Mateo Sane Kpakpa a 15:1-39
15 Lɔ ɔ se ɔ, Farisi bi kɛ womi ngmali je Yerusalɛm kɛ ba Yesu ngɔ nɛ a ba de lɛ ke:
2 “Mɛni he je nɛ o kaseli ɔmɛ nyɛɛ we blematsɛmɛ ɔmɛ a kusumi ɔ se ɔ? Kaa nɔ hyɛmi nɔ́ ɔ, ke a yaa ye ní ɔ, a fɔ* we a dɛ.”
3 E he nɔ nɛ e bi mɛ ke: “Mɛni he je nɛ nyɛ kusumi ɔ ha nɛ nyɛ yi Mawu kita a nɔ ɔ?
4 Kaa nɔ hyɛmi nɔ́ ɔ, Mawu de ke, ‘Buu o tsɛ kɛ o nyɛ,’ nɛ e de hu ke, ‘Ha nɛ a gbe nɔ fɛɛ nɔ nɛ e maa tu e tsɛ loo e nyɛ he munyu yayami* ɔ.’
5 Se nyɛɛ lɛɛ nyɛ deɔ ke, ‘Nɔ fɛɛ nɔ nɛ e deɔ e tsɛ aloo e nyɛ ke: “Nɔ́ fɛɛ nɔ́ nɛ i ngɛ nɛ o ma ná he se ɔ ji nike ní nɛ a jɔɔ nɔ kɛ ha Mawu” ɔ,
6 e he hia we nɛ e bu e tsɛ ɔ kulaa.’ Enɛ ɔ he ɔ, nyɛ ngɔ nyɛ kusumi ɔmɛ kɛ puɛ Mawu munyu ɔ.
7 Nyɛ osatotsɛmɛ, e da blɔ kaa Yesaya gba ngɛ nyɛ he ke:
8 ‘Nimli nɛ ɔmɛ a nya kɛkɛ nɛ a kɛ woɔ ye hɛ mi nyami, se a tsui lɛɛ, e je ye he kɛ ho tsitsaa ya.
9 A yaa nɔ nɛ a jaa mi yaka gu, ejakaa nimli a mlaahi ji níhi nɛ a tsɔɔ.’”
10 Enɛ ɔ he ɔ, e tsɛ asafo kuu ɔ kɛ su e he nɛ e de mɛ ke: “Nyɛɛ bu tue konɛ nyɛɛ nu sisi:
11 Pi nɔ́ nɛ sɛɔ nɔmlɔ nya mi ɔ nɛ bleɔ lɛ, mohu ɔ, nɔ́ nɛ jeɔ e nya mi kɛ baa a lɛ bleɔ lɛ.”
12 Kɛkɛ nɛ kaseli ɔmɛ ba e ngɔ nɛ a ba bi lɛ ke: “Anɛ o le kaa nɔ́ nɛ o de nɛ Farisi bi ɔmɛ nu ɔ tɔ̃tɔ̃ a nane lo?”
13 E ha mɛ heto ke: “Tso fɛɛ tso nɛ pi ye Tsɛ nɛ e ngɛ hiɔwe ɔ nɛ e ma a, a maa hia kɛ fɔ si.
14 Nyɛɛ ngmɛɛ a he. A ji blɔ tsɔɔli nɛ a hɛ ngmɛ yu. Nɛ ke blɔ tsɔɔlɔ nɛ e hɛ ngmɛ yu ngɛ hɛ yuyuilɔ ko blɔ tsɔɔe ɔ, mɛ tsuo a ma ya nɔ muɔ mi.”
15 Petro he nɔ ke: “Moo tsɔɔ wɔ nɔ́ he tomi nɔ́ nɛ ɔ sisi.”
16 Kɛkɛ nɛ e de ke: “Anɛ loloolo ɔ, nyɛ hu nyɛ juɛmi sui níhi a he lo?
17 Anɛ nyɛ li kaa ke nɔ́ ko sɛ nɔ nya mi ɔ, e guɔ nɔ ɔ mi mi nɛ e ya jeɔ kɛ pueɔ niase yami he lo?
18 Se nɔ́ fɛɛ nɔ́ nɛ jeɔ nɔ nya mi kɛ baa a, nɔ tsui mi nɛ e jeɔ, nɛ jamɛ a ní ɔmɛ lɛ bleɔ nɔmlɔ.
19 Kaa nɔ hyɛmi nɔ́ ɔ, tsui ɔ mi lɛ susumi yayamihi, nɔmlɔ gbemihi, gba puɛmihi, ajuama bɔmihi,* jumihi, lakpa odase yemihi, musu bɔmi munyuhi jeɔ kɛ baa.
20 Ní nɛ ɔmɛ ji níhi nɛ bleɔ nɔmlɔ; se ke nɔ ko fɔ* we e dɛ nɛ e ye ní ɔ, lɔ ɔ ble we lɛ.”
21 Benɛ Yesu je lejɛ ɔ, e ya Tiro kɛ Sidon kpokpa a nɔ.
22 Nɛ hyɛ! Foinike yo ko nɛ ngɛ jamɛ a kpokpa a nɔ ɔ ba nɛ e ba kpa lɛ pɛɛ ke: “Nyɔmtsɛ, David Bi, naa mi mɔbɔ. Daimonio ngɛ ye biyo haoe wawɛɛ nitsɛ.”
