Mateo Sane Kpakpa a 18:1-35
18 Jamɛ a ngmlɛfia a mi ɔ, kaseli ɔmɛ ba Yesu ngɔ nɛ a ba bi lɛ ke: “Mɛnɔ tutuutu ji nɔmlɔ ngua pe kulaa ngɛ hiɔwe Matsɛ Yemi ɔ mi?”
2 Kɛkɛ nɛ e tsɛ jokuɛ nyafii ko kɛ ba e ngɔ, nɛ e ngɔ lɛ kɛ ba da si ngɛ a kpɛti
3 nɛ e de mɛ ke: “I ngɛ nyɛ dee ngɛ anɔkuale mi kaa ke nyɛ tsakee we nɛ nyɛɛ pee kaa jokuɛ tsɔwi ɔ, nyɛ be hiɔwe Matsɛ Yemi ɔ mi sɛe gblegbleegble.
4 Enɛ ɔ he ɔ, nɔ fɛɛ nɔ nɛ e maa ba e he si kaa jokuɛ nyafii nɛ ɔ, lɛ ji nɔmlɔ ngua pe kulaa ngɛ hiɔwe Matsɛ Yemi ɔ mi;
5 nɛ nɔ fɛɛ nɔ nɛ e ma ha jokuɛ nyafii kaa kikɛ nɛ ɔ hɛ mi ngɛ ye biɛ ɔ he je ɔ, imi hɛ mi e ha a nɛ.
6 Se nɔ fɛɛ nɔ nɛ e maa tɔ̃tɔ̃ ni nyafii nɛ ɔmɛ nɛ a ngɛ hemi kɛ yemi ngɛ ye mi ɔmɛ a ti nɔ kake nane ɔ, afani nɛ e fĩ wɛ tɛ nɛ teji kɛ wɛɛɔ nɔ́ ɔ ngɔ wo e kuɛ, nɛ a ya ngmɛɛ e he kɛ fɔ wo ɔ kpɛti.
7 “Musu tloo je ɔ ngɛ níhi nɛ tɔ̃tɔ̃ɔ nɔ nane ɔmɛ a he je! Ngɛ anɔkuale mi ɔ, níhi nɛ tɔ̃tɔ̃ɔ nɔ nane maa ba, se nɔmlɔ nɛ e nɔ lɛ nɔ́ nɛ tɔ̃tɔ̃ɔ nɔ nane ɔ maa gu kɛ ba a, musu tloo lɛ!
8 Enɛ ɔ he ɔ, ke o nane aloo o nine ha nɛ o nane ngɛ tɔ̃tɔ̃e ɔ, poo nɛ o sake ngɔ fɔ he. Afani nɛ o kɛ nine kake loo nane kake maa sɛ wami mi pe nɛ o ngɛ nine enyɔ loo nane enyɔ nɛ a ma sake mo ngɔ fɔ neneene la a mi.
9 Jehanɛ hu ɔ, ke o hɛ ngmɛ ha nɛ o nane ngɛ tɔ̃tɔ̃e ɔ, ta nɛ o sake ngɔ fɔ he. Afani nɛ o kɛ hɛ ngmɛ kake maa sɛ wami mi pe nɛ o ngɛ hɛ ngmɛ enyɔ nɛ a ma sake mo ngɔ fɔ Gehena* kɛ e mi la nɛ ngɛ tsoe ɔ mi.
10 Nyɛɛ hyɛ nɛ hi nɛ nyɛ ko ha nɛ ni nyafii nɛ ɔmɛ a ti nɔ ko he nɛ pee nyɛ tai, ejakaa i ngɛ nyɛ dee ke be fɛɛ be ɔ, a bɔfohi nɛ a ngɛ hiɔwe ɔ ngɛ ye Tsɛ nɛ e ngɛ hiɔwe ɔ hɛ mi hyɛe.
11 ——
12 “Kɛ nyɛ susu kɛɛ? Ke nyumu ko ngɛ jijɔ 100 nɛ kake laa a, anɛ e be 99 ɔ sie ngɛ yoku ɔmɛ a nɔ nɛ e sɛ mi konɛ e ya hla nɔ́ nɛ laa a lo?
13 Nɛ ke e na lɛ ɔ, ngɛ anɔkuale mi ɔ, i ngɛ nyɛ dee ke, e nyaa ngɛ lɔ ɔ he kulaa pe 99 nɛ a laa we ɔ he.
14 Jã kɛ̃ nɛ ye* Tsɛ nɛ ngɛ hiɔwe ɔ sume kaa ni nyafii nɛ ɔmɛ a kpɛti nɔ kake hɛ mi nɛ kpata.
15 “Jehanɛ se hu ɔ, ke o nyɛmi pee mo yayami ko ɔ, yaa nɛ o ya ha nɛ e na e tɔmi ɔ,* o kɛ lɛ pɛ. Ke e bu mo tue ɔ, kɛkɛ nyɛmi pee nyɛmi.
16 Se ke e bui mo tue ɔ, ngɔɔ nɔ kake aloo ni enyɔ kɛ piɛɛ o he kɛ ya, konɛ ngɛ odase yeli enyɔ aloo etɛ a nya mi munyu nya a, nyɛ nyɛ nɛ nyɛɛ ma sane tsuaa sane nya si.
17 Ke e bui mɛ tue ɔ, yaa bɔ asafo ɔ. Nɛ ke e bui asafo ɔ hu tue ɔ, buu jamɛ a nɔmlɔ ɔ kaa nɔ ko nɛ e je je ma amɛ a mi, kɛ tó tsulɔ.
