Zefania 1:1-18
1 Yehowa kɛ Zefania* nɛ ji Kushi bi, Gedalia bi, Amaria bi, Hezekia bi ɔ tu munyu ngɛ Yuda matsɛ Yosia nɛ ji Amon bi ɔ be ɔ mi, nɛ e de lɛ ke:
2 “Ma bɛɛ nɔ́ fɛɛ nɔ́ nɛ ngɛ zugba a nɔ ɔ kɛ je pɛsɛpɛsɛ,” Yehowa lɛ de.
3 “Ma bɛɛ adesa kɛ lohwe awi yelɔ kɛ je.
Ma bɛɛ hiɔwe lohwe pɛlitsɛmɛ kɛ wo mi lohi tsuo kɛ je,
Nɛ ma bɛɛ nane tɔ̃tɔ̃mi níhi* kɛ yiwutsotsɛmɛ hu kɛ je;
Nɛ ma je adesahi kɛ je zugba a nɔ,” Yehowa lɛ de.
4 Ma kpa ye nine mi ngɛ Yuda
Kɛ nihi tsuo nɛ a ngɛ Yerusalem ɔ a nɔ,
Nɛ ma bɛɛ Baal kɛ e he nɔ́ fɛɛ nɔ́ kɛ je hiɛ ɔ,
Nɛ a be ma se mawu ɔ we osɔfo ɔmɛ kɛ osɔfo kpa amɛ a biɛ kaie hu,
5 Ma bɛɛ nihi tsuo nɛ a kplãã si kɛ haa hiɔwe tabo ɔ ngɛ tsu yi mi ɔ kɛ je,
Nɛ ma bɛɛ nihi nɛ kplãã si kɛ haa Yehowa nɛ a kãa kita kaa a maa ye lɛ anɔkuale
Nɛ́ jamɛ a be ɔ mi nɔuu a kãa kita kaa a maa ye Malkam anɔkuale ɔ hu kɛ je;
6 Nɛ ma bɛɛ nihi tsuo nɛ kpale ngɛ Yehowa se
Kɛ nihi nɛ a hla we Yehowa se blɔ aloo a bi we blɔ tsɔɔmi kɛ je e ngɔ ɔ.”
7 Nyɛɛ pee dii ngɛ Nyɔmtsɛ Matsɛ Yehowa hɛ mi, ejakaa Yehowa ligbi ɔ su ta.
Yehowa dla afɔle ko kɛ fɔ si; e tsu nihi tsuo nɛ e fɔ̃ mɛ nine ɔ a he.
8 “Ngɛ Yehowa afɔle sami ligbi ɔ nɔ ɔ, ma gbla ganɔhi,
Matsɛ binyumuhi kɛ nihi tsuo nɛ a wo ma se tadehi ɔ a tue.
9 Ngɛ jamɛ a ligbi ɔ nɔ ɔ, ma gbla nɔ fɛɛ nɔ nɛ maa kuɔ kpoku* ɔ tue,
Nɛ ma gbla nihi tsuo nɛ a haa nɛ a nyɔmtsɛ ɔ we ɔ hyiɔ tɔ kɛ basabasa peemi kɛ nɔ sisimi ɔ hu a tue.
10 Yehowa de ke: “Ngɛ jamɛ a ligbi ɔ nɔ ɔ,
Ya nɛ nya wa maa pɛ kɛ je Lo Agbo ɔ he,
A maa wo yana ngɛ ma ehe ɔ mi,
Nɛ a maa nu pɛmi nɛ nya wa he kɛ je yoku ɔmɛ a nɔ.
11 Nyɛɛ wo yana, nyɛ nihi nɛ nyɛ ngɛ Maktesh,*
Ejakaa a kpata jua yeli ɔmɛ tsuo a hɛ mi;*
Nɛ a kpata nihi tsuo nɛ a ngmɛɔ sika hiɔ ɔ hu a hɛ mi.
12 Jamɛ a be ɔ mi ɔ, ma ngɔ kane kɛ ya kpa Yerusalem ma a mi saminya,
Nɛ ma gbla nihi tsuo nɛ a naa a he kaa a he mi jɔ mɛ* nɛ a deɔ ngɛ a tsui mi ke,
‘Yehowa be nɔ́ kpakpa pee nɛ e be nɔ́ yaya hu pee’ ɔ a tue.
13 A ma kpɔ̃ ní nɛ a ná a tsuo ngɛ a dɛ nɛ a we ɔmɛ a hɛ mi ma kpata.
A maa ma wehi, se a be a mi hie;
Nɛ a maa pee wai ngmɔhi, se a be a mi wai ko nue.
14 Yehowa ligbi ngua a su ta!
E su si ta nɛ e ngɛ oya yee* kɛ ma!
Yehowa ligbi ngua a ngɛ gbeye.
Jamɛ a be ɔ mi ɔ, tatsɛ po ma kpa ngmlaa.
15 Jamɛ a ligbi ɔ ji mi mi fumi ligbi,
E ji amanehlu kɛ haomi ligbi,
E ji ahumi kɛ hɛ mi kpatami ligbi,
E ji diblii kɛ diblii kpii ligbi,
E ji bɔkuhi kɛ bɔku kpii ligbi,
16 E ji titimati kɛ ta ose hemi ligbi,
E ji ligbi nɛ a ma ba tua mahi nɛ a fia gbogbo kɛ wo a he kɛ mɔhi nɛ a ka gagaaga nɛ a ngɛ gbogbo ɔ kɔnya a.
17 Ma ngɔ haomi kɛ ba adesahi a nɔ,
Nɛ a maa nyɛɛ kaa hɛ yuyuili,
Ejakaa Yehowa ji nɔ nɛ a pee yayami kɛ si ɔ nɛ.
A ma kpa a muɔ kɛ pue si kaa zu,
Nɛ a ma plɛ a he lo* kɛ pue si kaa fĩ.
18 A sika tsu loo a sika hiɔ ɔ be nyɛe ma he a yi wami ngɛ Yehowa mi mi fumi ligbi ɔ nɔ;
E mi mi fumi ngɛ kaa la nɛ maa sã zugba a tsuo,
Ejakaa e kɛ hɛ mi kpatami maa ba, ee, e kɛ hɛ mi kpatami nɛ ngɛ gbeye maa ba nihi tsuo nɛ a ngɛ zugba a nɔ ɔ a nɔ.”
Sisi Ningmahi
^ E sisi ji “Yehowa Ngɔ Kɛ Laa (E kɛ to).”
^ E ngɛ heii kaa, níhi aloo ní peepeehi nɛ a kɛ amaga jami ngɛ tsakpa.
^ E ma nyɛ maa pee kaa kpoku nɛ a kɛ matsɛ sɛ ma nɔ ɔ.
^ E ngɛ heii kaa Yerusalem ma a fã ko nɛ kɛ Lo Agbo ɔ he kɛ we.
^ Ngɛ Hebri gbi mi ɔ, “a ha nɛ jua yeli ɔmɛ tsuo a nya ma.”
^ Ngɛ Hebri gbi mi ɔ, “nihi nɛ a ngɛ kaa wai sisi nɛ ma.”
^ Aloo “e ngɛ esɔ yee wawɛɛ.”
^ Ngɛ Hebri gbi mi ɔ, “a mini ɔmɛ.”
