Yoshua 14:1-15
14 Enɛ ɔ ji weto ní nɛ Israel bi ɔmɛ a nine su nɔ ngɛ Kanaan zugba a nɔ. Osɔfo Eleazar kɛ Nun bi Yoshua kɛ a tsɛmɛ ɔmɛ a weku ɔmɛ a nyatsɛmɛ ɔmɛ lɛ a gba weto ní ɔ kɛ ha mɛ.
2 A fɔ̃ sɔ* kɛ gba weto ní ɔ kɛ ha mɛ, kaa bɔ nɛ Yehowa gu Mose nɔ kɛ fã kaa a pee ha wɛtso nɛɛ kɛ fã a.
3 Mose ha wɛtso enyɔ kɛ fã a a weto ní ngɛ Yordan Pa a se* momo, se Levi bi ɔmɛ lɛɛ, e ha we mɛ weto ní ngɛ a kpɛti.
4 A bu Yosef sisi bimɛ ɔmɛ kaa wɛtso enyɔ, Manase kɛ Efraim. Levi wɛtso ɔ lɛɛ a ha we mɛ zugba a eko. Se a ha mɛ mahi nɛ a maa hi mi kɛ lohwehi a ní yemi hehi kɛ ha a lohwe ɔmɛ kɛ he nɛ a kɛ a níhi ma pue.
5 Lɔ ɔ he ɔ, Israel bi ɔmɛ gba zugba a kaa bɔ nɛ Yehowa fã Mose ɔ pɛpɛɛpɛ.
6 Kɛkɛ nɛ Yuda nyumu ɔmɛ ba Yoshua ngɔ ngɛ Gilgal, nɛ Yefune nɛ je Keniz ɔ binyumu Kaleb de lɛ ke: Mo nitsɛ o le nɔ́ nɛ Yehowa de kɛ kɔ i kɛ mo wa he kɛ tsɔɔ anɔkuale Mawu nɔmlɔ Mose ngɛ Kadesh Barnea.
7 Benɛ Yehowa sɔmɔlɔ Mose tsɔ mi kɛ je Kadesh Barnea ke ma ya slaa zugba a, jamɛ a be ɔ, i ye jeha 40. I ba bɔ lɛ nɔ́ nɛ i ya na a pɛpɛɛpɛ.*
8 Ye nyɛmimɛ ɔmɛ nɛ a kɛ mi ya a ha nɛ ma a tsui po,* se imi lɛɛ, i kɛ ye tsui tsuo nyɛɛ Yehowa ye Mawu ɔ se.
9 Jamɛ a ligbi ɔ, Mose kã kita nɛ e de ke: ‘Zugba nɛ o kɛ o nane nyɛɛ nɔ ɔ maa pee o kɛ o bimɛ nyɛ weto ní kɛ ya neneene, ejakaa o kɛ o tsui tsuo nyɛɛ Yehowa ye Mawu ɔ se.’
10 Jehanɛ ɔ, kaa bɔ nɛ Yehowa wo si ɔ, e baa ye yi jeha 45 nɛ ɔ, kɛ je be nɛ Yehowa wo Mose si benɛ Israel bi ɔmɛ nyɛɛ nga a nɔ ɔ; I ngɛ wami mi loloolo kɛ ba si mwɔnɛ ɔ, nɛ i ye jeha 85.
11 Nɛ bɔ nɛ i ngɛ he wami benɛ Mose tsɔ mi ɔ, jã kɛ̃ nɛ i ngɛ mwɔnɛ ɔ. He wami nɛ i ngɛ jamɛ a be ɔ, jamɛ a he wami ɔ nɔuu nɛ i ngɛ amlɔ nɛ ɔ nɛ ma nyɛ kɛ hwu ta nɛ ma kɛ pee ní kpahi hulɔ.
12 Lɔ ɔ he ɔ, ngɔɔ yoku ɔmɛ a nɔ zugba amɛ nɛ Yehowa wo he si ɔ kɛ ha mi. E ngɛ mi kaa jamɛ a ligbi ɔ, o nu kaa a ke Anak bi ngɛ lejɛ ɔ, nɛ a ngɛ ma nguahi nɛ a fia gbogbo kɛ wo he. Se bɔ fɛɛ bɔ nɛ ji ɔ,* Yehowa maa piɛ ye he, nɛ ma fiee mɛ* kaa bɔ nɛ Yehowa wo si ɔ.
13 Kɛkɛ nɛ Yoshua jɔɔ Yefune binyumu Kaleb, nɛ e ngɔ Hebron kɛ ha lɛ kaa e weto ní.
14 Lɔ ɔ he je nɛ Hebron ba pee Yefune nɛ je Keniz ɔ binyumu Kaleb weto ní kɛ ba si mwɔnɛ ɔ nɛ, ejakaa e nyɛɛ Yehowa, Israel Mawu ɔ se kɛ e tsui tsuo.
15 Be ko nɛ be ɔ, Hebron biɛ ji Kiriat Arba (Arba ji nɔmlɔ ngua ngɛ Anak bi ɔmɛ a kpɛti). Nɛ ta se po ngɛ zugba a nɔ.
Sisi Ningmahi
^ Nɛ ji, Yordan Pa a puje he je.
^ Ngɛ Hebri gbi mi ɔ, “I ba bɔ lɛ munyu nɛ ngɛ ye tsui nɔ ɔ pɛpɛɛpɛ.”
^ Ngɛ Hebri gbi mi ɔ, “ha nɛ ma a tsui sile.”
^ Aloo “i ngɛ nɔ mi mami kaa.”
^ Aloo “ma kpɔ̃ a zugba amɛ ngɛ a dɛ.”