18 “I ngɛ nyɛ dee ngɛ anɔkuale mi ke, nɔ́ fɛɛ nɔ́ nɛ eko ɔ, nyɛ maa fĩ ngɛ zugba a nɔ ɔ maa pee nɔ́ ko nɛ a fĩ momo ngɛ hiɔwe, nɛ nɔ́ fɛɛ nɔ́ nɛ eko ɔ, nyɛ maa pɛne ngɛ zugba a nɔ ɔ maa pee nɔ́ nɛ a pɛne momo ngɛ hiɔwe.
19 Jehanɛ se hu ɔ, i ngɛ nyɛ dee ngɛ anɔkuale mi kaa ke nyɛ kpɛti ni enyɔ pee a nya kake ngɛ zugba a nɔ ngɛ nɔ́ ko nɛ e he hia he, nɛ a bi ɔ, ye Tsɛ nɛ e ngɛ hiɔwe ɔ maa pee ha mɛ.
20 Ejakaa he nɛ ni enyɔ loo ni etɛ bua a he nya ngɛ ngɛ ye biɛ mi ɔ, i ngɛ a kpɛti ngɛ lejɛ ɔ.”
21 Kɛkɛ nɛ Petro ba nɛ e ba bi lɛ ke: “Nyɔmtsɛ, si enyɛmɛ lɛ ke ye nyɛmi tɔ̃ ye nɔ ɔ, e sa kaa ma ngɔ kɛ pa lɛ? Kɛ ya si si kpaago lo?”
22 Yesu de lɛ ke: “I ngɛ mo dee ke, pi si kpaago, mohu ɔ, kɛ ya si si 77.
23 “Enɛ ɔ he ɔ, a ma nyɛ maa ngɔ hiɔwe Matsɛ Yemi ɔ kɛ to matsɛ ko nɛ e suɔ kaa e maa hyɛ e nyɔguɛ ɔmɛ a we akɔtaa mi ɔ he.
24 Benɛ e bɔni a we akɔtaa a mi hyɛmi ɔ, a ngɔ nyumu ko kɛ ba e ngɔ. Nyumu ɔ hɛɛ lɛ hiɔ talɛnt 10,000.*
25 Se akɛnɛ e be sika nɛ e kɛ maa wo hiɔ ɔ he je ɔ, e nyɔmtsɛ ɔ fã ke a jua lɛ, kɛ e yo, kɛ e bimɛ, kɛ níhi tsuo nɛ e ngɛ ɔ konɛ a kɛ wo hiɔ ɔ.
26 Kɛkɛ nɛ nyɔguɛ ɔ kpla si ngɛ e hɛ mi, nɛ e kpa lɛ pɛɛ ke, ‘Ná tsui ha mi, ma wo mo hiɔ ɔ tsuo.’
27 Nyɔguɛ ɔ he pee matsɛ ɔ mɔbɔ, nɛ e ngmɛɛ e he, nɛ e ngɔ hiɔ ɔ kɛ ke lɛ.
28 Se jamɛ a nyɔguɛ ɔ je kpo nɛ e ya na e nyɛmimɛ nyɔguɛ ɔmɛ a kpɛti nɔ kake nɛ e hɛɛ lɛ hiɔ denario 100, nɛ e nu lɛ nɛ e bɔni e kuɛ si pɔtɔmi, nɛ e ngɛ lɛ dee ke, ‘Wo mi hiɔ nɛ o hɛɛ mi ɔ.’
29 Lɔ ɔ he ɔ, e nyɛmi nyɔguɛ ɔ kpla si nɛ e bɔni lɛ pɛɛ kpami ke, ‘Ná tsui ha mi, ma wo mo hiɔ ɔ.’
30 Se e kplɛɛ we, mohu ɔ, e ha nɛ a wo lɛ tsu kɛ yaa si be nɛ e maa wo hiɔ nɛ e hɛɛ lɛ ɔ.
31 Benɛ e nyɛmimɛ nyɔguɛ ɔmɛ na nɔ́ nɛ ya nɔ ɔ, a hao wawɛɛ, nɛ a ya nɛ a ya bɔ a nyɔmtsɛ ɔ nɔ́ fɛɛ nɔ́ nɛ ba a.
32 Kɛkɛ nɛ e nyɔmtsɛ ɔ tsɛ lɛ kɛ ba e ngɔ, nɛ e de le ke: ‘Nyɔguɛ yayami, akɛnɛ o kpa mi pɛɛ he je ɔ, i ngɔ hiɔ nɛ o hɛɛ mi ɔ tsuo kɛ ke mo.
33 Anɛ e sɛ kaa mo hu o naa o nyɛmi nyɔguɛ ɔ mɔbɔ kaa bɔ nɛ i na mo mɔbɔ ɔ lo?’
34 Enɛ ɔ ha nɛ e nyɔmtsɛ ɔ mi mi fu wawɛɛ nitsɛ, nɛ e ngɔ lɛ kɛ ha nihi nɛ a woɔ nɔ tsu ɔ kɛ yaa si be nɛ e maa wo hiɔ ɔ tsuo.
35 Ke nyɛ ti nɔ ko ji e tsui mi nɛ e ngɔ e nyɛmi tɔmi kɛ pa lɛ ɔ, kikɛ nɛ ɔ nɔuu nɛ ye Tsɛ nɛ e ngɛ hiɔwe ɔ hu maa pee lɛ.”
Sisi Ningmahi
^ Hyɛ Munyu Komɛ A Sisi Tsɔɔmi.
^ E ma nyɛ maa pee, “nyɛ.”
^ Hela, “kã e hɛ mi.”
^ Sika hiɔ talɛnt 10,000 peeɔ denario 60,000,000. Hyɛ Munyu Komɛ A Sisi Tsɔɔmi.
