ huɛmɛ ɔmɛ a ti nɔ kake.
Sisi Ningmahi
^ Ngɛ Hebri gbi mi ɔ, “Filisti bi ɔmɛ a biyi ɔmɛ a ti nɔ kake.”
^ Eko ɔ, “e” ɔ daa si kɛ ha Mawu.
^ Aloo “jata ku wayoo ko kɛ e kuɛ he bwɔmi.”
^ Baiblo komɛ de ke, “loko e ma ya sɛ se tsu ɔ mi ɔ.”
