Yohane Sane Kpakpa a 15:1-27
15 “Imi ji wai tso nitsɛ ɔ nɛ, nɛ ye Tsɛ ɔ ji ngmɔ hulɔ ɔ nɛ.
2 Ye kɔni fɛɛ kɔni nɛ e wui yiblii ɔ, e poɔ ngɔ fɔɔ he, nɛ e haa nɛ eko fɛɛ eko nɛ e woɔ yiblii ɔ he tsɔɔ, konɛ e nyɛ nɛ e wo yiblii babauu.
3 Munyu ɔ nɛ i tu kɛ tsɔɔ nyɛ ɔ ha nɛ nyɛ he tsɔ momo.
4 Nyɛɛ ya nɔ nɛ nyɛɛ kɛ mi nɛ pee kake, nɛ imi hu ma ya nɔ nɛ i kɛ nyɛ maa pee kake. Kaa bɔ nɛ tso kɔni be nyɛe maa wo yiblii ngɛ lɛ nitsɛ e dɛ he kaa ja e ngɛ wai tso ɔ he ɔ, jã kɛ̃ nɛ nyɛ hu nyɛ be nyɛe maa wo yiblii ngɛ nyɛ nitsɛmɛ nyɛ dɛ he kaa ja nyɛ ya nɔ nɛ nyɛɛ kɛ mi pee kake.
5 Imi ji wai tso ɔ nɛ; nyɛ ji kɔni ɔmɛ ɔ nɛ. Nɔ fɛɛ nɔ nɛ e yaa nɔ nɛ e kɛ mi peeɔ kake nɛ imi hu i kɛ lɛ peeɔ kake ɔ, jamɛ a nɔ ɔ woɔ yiblii babauu; ejakaa ke ye he be mi ɔ, nyɛ be nyɛe maa pee nɔ́ ko nɔ́ ko kulaa.
6 Ke nɔ ko yɛ nɔ nɛ e kɛ mi nɛ pee kake ɔ, a sakeɔ lɛ ngɔ fɔɔ he kaa tso kɔni, nɛ e gbliɔ, nɛ nihi buaa jamɛ a kɔni ɔmɛ a nya, nɛ a sakeɔ mɛ kɛ fɔɔ la mi, nɛ a sãa.
7 Ke nyɛ ya nɔ nɛ nyɛɛ kɛ mi pee kake nɛ ye munyu ɔmɛ hi nyɛ mi ɔ, lɛɛ nyɛ bi nɔ́ fɛɛ nɔ́ nɛ nyɛ suɔ, nɛ e maa ba mi ha nyɛ.
8 Nɔ́ nɛ e woɔ ye Tsɛ ɔ hɛ mi nyami ji kaa nyɛ maa ya nɔ maa wo yiblii babauu nɛ nyɛ ma je nyɛ he kpo kaa ye kaseli ji nyɛ.
9 Kaa bɔ nɛ Tsɛ ɔ suɔ mi ɔ, jã kɛ̃ nɛ imi hu i suɔ nyɛ; nyɛɛ hi ye suɔmi ɔ mi.
10 Ke nyɛ yeɔ ye kita amɛ a nɔ ɔ, nyɛ maa hi ye suɔmi ɔ mi kaa bɔ nɛ imi hu i ye Tsɛ ɔ kita amɛ a nɔ nɛ i ngɛ e suɔmi ɔ mi ɔ.
11 “I de nyɛ ní nɛ ɔmɛ bɔ nɛ pee nɛ ye bua jɔmi ɔ nɛ hi nyɛ mi konɛ nyɛ bua jɔmi ɔ nɛ e pi si.
