Manyadali 5:1-31
5 Jamɛ a ligbi ɔ, Debora kɛ Barak, Abinoam binyumu ɔ la la nɛ ɔ:
2 “Akɛnɛ tatsɛmɛ ngmɛɛ a yi bwɔmi he ngɔ pue a nɔ ngɛ Israel he je ɔ,Akɛnɛ nihi ngɔ a he kɛ ha he je ɔ,Nyɛ je Yehowa yi!
3 Nyɛ matsɛmɛ, nyɛɛ bu tue! Nyɛ nɔ yeli, nyɛ ta tue!
Ma la kɛ ha Yehowa.
Ma la yi jemi lahi* kɛ ha Yehowa, Israel Mawu ɔ.
4 Yehowa, benɛ o je kpo kɛ je Seir,Benɛ o bɔ sala kɛ je Edom zugba kpɔ ɔ mi ɔ,Zugba a mimiɛɛ, nɛ hiɔwe nɛ nyu kɛ pue si,Bɔku ɔmɛ nɛ nyu kɛ pue si.
5 Yokuhi sile* ngɛ Yehowa hɛ mi,Sinai po sile ngɛ Yehowa, Israel Mawu ɔ hɛ mi.
6 Ngɛ Shamgar, Anat binyumu ɔ wami ligbi ɔmɛ a mi ɔ,Ngɛ Yael wami ligbi ɔmɛ a mi ɔ, gbɛjegbɛ ɔmɛ a nɔ fɔɔ si gu;Blɔ hiali ya guɔ blɔ kpahi a nɔ.
7 Nihi nɛ a ngɛ Israel kɔpe ɔmɛ a mi ɔ be hu;A be hu kɛ ya si be nɛ imi Debora i te si,Kɛ ya si be nɛ i te si kaa binyɛ ngɛ Israel.
8 A hla mawu ehehi;Kɛkɛ nɛ ta te si ngɛ agbo ɔmɛ a mi.
A nɛ tsɛ̃i ko, aloo akplɔ koNgɛ Israel bi 40,000 a kpɛti.
9 Ye tsui fĩ Israel ta buli a nyatsɛ ngua amɛNɛ́ a ngɔ a he kɛ ha nɛ a kɛ ni ɔmɛ ya a se.
Nyɛ je Yehowa yi!
10 Nyɛ nihi nɛ nyɛ hiɔ tejihi nɛ a hɛɛ ba gbigbli su nɔ,Nyɛ nihi nɛ nyɛ hiɔ si ngɛ kapɛti kpakpahi a nɔ,Kɛ nyɛ nihi nɛ nyɛ nyɛɛɔ ngɛ gbɛjegbɛ nɔ ɔ,Nyɛ susu he!
11 A nu nyu sali ɔmɛ a gbi ngɛ lohwehi a nyu hami he ɔmɛ;A ngɛ Yehowa dami ní peepee ɔmɛ a he munyu tue ngɛ lejɛ ɔ,Dami níhi nɛ e we bi nɛ a ngɛ Israel kɔpe ɔmɛ a mi ɔ pee ɔ.
Kɛkɛ nɛ Yehowa we bi ɔmɛ kple kɛ ya agbo ɔmɛ a nya.
12 O hɛ nɛ tsɛ̃, o hɛ nɛ tsɛ̃, Oo Debora!
O hɛ nɛ tsɛ̃, o hɛ nɛ tsɛ̃, mo la la ko!
Tee si, Barak! Mo Abinoam binyumu, nyɛɛ o nyɔguɛ ɔmɛ a hɛ mi kɛ ho!
13 Kɛkɛ nɛ ni nɛmɛ nɛ piɛ ɔ kple kɛ ho odehe ɔmɛ a ngɔ ya;Yehowa we bi ɔmɛ kple kɛ ba ye ngɔ konɛ a kɛ he wali ɔmɛ nɛ hwu ta.
14 Ni nɛmɛ nɛ a ngɛ dɔgba a mi ɔ, Efraim ji he nɛ a je;Oo Benyamin, a ngɛ o se nyɛɛe ngɛ o we bi ɔmɛ a kpɛti.
Ta buli a nyatsɛ ngua amɛ kple kɛ je Makir kɛ ho,Nɛ ta buli a biɛ ngmalɔ ɔ tso hɛɛli* ɔmɛ je Zebulun kɛ ho.
15 Matsɛ binyumuhi nɛ a ngɛ Isakar a piɛɛ Debora he,Kaa bɔ nɛ Isakar ngɛ ɔ, jã nɛ Barak ngɛ.
A tsɔ lɛ konɛ e nyɛɛ kɛ ya dɔgba a mi ngɛ nga a nɔ.
Reuben wɛtso ɔ hla a tsui mi wawɛɛ.
16 Mɛni he je nɛ o hi si ngɛ lohwe se mi baagi enyɔ a kpɛti,Nɛ o ngɛ bɛhi nɛ a ngɛ kpãe kɛ ngɛ a to kuu ɔmɛ hae ɔ tue bue ɔ?
Ejakaa Reuben wɛtso ɔ hla a tsui mi wawɛɛ.
