Yohane Sane Kpakpa a 19:1-42
19 Lɔ ɔ se ɔ, Pilato ngɔ Yesu nɛ e fiaa lɛ kpa.
2 Nɛ ta buli ɔmɛ ngɔ mio kɛ lo jlasi nɛ a kɛ wo e yi, nɛ a ngɔ tade klɔii nɛ e hɛɛ alamua tu su kɛ wo lɛ,
3 nɛ a ngɛ e ngɔ bae nɛ a ba ngɛ dee ke: “Yuda bi ɔmɛ a Matsɛ, he manye!”* A ngɛ e hɛ mi ma gbae hulɔ.
4 Pilato je kpo ekohu, nɛ e ya de mɛ ke: “Hyɛ! i ngɔ lɛ kɛ je kpo kɛ ba ha nyɛ konɛ nyɛɛ le kaa i nɛ tɔmi ko ngɛ e he.”
5 Enɛ ɔ he ɔ, Yesu je kpo kɛ e yi jlasi nɛ a kɛ mio lo ɔ, kɛ e he tade klɔii nɛ e hɛɛ alamua tu su ɔ. Nɛ Pilato de mɛ ke: “Nyɛɛ hyɛ! Nyumu ɔ!”
6 Se benɛ osɔfo nikɔtɔma amɛ kɛ tsɔli ɔmɛ na lɛ ɔ, a kpa ngmlaa ke: “Sɛu lɛ! Sɛu lɛ!”* Pilato de mɛ ke: “Nyɛ nitsɛmɛ nyɛɛ ngɔ lɛ nɛ nyɛ ya gbe lɛ,* ejakaa imi lɛɛ i nɛ tɔmi ko ngɛ e he.”
7 Yuda bi ɔmɛ he nɔ ke: “Wa ngɛ mlaa, nɛ ngɛ wa mlaa a nya a, e sa gbenɔ, ejakaa e pee e he Mawu bi.”
8 Benɛ Pilato nu nɔ́ nɛ a ngɛ dee ɔ, e ye gbeye wawɛɛ po pe kekle ɔ,
9 nɛ e sɛ amlaalo ɔ we ɔ mi ekohu nɛ e bi Yesu ke: “Jije o je?” Se Yesu ha we lɛ heto.
10 Enɛ ɔ he ɔ, Pilato bi lɛ ke: “Anɛ o be ye nya mi poe lo? O li kaa i ngɛ he wami nɛ ma nyɛ ma ngmɛɛ o he, nɛ i ngɛ he wami nɛ ma nyɛ ma gbe mo* lo?”
11 Yesu ha lɛ heto ke: “Kaa pi hiɔwe nɛ a je nɛ a ha mo he wami ɔ, jinɛ o be he wami ko kulaa ngɛ ye nɔ. Enɛ ɔ he je nɛ nɔ nɛ e ngɔ mi kɛ wo o dɛ mi ɔ, e yayami ɔ kle pe o nɔ́ ɔ nɛ.”
12 Enɛ ɔ he ɔ, Pilato ya nɔ nɛ e bɔ mɔde kaa e ma hla blɔ nɔ nɛ e maa gu kɛ ngmɛɛ e he, se Yuda bi ɔmɛ kpa ngmlaa wawɛɛ ke: “Ke o ngmɛɛ nyumu nɛ ɔ he ɔ, lɛɛ pi Kaisare huɛ ji mo. Nɔ fɛɛ nɔ nɛ e woɔ lɛ nitsɛ e he matsɛ ɔ tuɔ munyu kɛ siɔ* Kaisare.”
13 Lɔ ɔ se ɔ, benɛ Pilato nu munyu nɛ ɔmɛ ɔ, e ngɔ Yesu kɛ je kpo, nɛ e hi si ngɛ kojomi sɛ ɔ nɔ ngɛ he ko nɛ a tsɛɔ ke He Nɛ A To Tɛhi Ngɛ ɔ, se ngɛ Hebri gbi mi ɔ, a tsɛɔ ke Gabata a.
14 Jamɛ a ligbi ɔ ji He Dlami Ligbi kɛ ha He Tsɔmi ɔ; maa pee kaa ngmlɛfia ekpane* ɔ mi. Nɛ e de Yuda bi ɔmɛ ke: “Nyɛɛ hyɛ! Nyɛ matsɛ ɔ!”
15 Se a kpa ngmlaa ke: “Ngɔɔ lɛ kɛ ho! Ngɔɔ lɛ kɛ ho! Sɛu lɛ!”* Pilato de mɛ ke: “Ma gbe nyɛ matsɛ ɔ lo?” Osɔfo nikɔtɔma amɛ he nɔ ke: “Wa be matsɛ ko kaa ja Kaisare.”
