Mateo Sane Kpakpa a 6:1-34
6 “Nyɛɛ hyɛ nɛ hi nɛ nyɛ ko pee nyɛ dami ní ɔmɛ ngɛ nimli a hɛ mi konɛ a na nyɛ; ke nyɛ peeɔ jã a, nyɛ be hiɔwo ko náe ngɛ nyɛ Tsɛ nɛ e ngɛ hiɔwe ɔ ngɔ.
2 Enɛ ɔ he ɔ, ke nɔ ko he pee mo mɔbɔ* nɛ o maa ke lɛ nɔ́ ɔ, ko kpa titimati kɛ nyɛɛ o hɛ mi kaa bɔ nɛ osatotsɛmɛ ɔmɛ peeɔ ngɛ kpe he ɔmɛ kɛ gbɛjegbɛ ɔmɛ a nɔ konɛ nihi nɛ a wo a hɛ mi nyami ɔ. Ngɛ anɔkuale mi ɔ, i ngɛ nyɛ dee ke a nine su a hiɔwo ɔ tsuo nɔ momo.
3 Se moo lɛɛ ke nɔ ko he pee mo mɔbɔ nɛ o maa ke lɛ nɔ́ ɔ, ko ha nɛ o muɔ nine nɛ le nɔ́ nɛ o hiɔ nine ngɛ pee,
4 konɛ nɔ ko nɛ e ko le nɔ́ nɛ o kɛ ke nɔ nɛ e he pee mo mɔbɔ ɔ. Kɛkɛ ɔ, o Tsɛ ɔ nɛ e naa níhi nɛ a peeɔ ngɛ laami mi ɔ maa to mo nane mi.
5 “Jehanɛ ɔ se hu ɔ, ke nyɛ ngɛ sɔlee ɔ, nyɛ ko pee nyɛ ní kaa osatotsɛmɛ ɔmɛ, ejakaa a suɔ kaa a maa da kpe he ɔmɛ, kɛ gbɛjegbɛ ɔmɛ a kɔ̃ nya kɛ sɔle konɛ nihi nɛ a na mɛ. Ngɛ anɔkuale mi ɔ, i ngɛ nyɛ dee ke a nine su a hiɔwo ɔ tsuo nɔ momo.
6 Se moo lɛɛ ke o maa sɔle ɔ, sɛ o tsu mi, nɛ ke o nga sinya a, moo sɔle kɛ ha o Tsɛ ɔ nɛ e ngɛ laami mi ɔ. Kɛkɛ ɔ, o Tsɛ ɔ nɛ e naa níhi nɛ a peeɔ ngɛ laami mi ɔ ma ha mo nɔ́ nɛ o bi lɛ ɔ.
7 Ke o ngɛ sɔlee ɔ, koo tĩ munyu kake ɔ nɔuu mi si abɔ kaa bɔ nɛ nihi nɛ a ngɛ je ma amɛ a mi ɔ peeɔ ɔ, ejakaa a susuɔ kaa ja a tu munyu fuu loko a maa bu mɛ tue.
8 Lɔ ɔ he ɔ, nyɛ ko pee nyɛ ní kaa mɛ, ejakaa nyɛ Tsɛ ɔ le níhi nɛ hia nyɛ ɔ momo po loko nyɛ biɔ lɛ.
9 “Enɛ ɔ he ɔ, nyɛɛ sɔle kikɛ nɛ ɔ:
“‘Wa Tsɛ nɛ o ngɛ hiɔwe, ha nɛ o biɛ ɔ he nɛ tsɔ.*
10 Ha nɛ o Matsɛ Yemi ɔ nɛ ba. Ha nɛ a pee o suɔmi nya ní ngɛ zugba a nɔ kaa bɔ nɛ a peeɔ ngɛ hiɔwe ɔ.
11 Ha wɔ wa nya mi ngma mwɔnɛ ɔ ligbi nɛ ɔ;
12 nɛ ngɔɔ wa hiɔ ɔmɛ kɛ ke wɔ kaa bɔ nɛ wɔ hu wa ngɔ kɛ ke nihi nɛ a hɛɛ wɔ hiɔ ɔ.
