Zefania 2:1-15
2 Nyɛ je ma nɛ nɔ́ ko pee we nyɛ zo,
Nyɛ bua nyɛ he nya, ee, nyɛ bua nyɛ he nya.
2 Loko fami ɔ ma bɔni ní tsumi,
Nɛ́ ligbi ɔ maa be kɛ ho kaa tsakati* ɔ,
Loko Yehowa mi mi la a maa ba nyɛ nɔ,
Nɛ́ Yehowa mi mi fumi ligbi ɔ maa ba nyɛ nɔ ɔ,
3 Nyɛ hla Yehowa se blɔ, nyɛ nihi nɛ nyɛ baa nyɛ he si* nɛ́ nyɛ ngɛ zugba a nɔ,
Nɛ́ nyɛ yeɔ e famihi nɛ a da amɛ a nɔ ɔ.*
Nyɛɛ pee nɔ́ nɛ da,* nyɛɛ ba nyɛ he si.*
Alini,* ligbi ɔ nɛ Yehowa mi mi ma fu wawɛɛ ɔ, nyɛɛ lɛɛ a maa laa nyɛ nɔ.
4 Ejakaa Gaza maa pee ma nɛ maa fɔ si gu;
Nɛ Ashkelon maa pee ma doku.
A maa fiee Ashdod kɛ ho piani katakata,
Nɛ a maa hia Ekron kɛ fɔ si.
5 “Musu tloo nyɛ nihi nɛ nyɛ ngɛ wo ɔ nya a, Keretbi ɔmɛ a ma a!
Yehowa bu nyɛ fɔ.
Oo Kanaan, Filistibi a zugba, ma kpata o hɛ mi,
Nɛ nɔ ko nɔ ko be piɛe ngɛ ma a mi.
6 Nɛ wo ɔ nya zugba a ma ba pee lohwehi a ní yemi he,
Nɛ vuhi maa hi nɔ kɛ ha to hyɛli, nɛ to tsuhi nɛ a kɛ tɛ pee maa hi nɔ kɛ ha jijɔhi.
7 E ma ba pee Yuda we ɔ mi bi nɛ a piɛ ɔ a zugba;
A maa ye ní ngɛ lejɛ ɔ.
Ke je jɔ ɔ, a maa hwɔ Ashkelon we ɔmɛ a mi.
Ejakaa Yehowa a Mawu ɔ maa ngɔ e juɛmi kɛ ma a nɔ,*
Nɛ e ma bua a kpɛti nihi nɛ a nuu mɛ nyɔguɛ ɔ a nya kɛ kpale kɛ ba.”
8 “I nu Moabbi ɔmɛ a nɔ he guɛ gbemi ɔ kɛ Ammonbi ɔmɛ a nɔ jɛmi ɔ,
Nihi nɛ a ngɛ ye ma a ahlua bɔe nɛ a ngɛ dee ke a ma kpɔ̃ a zugba a ngɛ a dɛ ɔ.”
9 Enɛ ɔ he ɔ, Yehowa tabohiatsɛ Israel Mawu ɔ ngɛ dee ke: “Be abɔ nɛ i ngɛ wami mi nɛ ɔ,
Moab maa pee kaa Sodom,
Nɛ Ammonbi ɔmɛ maa pee kaa Gomora,
He ko nɛ miohi ngɛ, nɛ́ ngo ha zugba a nɔ tsuo nɛ́ se nami ko be zugba a he kɛ yaa neneene.
Ye ma a mi bi ɔmɛ nɛ a maa piɛ ɔ maa ha a níhi.
Nɛ ye ma a mi bi ɔmɛ nɛ a maa piɛ ɔ ma kpɔ̃ a zugba a ngɛ a dɛ.
10 Nɔ́ nɛ a ma ná ngɛ a he nɔ womi ɔ he je ji nɛ ɔ nɛ,
Ejakaa a bɔ ye ma a ahlua nɛ a wo a he nɔ kɛ si Yehowa tabohiatsɛ ɔ we bi ɔmɛ.
11 Yehowa he nyakpɛ maa pee mɛ* wawɛɛ;
Ejakaa e ma* kpata zugba a nɔ mawu ɔmɛ tsuo a hɛ mi,
Nɛ je ma amɛ a zugbahi nɛ nyu bɔle mɛ ɔ tsuo ma kplã si ha lɛ,*
Nɔ fɛɛ nɔ maa pee jã kɛ je e hi he.
12 Nyɛ Etiopiabi ɔmɛ hu, ye klaate ɔ ma kpata nyɛ hɛ mi.
13 E maa kpa e nine mi kɛ ya yiti je nɛ e ma kpata Asiria hɛ mi,
Nɛ e ma ha nɛ Nineve maa fɔ si gu, nɛ e nɔ ma gbli kaa nga kplanaa.
14 Lohwe lɛlɛɛhi tsuo kɛ lohwe awi yeli tsuo* ma ba bu si ngɛ e mi.
Dɔkɔdɔkɔ nyagagatsɛ kɛ opɛsɛ maa hwɔ e titima yi mi kpɔ ɔmɛ a nɔ nyɔ mi.
Gbi* ko ma la ngɛ saflɛ ɔ mi.
Níhi a hɛ mi ma kpata ngɛ sinya kpoku ɔmɛ a nya;
Ejakaa e ma ha nɛ seda tsohi nɛ a kɛ pee tsu ɔ, a he maa fɔ si gu.
15 Ma nɛ woɔ e he nɔ nɛ e ngɛ slɔkee ɔ ji nɛ ɔ nɛ,
Nɛ e ngɛ dee ngɛ e tsui mi ke, ‘Imi ji nɛ ɔ nɛ, nɛ ye se ɔ nɔ ko be hu.’
Hyɛ bɔ nɛ e ba pee he gbeye womi nɔ́ ha,
He nɛ lohwe awi yeli maa bu si ngɛ!
Nɔ fɛɛ nɔ nɛ ma ba be ɔ ma kpa nyagba nɛ e ma huanya e kɔ̃.”
Sisi Ningmahi
^ Aloo “jakati.”
^ Aloo “nyɛ nihi nɛ nyɛ he jɔ.”
^ Ngɛ Hebri gbi mi ɔ, “e kojomi ɔ nɔ ɔ.”
^ Aloo “Nyɛɛ di dami ní peemi se.”
^ Aloo “nyɛ he nɛ jɔ.”
^ Aloo “E ma nyɛ maa ba kaa.”
^ Aloo “e maa hyɛ a nɔ.”
^ Aloo “gbeye ma pue a nɔ.”
^ Aloo “ha nɛ zugba a nɔ mawu ɔmɛ tsuo maa flãã.”
^ Aloo “ma ja lɛ.”
^ Ngɛ Hebri gbi mi ɔ, “je ma lohwe fɛɛ je ma lohwe.”
^ E ma nyɛ maa pee kaa lohwe pɛlitsɛ ko gbi aloo kɔɔhiɔ.