17 Gilead tlɔ Yordan Pa a se;Nɛ Dan hu, mɛni he je nɛ e tlɔ mele ɔmɛ a he ɔ?
Asher hii si ngɛ wo ɔ nya nɛ́ e pee we nɔ́ ko,Nɛ e tlɔ e mele si dami he ɔmɛ.
18 Zebulun ji nihi nɛ a ngɔ a wami* kɛ wo oslaa mi kɛ ya su gbenɔ muɔ nya;Naftali hu pee jã ngɛ yoku ɔmɛ a nɔ.
19 Matsɛmɛ ba, nɛ a ba hwu ta;Kɛkɛ nɛ Kanaan matsɛmɛ ɔmɛ hwu taNgɛ Taanak, ngɛ Megido nyu ɔmɛ a nya.
A ngɔɛ sika hiɔ ko kaa ta yibu ní.
20 Dodoe ɔmɛ hwu kɛ je hiɔwe;Kɛ je a blɔ ɔmɛ a nɔ ɔ, a hwu kɛ si Sisera.
21 Kishon dɔ ɔ muɔɔ mɛ kɛ ho,Blema dɔ ɔ, Kishon dɔ ɔ.
Oo ye klaa,* o naa he wali ɔmɛ a nɔ.
22 Kɛkɛ nɛ okpɔngɔhi a nane koklotohi ngɛ si sieBe mi nɛ e ta hwumi okpɔngɔhi ngɛ tuue glɛi glɛi wawɛɛ ɔ.
23 Yehowa bɔfo ɔ de ke, ‘Nyɛɛ gbiɛ Meroz,Ee, nyɛɛ gbiɛ nihi nɛ a ngɛ e mi ɔ,Ejakaa a bɛ nɛ a ba ye bua Yehowa,A bɛ nɛ a ba piɛɛ he wali ɔmɛ a he kɛ ye bua Yehowa.’
24 Yo nɛ a jɔɔ lɛ pe kulaa ngɛ yihi a kpɛti ji Yael,Ken no Heber yo ɔ;Lɛ ji yo nɛ a jɔɔ lɛ pe kulaa ngɛ yihi nɛ a ngɛ bo tsuhi a mi ɔ a kpɛti.
25 Sisera bi lɛ nyu, se e ha lɛ nyɔ nyu.
E ha lɛ nyɔ nyu nɛ mi ti ngɛ ní yemi tsesi saminyayoo ko mi.
26 E kpã e nine mi nɛ e wo bo tsu plɛɛko,E kɛ e hiɔ nine wo ní tsulɔ hamle.
Nɛ e kɛ fia Sisera, nɛ e ywia e yi,Nɛ e ka kɛ wo e yi mi, nɛ e gbu* kɛ sɛ mi.
27 Sisera hɛli ngɛ e nane kpɛ; e nɔ si nɛ e mimiɛɛ we e he;E hɛli nɛ e nɔ si ngɛ e nane kpɛ;He nɛ e hɛli ngɛ ɔ, lejɛ ɔ nɛ e nɔ si ngɛ, nɛ a ye e nɔ kunimi.
28 Yo ko hyɛ e saflɛ mi,Sisera yayo hyɛ saflɛ mi puɔ ɔmɛ a mi, nɛ e bi ke,‘Mɛni he je nɛ e zugba lɛ ɔ bami ngɛ se kpɛe ɔ?
Mɛni he je nɛ i nui e zugba lɛ ɔmɛ a we okpɔngɔ ɔmɛ a nane kokloto ɔmɛ a he lolo ɔ?’
29 E yihewi odehe ɔmɛ a kpɛti juɛmitsɛ pe kulaa a ma ha lɛ heto;Ee, lɛ nitsɛ hu e maa ti mi kɛ ha e he ke,
30 ‘Eko ɔ, a ngɛ ta yibu ní nɛ a ná a gbae,Tatsɛ fɛɛ tatsɛ ma ná yiheyo* kake, yihewi* enyɔ,Sisera ma ná bo nɛ a wo lɛ tsopa kaa ta yibu ní, bo nɛ a wo lɛ tsopa,Tade nɛ a lo ní kɛ wo mi, bo nɛ a wo lɛ tsopa, tade enyɔ nɛ a lo ní kɛ wo a miKonɛ ní hali ɔmɛ nɛ a kɛ ha a kuɛ mi.’
31 Lɔ ɔ he ɔ, Oo Yehowa, ha nɛ o he nyɛli ɔmɛ tsuo a hɛ mi nɛ kpata,Se ha nɛ ni nɛmɛ nɛ a suɔ mo ɔ nɛ a pee kaa pu nɛ ngɛ si tee ngɛ e hɛ mi nyami ɔ mi.”
Nɛ tue mi jɔmi ba zugba a nɔ jeha 40.
Sisi Ningmahi
^ Aloo “fia la.”
^ Baiblo komɛ de ke, “mimiɛɛ.”
^ Baiblo komɛ de ke, “womi ngmalɔ ní hɛɛli.”
^ Aloo “klaa.”
^ Aloo “gu.”
^ Ngɛ Hebri gbi mi ɔ, “fɔmi kotoku.”
^ Ngɛ Hebri gbi mi ɔ, “fɔmi kotokuhi.”