16 Kɛkɛ nɛ e ngɔ lɛ kɛ ha mɛ konɛ a ya gbe lɛ ngɛ tso nɔ.
Enɛ ɔ he ɔ, Yesu ya je a nine nɔ.
17 Yesu tloo lɛ nitsɛ e sɛumi tso* ɔ nɛ e je kpo kɛ ho he ko nɛ a tsɛɔ ke Yikoklodonya, nɛ́ ngɛ Hebri gbi mi ɔ, a tsɛɔ lejɛ ɔ ke, Golgota a ya.
18 A ka lɛ kɛ wo tso ɔ he ngɛ lejɛ ɔ kɛ piɛɛ nyumu enyɔ komɛ a he, nɔ kake ngɛ e hiɔ nɔ nɛ nɔ kake hu ngɛ e muɔ nɔ, nɛ Yesu ngɛ a kpɛti.
19 Pilato hu ngma palemi biɛ ko kɛ mɛtɛ sɛumi tso* ɔ he. E ngma ke: “Yesu, Nazarɛt no, Yuda bi ɔmɛ a Matsɛ ɔ.”
20 Yuda bi ɔmɛ a ti nihi babauu kane palemi biɛ nɛ ɔ, ejakaa he nɛ a ka Yesu kɛ wo tso ɔ he ngɛ ɔ kɛ ma a he kɛ we, nɛ a ngma munyu ɔ ngɛ Hebri, Latin, kɛ Hela gbi mi.
21 Se Yuda bi ɔmɛ a we osɔfo nikɔtɔma amɛ de Pilato ke: “Koo ngma ke, ‘Yuda bi ɔmɛ a Matsɛ ɔ,’ mohu ɔ, ngmaa ke, e de ke, ‘Imi ji Yuda bi ɔmɛ a Matsɛ ɔ nɛ.’”
22 Pilato ha heto ke: “Nɔ́ nɛ i ngma a, i ngma.”
23 Jehanɛ ɔ, benɛ ta buli ɔmɛ ka Yesu kɛ wo tso ɔ he ɔ, a ngɔ tadehi nɛ e wo ngɛ e tade ɔ nɔ ɔ nɛ a gba mi eywiɛ, nɛ ta bulɔ fɛɛ ta bulɔ ngɔ kake, nɛ a ngɔ tade nɛ e wo ngɛ e tade ɔ sisi ɔ hulɔ. Se tade nɛ e wo ngɛ e tade ɔ sisi ɔ lɛɛ a kpɛ we, mohu ɔ, a lo kɛ je hiɔwe kɛ ba ma si.
24 Enɛ ɔ he ɔ, a de a sibi ke: “Nyɛ ko ha nɛ wa gba lɛ, mohu ɔ, nyɛ ha nɛ waa fɔ nɔ sɔ konɛ waa na nɔ nɛ e maa pee e nɔ́.” Enɛ ɔ ya nɔ konɛ ngmami ɔ nɛ e ba mi. A ngma ke: “A gba ye tade ɔmɛ ngɔ ha a he, nɛ a fɔ ye tade ɔ nɔ sɔ.” Lɔ ɔ he ɔ, ta buli ɔmɛ pee ní nɛ ɔmɛ niinɛ.
25 Se Yesu yayo kɛ e yayo nyɛmiyo, Maria, Klopa yo ɔ, kɛ Maria Magdalena daa si ngɛ Yesu sɛumi tso* ɔ kasa nya.
26 Enɛ ɔ he ɔ, benɛ Yesu na e yayo kɛ kaselɔ ɔ nɛ e suɔ lɛ ɔ nɛ a daa si ngɛ lejɛ ɔ, e de e yayo ke: “Yo, hyɛ! O binyumu ɔ!”
27 Lɔ ɔ se ɔ, e de kaselɔ ɔ ke: “Hyɛ! O yayo!” Nɛ kɛ je jamɛ a ngmlɛfia a nɔ kɛ yaa a, kaselɔ ɔ ngɔ lɛ kɛ ho lɛ nitsɛ e we mi ya.
28 Ngɛ enɛ ɔ se ɔ, benɛ Yesu ná le kaa amlɔ nɛ ɔ lɛɛ nɔ́ fɛɛ nɔ́ ba mi ta a, bɔ nɛ pee nɛ ngmami ɔ nɛ e ba mi ɔ, e de ke: “Kuma ngɛ mi yee.”
29 Buɛ ko maa si ngɛ lejɛ ɔ nɛ wai nɛ kuã hyi lɛ tɔ. Enɛ ɔ he ɔ, a ngɔ kutsa nɛ wai nɛ kuã pɔ lɛ tsɔtsɔɔtsɔ kɛ wo hisopo* tso nya nɛ a wo nɔ kɛ to e nya he.