13 Nɛ koo ngɔ wɔ kɛ ya ka mi, mohu ɔ, mo je* wɔ kɛ je nɔ yayami ɔ dɛ mi.’
14 “Ejakaa ke nyɛ ngɔɔ nihi a tɔmihi kɛ paa mɛ ɔ, nyɛ Tsɛ nɛ e ngɛ hiɔwe ɔ hu maa ngɔ nyɛ tɔmihi kɛ pa nyɛ;
15 se ke nyɛ ngɔɛ nihi a tɔmihi kɛ pɛ mɛ ɔ, nyɛ Tsɛ ɔ hu kɛ nyɛ tɔmihi be nyɛ pae.
16 “Ke nyɛ ngɛ hwɔ hae ɔ, nyɛ ko pee nyɛ hɛ mi mɔbɔmɔbɔ kaa bɔ nɛ osatotsɛmɛ ɔmɛ peeɔ ɔ, ejakaa a peeɔ a hɛ mi nyanyaanya konɛ nihi nɛ a le kaa a ngɛ hwɔ hae. Ngɛ anɔkuale mi ɔ, i ngɛ nyɛ dee ke a nine su a hiɔwo ɔ tsuo nɔ momo.
17 Se nyɛɛ lɛɛ ke nyɛ ngɛ hwɔ hae ɔ, nyɛ kpa nyɛ yi mi nu, nɛ nyɛ fɔ nyɛ hɛ mi,
18 konɛ nihi nɛ a ko le kaa nyɛ ngɛ hwɔ hae, kaa ja nyɛ Tsɛ nɛ e ngɛ laami mi ɔ pɛ. Kɛkɛ ɔ, nyɛ Tsɛ ɔ nɛ e naa níhi nɛ a peeɔ ngɛ laami mi ɔ maa jɔɔ nyɛ.
19 “Nyɛɛ jɔɔ juetli si tomi ha nyɛ he ngɛ zugba a nɔ, he nɛ wɔyewɔye kɛ kana puɛɔ ní ngɛ, nɛ juli ywiaa kɛ sɛɛ mi nɛ a ya juɔ ɔ.
20 Mohu ɔ, nyɛɛ to juetli si ha nyɛ he ngɛ hiɔwe, he nɛ wɔyewɔye kɛ kana puɛ we ní ngɛ, nɛ juli be ywiae nɛ a sɛ mi nɛ a ya ju ɔ.
21 Ejakaa he nɛ o juetli ngɛ ɔ, lejɛ ɔ nɛ o tsui hu maa hi.
22 “Nɔmlɔ tso ɔ kane ji hɛ ngmɛ. Enɛ ɔ he ɔ, ke o hɛ ngmɛ nɔ tsɔ* ɔ, o nɔmlɔ tso ɔ tsuo ma kpɛ.*
23 Se ke o hɛ ngmɛ hí* ɔ, o nɔmlɔ tso ɔ tsuo maa wo diblii. Ke la nɛ ngɛ o mi ɔ ji diblii niinɛ ɔ, lɛɛ hyɛ bɔ nɛ diblii ɔ mi ma ti ha!
24 “Nɔ ko be nyɛe maa pee nyɔguɛ kɛ ha nyɔmtsɛmɛ enyɔ; ejakaa ke e ná we nɔ kake he ninyɛ nɛ e suɔ nɔ kpa a, lɛɛ e maa mɛtɛ nɔ kake he nɛ e ma kua nɔ kpa a. Nyɛ be nyɛe maa pee nyɔguɛhi kɛ ha Mawu, kɛ Ní Nami tsuo.
25 “Enɛ ɔ he ɔ, i ngɛ nyɛ dee ke: Nyɛɛ jɔɔ yeyeeye peemi ngɛ nyɛ wami* he ngɛ nɔ́ nɛ nyɛ maa ye, aloo nɔ́ nɛ nyɛ maa nu, aloo nɔ́ nɛ nyɛɛ kɛ maa ha nyɛ nɔmlɔ tso ɔ he ɔ he. Anɛ wami* he hia we pi niye ní lo, nɛ nɔmlɔ tso ɔ hu he hia we pi heha nɔ́ lo?