23 Se e pui yo ɔ nya mi. Lɔ ɔ he ɔ, e kaseli ɔmɛ ba bɔni lɛ pɛɛ kpami ke: “Moo wo lɛ blɔ nɛ e ho, ejakaa e ngɛ ngmlaa kpae kɛ ngɛ wa se nyɛɛe.”
24 E he nɔ ke: “A tsɔ we mi nɔ ko nɔ ko ngɔ kaa ja Israel we jijɔ ɔmɛ nɛ a laa amɛ a ngɔ pɛ.”
25 Se yo ɔ ba nɛ e ba kpla si ngɛ e hɛ mi nɛ e de ke: “Nyɔmtsɛ, moo ye bua mi!”
26 Yesu he nɔ ke: “E dɛ blɔ kaa a ngɔɔ bimɛ ɔmɛ a niye ní ɔ kɛ pueɔ si ha gbe bimɛ.”
27 Yo ɔ de ke: “Ee, Nyɔmtsɛ, se ngɛ anɔkuale mi ɔ, gbe bimɛ ɔmɛ yeɔ niye ní bibli ɔ nɛ jeɔ a nyɔmtsɛmɛ ɔmɛ a we okplɔɔ ɔ nɔ kɛ pueɔ si ɔ.”
28 Kɛkɛ nɛ Yesu ha lɛ heto ke: “Oo yo, o hemi kɛ yemi ɔ kle; e ba mi jã ha mo kaa bɔ nɛ o ngɛ hlae ɔ.” Nɛ kɛ je jamɛ a ngmlɛfia a nɔ kɛ yaa a, e biyo ɔ ná he wami.
29 Benɛ Yesu je lejɛ ɔ, e kpale kɛ ba Galilea Wo ɔ kasa nya, nɛ e kuɔ yoku ɔ nɛ e ya hi si ngɛ lejɛ ɔ.
30 Kɛkɛ nɛ asafo kuu nguahi ba e ngɔ nɛ a ngɔ glɔtsɛmɛ, nihi nɛ kpa ngɛ a he, hɛ yuyuili, nihi nɛ a nyɛ we munyu tumi, kɛ ni kpahi fuu kɛ ba pue e nane nya, nɛ e tsa mɛ.
31 Benɛ asafo kuu ɔ na nɛ nihi nɛ a nyɛ we munyu tumi ngɛ munyu tue, nɛ nihi nɛ kpa ngɛ a he ɔ hu a nɔmlɔ tso ɔ he su, nɛ glɔtsɛmɛ ngɛ nyɛɛe, nɛ hɛ yuyuili ngɛ nɔ́ hyɛe ɔ, a nya kpɛ a he, nɛ a wo Israel Mawu ɔ hɛ mi nyami.
32 Se Yesu tsɛ e kaseli ɔmɛ kɛ ba e ngɔ nɛ e de mɛ ke: “Asafo kuu ɔ he ngɛ mi mɔbɔ pee, ejakaa a kɛ mi hi si ligbi etɛ momo, nɛ a be nɔ́ ko nɛ a maa ye. I sume nɛ ma wo mɛ blɔ kɛ ho kɛ a mi mi hwɔ, ejakaa eko ɔ, a hɛ mi ma ya yu mɛ ngɛ blɔ ɔ nɔ.”
33 Se kaseli ɔmɛ de lɛ ke: “Hiɛmɛ nɛ ɔ tsɔ e he banee, lɛɛ jije wa ma ná niye ní nɛ maa su nimli babauu nɛ ɔ ngɛ?”
34 Kɛkɛ nɛ Yesu de ke: “Abolo enyɛmɛ nɛ nyɛ ngɛ?” A he nɔ ke: “Kpaago, kɛ lo tsɔwi bɔɔ ko.”
35 Lɔ ɔ he ɔ, benɛ e ha nɛ asafo kuu ɔ hi si ngɛ zugba a,
36 e wo abolo kpaago ɔ kɛ lo ɔ, nɛ benɛ e na Mawu si ɔ, e ku a mi nɛ e kɛ bɔni e kaseli ɔmɛ hami, nɛ e kaseli ɔmɛ ngɔ kɛ ha asafo kuu ɔmɛ.
37 Nɛ mɛ tsuo a ye nɛ a tɔ, nɛ a kukuɔ e bibli nɛ piɛ ɔ, nɛ e hyi kusii* nguanguahi kakaaka kpaago tɔtɔɔtɔ.
38 Nihi nɛ a ye ní ɔ, a yibɔ maa pee nyumuhi 4,000, e slo yihi kɛ jokuɛwi.
39 Lɔ ɔ se ɔ, benɛ e wo asafo kuu ɔ blɔ ɔ, e sɛ lɛ ɔ mi nɛ e ba Magadan kpokpa a nɔ.
Sisi Ningmahi
^ Nɛ tsɔɔ kaa a he tsɔ we ngɛ kusumi nya.
^ Aloo “e ma jɛ e nyɛ loo e tsɛ.”
^ Hela munyungu nɛ ji porneiʹa a hiɛhiɛɛ peemi. Hyɛ Munyu Komɛ A Sisi Tsɔɔmi.
^ Nɛ tsɔɔ kaa e he tsɔ we ngɛ kusumi nya.
^ Aloo “kɛtɛ.”