30 Benɛ Yesu nine su wai nɛ kuã a nɔ ɔ, e de ke: “A gbe nya!” kɛkɛ nɛ e ma e yi si nɛ e ngmɛɛ e mumi ɔ he.*
31 Jamɛ a ligbi ɔ ji He Dlami Ligbi, lɔ ɔ he ɔ, bɔ nɛ pee nɛ gbogboe ɔmɛ nɛ a ko hi sɛumi tso ɔmɛ a nɔ ngɛ He Jɔɔmi Ligbi ɔ nɔ he je ɔ, (ejakaa jamɛ a He Jɔɔmi Ligbi ɔ ji He Jɔɔmi Ligbi ngua), Yuda bi ɔmɛ bi Pilato konɛ e ha nɛ a ya ku a nanehi nɛ a je a gbogboe ɔmɛ kɛ ho.
32 Enɛ ɔ he ɔ, ta buli ɔmɛ ba nɛ a ba ku kekleekle nyumu ɔ kɛ nyumu kaketsɛ ɔ nɛ a ngɛ tso ɔ nɔ ngɛ e kasa nya amɛ a nane ɔmɛ.
33 Se benɛ a su Yesu nɔ ɔ, a na kaa e gbo momo, enɛ ɔ he ɔ, a ku we e nane ɔmɛ.
34 Se ta buli ɔmɛ a kpɛti nɔ kake ngɔ akplɔ kɛ gbɔ e kasa, nɛ amlɔ nɔuu nɛ muɔ kɛ nyu je mi kɛ be.
35 Nɛ nɔ nɛ e na nɔ́ nɛ ɔ lɛ e ye odase nɛ ɔ nɛ, nɛ odase nɛ e ye ɔ ji anɔkuale, nɛ e le kaa nɔ́ nɛ e de ɔ ji anɔkuale, konɛ nyɛ hu nyɛ he ye.
36 Ngɛ anɔkuale mi ɔ, ní nɛ ɔmɛ ya nɔ konɛ ngmami ɔ nɛ e ba mi. Ngmami ɔ de ke: “A be e wu kake ngmelu po kue.”*
37 Nɛ ngmami kpa ko hu de ke: “A maa hyɛ nɔ nɛ a gbɔ lɛ nɔ́ ɔ.”
38 Jehanɛ ɔ, ngɛ ní nɛ ɔmɛ a se ɔ, Yosɛf nɛ e je Arimatia, nɛ e ji Yesu kaselɔ, se Yuda bi ɔmɛ a he gbeye yemi he je ɔ, e ha we nɛ nihi nɛ a le ɔ ya kpa Pilato pɛɛ kaa e ma nyɛ ma ya je Yesu gbogboe ɔ kɛ ho lo, nɛ Pilato ha lɛ he blɔ. Enɛ ɔ he ɔ, e ba nɛ e ba je gbogboe ɔ kɛ ho.
39 Nikodemo, nɛ ji nyumu ɔ nɛ be ko nɛ be ɔ, e ba Yesu ngɔ nyɔ mi ɔ hu ba, e ngɔ mimɛ nɛ a ngɔ alo kɛ futu mi* nɛ́ e jiɔmi maa pee sɛni tɛ lafa kake* kɛ ba.
40 Lɔ ɔ he ɔ, a ngɔ Yesu gbogboe ɔ nɛ a wo lɛ tsopa kɛ e he via a, nɛ a ngɔ klala kɛ blaa lɛ kaa bɔ nɛ Yuda bi ɔmɛ peeɔ kɛ puɔ nɔ ɔ.
41 E ba mi kaa abɔɔ ko ngɛ he nɛ a gbe* Yesu ngɛ ɔ, nɛ yɔkɔ* ko nɛ a to we nɔ ko ngɛ mi hyɛ ngɛ abɔɔ ɔ mi.
42 Akɛnɛ e ji Yuda bi ɔmɛ a He Dlami Ligbi nɛ he nɛ yɔkɔ ɔ ngɛ ɔ hu kɛ lejɛ ɔ kɛ we he je ɔ, a ya to Yesu ngɛ lejɛ ɔ.
Sisi Ningmahi
^ Aloo “wa ngɛ o yi jee.”
^ Aloo “Gbee lɛ ngɛ tso nɔ! Gbee lɛ ngɛ tso nɔ!”
^ Aloo “sɛu lɛ.”
^ Aloo “sɛu mo.”
^ Aloo “teɔ si kɛ woɔ.”
^ Maa pee piani ngmlɛ 12.
^ Aloo “Gbee lɛ ngɛ tso nɔ.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “e gbo.”
^ Aloo “ywiae.”
^ E ma nyɛ maa pee kaa “nɔ́ nɛ a fĩ.”
^ Lɔ ɔ ji Roma bi a sɛni tɛ.
^ Aloo “sɛu.”
^ Aloo “kaimi yɔkɔ.”
