Obadia 1:1-21
1 Obadia* nina:
Nɔ́ nɛ Nyɔmtsɛ Matsɛ Yehowa de kɛ kɔ Edom he ji nɛ ɔ nɛ:
“Wa nu sɛ gbi ko kɛ je Yehowa ngɔ,E tsɔ nɔ ko kɛ ho je ma amɛ a ngɔ ya ke:
‘Nyɛɛ te si, nyɛ ha nɛ wa dla wa he nɛ waa kɛ lɛ nɛ ya hwu.’”
2 Hyɛ! I pee mo ma nyafii ngɛ je ma amɛ a kpɛti;O he guɛ gbo.
3 O he nɔ nɛ o wo ngɛ o tsui mi ɔ sisi mo,Mo nɛ́ o ngɛ tɛsahi a yi mi,Nɛ́ o ngɛ yokuhi a yi mi ploplooplo, nɛ o deɔ ngɛ o tsui mi ke,‘Mɛnɔ ma nyɛ maa gbla mi kɛ ba zugba?’
4 Ke o hi he ngɛ hiɔwe* kaa kɔle,Loo o ya pee o tsu ngɛ dodoe ɔmɛ a kpɛti po,Ma gbla mo kɛ je lejɛ ɔ kɛ fia si,” Yehowa lɛ de.
5 “Ke juli ba tua mo, aloo ojo fiali ba nyɔ mi ɔ,(Hyɛ bɔ nɛ a ma kpata o hɛ mi ha!)*
Tse nɔ́ nɛ a ngɛ hlae ɔ pɛ nɛ a maa ju?
Nɛ ke wai yiblii kpali lɛ a ba a,Anɛ a be e sisi piɛe nɛ ni kpahi ba muɔɔ lo?
6 Oo, hyɛ bɔ nɛ a hla Esau se blɔ ha!
Hyɛ bɔ nɛ a hla e junehi nɛ e kɛ laa a se blɔ ha!
7 A fiee mo kɛ ho huzu ɔ nya ya.
Nihi nɛ o kɛ mɛ pee kake ɔ* tsuo sisi mo.
Nihi nɛ tue mi jɔmi ngɛ o kɛ mɛ nyɛ kpɛti ɔ ye o nɔ kunimi.
Nihi nɛ a kɛ mo yeɔ ní* ɔ maa tsɔ mo klama,Se o be yɔsee.
8 Jamɛ a ligbi ɔ,” Yehowa de ke:“Anɛ i be ní leli nɛ a ngɛ Edom ɔ a hɛ mi kpatae lo?Anɛ i be nihi nɛ a kɔɔ nɔ́ se a hɛ mi kpatae kɛ je Esau yoku ɔmɛ a nɔ lo?
9 Oo Teman, sawale maa nu o tabuli kpanaa amɛ,Ejakaa nihi nɛ a ngɛ Esau yoku ɔmɛ a nɔ ɔ a ti nɔ fɛɛ nɔ hɛ mi ma kpata.
10 Akɛnɛ o pee o nyɛmi Yakob yiwutso ní he je ɔ,O hɛ mi ma pue si,Nɛ o hɛ mi ma kpata kɛ ya neneene.
11 Ligbi nɛ o tsɔ o he kɛ ya da se banee,Ligbi nɛ nibwɔhi ba ngɔ e tabo ɔ kɛ ho nyɔguɛ tso mi ya,Benɛ nibwɔhi ba sɛ e we agbo ɔ mi nɛ a fɔ̃ Yerusalem nɔ sɔ ɔ,O fĩ a se.
12 Ligbi nɛ o nyɛmi ɔ ya sɛ haomi mi ɔ, pi jamɛ a ligbi ɔ nɛ e sa kaa o bua nɛ jɔ,E sɛ nɛ o bua nɛ jɔ ngɛ ligbi nɛ Yudabi ɔmɛ a hɛ mi ngɛ kpatae ɔ nɔ,Nɛ e sɛ nɛ o tuɔ he nɔ womi munyu ngɛ a haomi ligbi ɔ nɔ.