26 Nyɛɛ to hiɔwe lohwe pɛlitsɛmɛ a he hɛ saminya; a du we ní, nɛ a kpa we ní, nɛ a bua we níhi a nya kɛ wui nito hehi, se kɛ̃ ɔ, nyɛ Tsɛ nɛ e ngɛ hiɔwe ɔ haa mɛ niye ní. Anɛ nyɛ he jua wɛ hluu pi mɛ lo?
27 Nyɛ ti mɛnɔ nɛ ke e ngɛ yeyeeye pee ɔ, e ma nyɛ maa tsɔ e wami nya kɔni fã?*
28 Jehanɛ hu ɔ, mɛni he je nɛ nyɛ peeɔ yeyeeye ngɛ heha nɔ́ he ɔ? Nyɛɛ kase ní kɛ je nga nɔ mɔmɔhi a ngɔ, nyɛɛ hyɛ bɔ nɛ a waa ha; a gbo we dengme, nɛ a pee we kpã hulɔ;
29 se i ngɛ nyɛ dee ke ngɛ Solomon hɛ mi nyami babauu ɔ tsuo se ɔ, e he dlami sui mɔmɔ nɛ ɔmɛ a kpɛti kake.
30 Ke Mawu dlaa nga nɔ huhi nɛ a ngɛ mwɔnɛ ɔ nɛ hwɔɔ kɛkɛ a sake mɛ ngɔ wo flɔɔnɔɔ mi ɔ kikɛ nɛ ɔ, lɛɛ anɛ e be nyɛ heha nɔ́ hae po pe jã lo, nyɛ nɛ nyɛ hemi kɛ yemi pi?
31 Lɔ ɔ he ɔ, nyɛ ko pee yeyeeye kɔkɔɔkɔ nɛ nyɛ de ke, ‘Mɛni wa maa ye?’ aloo, ‘Mɛni wa maa nu?’ aloo, ‘Mɛni wa maa ngɔ kɛ ha wa he?’
32 Ejakaa ní nɛ ɔmɛ tsuo ji níhi nɛ je ma amɛ ngɛ se die wawɛɛ. Nyɛ Tsɛ nɛ e ngɛ hiɔwe ɔ le kaa ní nɛ ɔmɛ tsuo a he hia nyɛ.
33 “Enɛ ɔ he ɔ, nyɛɛ ya nɔ nɛ nyɛ hla Matsɛ Yemi ɔ kɛ níhi nɛ da ngɛ Mawu hɛ mi ɔ kekle, nɛ a maa ngɔ ní nɛ ɔmɛ tsuo kɛ piɛɛ he ha nyɛ.
34 Lɔ ɔ he ɔ, nyɛ ko pee yeyeeye kɔkɔɔkɔ ngɛ hwɔɔ he, ejakaa hwɔɔ hu ma ná lɛ nitsɛ e yeyeeye peemi. Ligbi fɛɛ ligbi haomihi hiɛ ha lɛ.
Sisi Ningmahi
^ Aloo “ke o maa ke ohiatsɛ ko nɔ́ ɔ.” Hyɛ Munyu Komɛ A Sisi Tsɔɔmi.
^ Aloo “a pee o biɛ ɔ klɔuklɔu.”
^ Aloo “kpɔ̃ wɔ.”
^ Aloo “o kɛ o juɛmi maa nɔ́ kake pɛ nɔ.” Hela, “ngɛ kpokploo.”
^ Aloo “maa pee kɛ la sɔuu.”
^ Aloo “o hɛ kɔ̃ɔ nihi a nɔ ɔ.”
^ Aloo “susuma.”
^ Aloo “susuma.”
^ Hyɛ Munyu Komɛ A Sisi Tsɔɔmi.