12 Ye kita a ji nɛ ɔ nɛ, kaa nyɛɛ suɔ nyɛ sibi kaa bɔ nɛ i suɔ nyɛ ɔ.
13 Nɔ ko nɔ ko be suɔmi nɛ e pe enɛ ɔ, kaa nɔ ko maa ngɔ e wami* kɛ fɔ si ngɛ e huɛmɛ a he.
14 Ke nyɛ peeɔ nɔ́ nɛ i ngɛ nyɛ fãe ke nyɛɛ pee ɔ, lɛɛ ye huɛmɛ ji nyɛ.
15 I tsɛ we nyɛ ke nyɔguɛhi hu, ejakaa nyɔguɛ li nɔ́ nɛ e nyɔmtsɛ ɔ tsuɔ. Se i tsɛ nyɛ ke huɛmɛ, ejakaa i ha nɛ nyɛ le níhi tsuo nɛ i nu kɛ je ye Tsɛ ɔ ngɔ ɔ.
16 Pi nyɛ nɛ nyɛ hla mi, mohu ɔ, imi lɛ i hla nyɛ, nɛ i tsɔ nyɛ konɛ nyɛɛ ya nɛ nyɛ ya hi yiblii woe, nɛ́ nyɛ yiblii ɔ nɛ e hi si, konɛ nɔ́ fɛɛ nɔ́ nɛ nyɛ ma bi Tsɛ ɔ ngɛ ye biɛ mi ɔ, e ha nyɛ.
17 “Ní nɛ ɔmɛ a he ɔ, i ngɛ nyɛ mlaa woe ke, nyɛɛ suɔ nyɛ sibi.
18 Ke je ɔ nyɛɔ nyɛ ɔ, nyɛɛ le kaa e nyɛ mi kekle loko e nyɛ nyɛ.
19 Kaa nyɛ piɛɛ je ɔ he ɔ, jinɛ je ɔ ko suɔ lɛ nitsɛ e níhi a sane. Amlɔ nɛ ɔ, i hla nyɛ kɛ je je ɔ mi, nɛ nyɛ piɛɛ we je ɔ he, enɛ ɔ he je nɛ je ɔ nyɛɔ nyɛ ɔ nɛ.
20 Nyɛ kai nɔ́ nɛ i de nyɛ ɔ: Nyɔguɛ nɔ kuɔ we pi e nyɔmtsɛ. Ke a wa mi yi mi ɔ, nyɛ hu a maa wa nyɛ yi mi; ke a ye ye munyu ɔ nɔ ɔ, nyɛ hu a maa ye nyɛ nɔ́ ɔ nɔ.
21 Se ye biɛ ɔ he je ɔ, a maa pee ní nɛ ɔmɛ tsuo kɛ si nyɛ, ejakaa a li Nɔ nɛ e tsɔ mi ɔ.
22 Kaa i bɛ nɛ ma ba tu munyu kɛ tsɔɔ mɛ ɔ, jinɛ yayami ko be a he. Se amlɔ nɛ ɔ, a be nya jemi ko ngɛ a he yayami ɔ he.
23 Nɔ fɛɛ nɔ nɛ e nyɛɔ mi ɔ, e nyɛɔ ye Tsɛ ɔ hulɔ.
24 Kaa i tsu we ní tsumihi nɛ nɔ ko tsu we eko hyɛ ɔ ngɛ a kpɛti ɔ, jinɛ yayami ko be a he; se amlɔ nɛ ɔ, a na mi nɛ a ngɛ i kɛ ye Tsɛ ɔ tsuo nyɛe.
25 Se nɔ́ nɛ ɔ ba mi konɛ munyu nɛ a ngma ngɛ Mlaa a mi ɔ nɛ e ba mi. A ngma ke: ‘A nyɛ mi yaka gu.’
26 Ke yemi kɛ bualɔ ɔ nɛ ma tsɔ lɛ nyɛ ngɔ kɛ je Tsɛ ɔ ngɔ, nɛ ji anɔkuale mumi ɔ nɛ jeɔ Tsɛ ɔ ngɔ ɔ ba a, e ma ba ye ye he odase;
27 nɛ nyɛ hu e sa nɛ nyɛɛ ye odase, ejakaa nyɛɛ kɛ mi lɛ hi si kɛ je sisije.
Sisi Ningmahi
^ Aloo “susuma.”