13 E sɛ kaa o sɛɔ ye we bi ɔmɛ a we agbo ɔ mi ngɛ a we amanehlu ligbi nɔ,E sɛ nɛ o bua jɔɔ ngɛ o nyɛmi ɔ amanehlu ligbi nɔ,Nɛ e sɛ nɛ o ya haa e níhi ngɛ ligbi nɛ amanehlu ba e nɔ ɔ nɔ.
14 E sɛ kaa o ya daa blɔ gbla nya nɛ o kpataa nihi nɛ ngɛ fo tue ɔ a hɛ mi,Nɛ e sɛ kaa o kɛ ni nɛmɛ nɛ a yi ná wami ɔ haa a he nyɛli ngɛ haomi ligbi nɔ.
15 Ejakaa ligbi nɛ Yehowa maa te si kɛ wo je ma amɛ ɔ su ta.
Nɔ́ nɛ o pee lɛ ɔ, a kɛ maa pee mo.
Nɛ nɔ́ nɛ o pee ni kpahi ɔ, lɔ ɔ nɔuu lɛ maa ba o nɔ.
16 Kaa bɔ nɛ o nu wai ngɛ ye yoku klɔuklɔu ɔ nɔ ɔ,Jã nɛ je ma amɛ maa nu nɛ a be kpae.
A maa nu lɛ tsuo,Nɛ a maa laa kaa nɔ́ nɛ a hí si hiɛ.
17 Se nihi nɛ a maa tu fo ɔ maa ya Zion Yoku ɔ nɔ,Nɛ lejɛ ɔ maa pee klɔuklɔu;Nɛ Yakob we ɔ maa ngɔ a weto ní ɔmɛ.
18 Yakob we ɔ maa pee kaa la,Yosef we ɔ maa pee kaa la lilɛ,Nɛ Esau we ɔ maa pee kaa nga;*A maa mɛ a he la, nɛ a maa sã butuu,Nɛ Esau we ɔ mi nɔ ko be piɛe,Ejakaa Yehowa nitsɛ lɛ de.
19 A maa ngɔ Negeb kɛ Esau yoku ɔmɛ,Shefela kɛ Filistibi ɔmɛ a zugba a.
A maa ngɔ Efraim zugba a kɛ Samaria zugba a hulɔ,Nɛ Benyamin maa ngɔ Gilead.
20 Nihi nɛ a nuu mɛ ngɛ ta hwumi kpoku* nɛ ɔ nɔ,Nɛ ji Israelbi nɛ a nuu mɛ kɛ ho kaa nyɔguɛhi ɔ maa ngɔ Kanaanbi ɔmɛ a zugba a kɛ ya si Zarefat.
Nɛ ni nɛmɛ nɛ a nuu mɛ nyɔguɛ kɛ je Yerusalem kɛ ho Sefarad ya a maa ngɔ mahi nɛ ngɛ Negeb ɔ.
21 Nihi nɛ a baa ni ɔmɛ a wami yi ɔ, maa kuɔ kɛ ya Zion yoku ɔ nɔKonɛ a ya kojo Esau yoku ɔmɛ,Nɛ matsɛ yemi ɔ ma ba pee Yehowa nɔ́.
Sisi Ningmahi
^ E sisi ji, “Yehowa Sɔmɔlɔ.”
^ Baiblo komɛ de ke “Ke o te kɛ ya hiɔwe.”
^ Baiblo komɛ de ke “Níhi enyɛmɛ hɛ mi lɛ a ma kpata?”
^ Aloo “Nihi nɛ a kɛ mo so ɔ.”
^ Ngɛ Hebri gbi mi ɔ, “abolo.”
^ Nga nɛ a ngɛ tsɔɔe ngɛ hiɛ ɔ ji hwiit kɛ blɛfo kɛ a henɔ ɔmɛ a tsohi nɛ a poo nɛ e piɛ ngɛ ngmɔ ɔ nɔ.
^ E ji kpoku loo gbogbo nɛ a daa nɔ kɛ hwuɔ ta, aloo a kɛ poɔ ma he piɛ.