Yakobo Sɛ Womi ɔ 3:1-18
3 Ye nyɛmimɛ, e sɛ nɛ nyɛ ti nihi fuu nɛ a ba pee tsɔɔli, akɛnɛ nyɛ le kaa wa ma ná kojomi nɛ mi wa a he je.
2 Ejakaa wɔ tsuo wa tɛɔ si* si abɔ. Ke nɔ ko nya tɛ we si ɔ, e ji adesa nɛ e ye mluku, nɛ e nyɛɔ nɛ e woɔ e nɔmlɔ tso ɔ tsuo kpa hulɔ.
3 Ke wa wo okpɔngɔhi a nya mi kpahi konɛ a bu wɔ tue ɔ, wa kudɔɔ a nɔmlɔ tso ɔ tsuo hulɔ.
4 Hyɛ melehi hulɔ: E ngɛ mi kaa a kle wawɛɛ nɛ kɔɔhiɔ nɛ nya wa lɛ tsitsɛɛɔ mɛ mohu lɛɛ, se kudɔɔ nyafii pɛ lɛ kudɔɔtsɛ ɔ kɛ kudɔɔ mɛ kɛ yaa he fɛɛ he nɛ e suɔ.
5 Jã nɔuu kɛ̃ nɛ lilɛ ɔ hu ji nɔ́ nyafii ko ngɛ nɔmlɔ tso ɔ he, se kɛ̃ ɔ, e fĩaa fĩami nguanguahi. Hyɛ kaa la nyafii pɛ lɛ sãa huetso ngua!
6 Lilɛ ɔ ji la hulɔ. Lilɛ ɔ daa si kɛ ha je ko nɛ dɛ ngɛ wa nɔmlɔ tso ɔ he ní ɔmɛ a kpɛti, ejakaa e bleɔ nɔmlɔ tso ɔ tsuo nɛ e sãa je mi si himi ɔ* tsuo, nɛ Gehena* lɛ mɛɛ he la.
7 Ejakaa e sa kaa a jɔɔ lohwe awi yelɔ fɛɛ lohwe awi yelɔ kɛ lohwe pɛlitsɛ kɛ akɔtɔku kɛ sinɔ a henɔhi* kɛ wo mi lohwehi a he, nɛ adesahi jɔɔ lohwe nɛ ɔmɛ a he.
8 Se adesa ko be nyɛe maa jɔɔ lilɛ ɔ he. E he hí jɔɔmi, nɛ e yeɔ awi nɛ gbenɔ duɔ hyi lɛ tɔ.
9 Lɔ ɔ nɛ waa kɛ jeɔ Yehowa* nɛ ji Tsɛ ɔ yi, se kɛ̃ ɔ, waa kɛ gbiɛɔ adesahi nɛ a bɔ mɛ “kaa bɔ nɛ Mawu ngɛ” ɔ.
10 Jamɛ a nya kake ɔ nɔuu mi nɛ jɔɔmi kɛ gbiɛmi jeɔ.
Ye nyɛmimɛ, e dɛ blɔ kaa níhi maa ya nɔ kikɛ nɛ ɔ.
11 Tse nyu mua* kɛ nyu nɛ doo tsa su we kɛ ji nyu hɛ ngmɛ kake mi, aloo a suɔ?
12 Ye nyɛmimɛ, tse fig tso be nyɛe maa wo oliv loo wai yiblii, aloo e ma nyɛ? Jã nɔuu kɛ̃ nɛ ngo nyu hu be nyɛe maa pee nyu mua.
13 Mɛnɔ ji juɛmitsɛ kɛ nɔ́ sisi nulɔ ngɛ nyɛ kpɛti? Ha nɛ e gu e je mi bami kpakpa a nɔ kɛ je ní tsumihi nɛ a kɛ he jɔmi nɛ jeɔ juɛmi mi kɛ ba a tsuɔ ɔ kpo.
14 Se ke hunga jemi nɛ nya wa kɛ pɛ* ngɛ o tsui mi ɔ, lɛɛ koo hi fĩae nɛ o hi lakpa yee kɛ hi anɔkuale ɔ sie.
15 Pi juɛmi ɔ nɛ jeɔ hiɔwe kɛ baa a ji nɛ ɔ; e ji zugba a nɔ nɔ́, lohwehi a nɔ́, kɛ daimoniohi a nɔ́.
16 Ejakaa he fɛɛ he nɛ hunga jemi kɛ pɛ* ngɛ ɔ, lejɛ ɔ nɛ basabasa peemi kɛ nɔ́ yayami fɛɛ nɔ́ yayami hu maa hi.
17 Se juɛmi ɔ nɛ je hiɔwe ɔ, kekleekle ɔ, e he tsɔ, lɔ ɔ se ɔ, e suɔ tue mi jɔmi, e nuɔ nɔ́ sisi, e pee klaalo kaa e maa bu tue, e hyi tɔ kɛ mɔbɔ nami kɛ yiblii kpakpahi, e hlɛ nɔ mi, e pee we osato.
18 Jehanɛ se hu ɔ, dami yiblii ɔ, tue mi jɔmi si himihi a mi nɛ a duɔ ngɛ kɛ haa nihi nɛ a kɛ tue mi jɔmi baa a.*
Sisi Ningmahi
^ Aloo “tɔ̃ɔ.”
^ Hela, “fɔmi (sisije) si bɔlemi ɔ.”
^ Hyɛ Munyu Komɛ A Sisi Tsɔɔmi.
^ Aloo “lohwehi nɛ a sãa si.”
^ Hyɛ Munyu Komɛ A Sisi Tsɔɔmi.
^ Hela, “nyu nɛ ngɔɔ.”
^ E ma nyɛ maa pee kaa “nɔ nitsɛ e nɔ́ mi fomi nɛ e kɛ hlaa blɔ nya.”
^ E ma nyɛ maa pee kaa “nɔ nitsɛ e nɔ́ mi fomi nɛ e kɛ hlaa blɔ nya.”
^ E ma nyɛ maa pee kaa “nihi nɛ a kɛ tue mi jɔmi baa a lɛ a duɔ ngɛ tue mi jɔmi si himihi a mi.”
