Zefania 3:1-20
3 Musu tloo ma nɛ tsɔɔ atuã, nɛ wo e he mu, nɛ yi mi wa a!
2 E bui nɔ ko gbi tue; e kplɛɛ we tsɔsemi ko nɔ.
E kɛ e hɛ fɔ we Yehowa nɔ; e hɛ lɛ kɛ su e Mawu ɔ he.
3 E nikɔtɔma amɛ ji jatahi nɛ a ngɛ huãe.
E kojoli ɔmɛ ji nyɔ mi ogbeteehi;
A si we wu kake po nɛ je nɛ na yi konɛ a kpe.
4 E gbali ɔmɛ bui nɔ ko nɔ ko, lakpatsɛmɛ sɔuu ji mɛ.
E we osɔfo ɔmɛ bleɔ nɔ́ nɛ ngɛ klɔuklɔu;
A kɛ mlaa a tsu we ní.
5 Yehowa ji dalɔ ngɛ ma a mi; e pee we nɔ́ yayami ko.
Daa mɔtu ɔ, e haa nɛ a leɔ e kojomi ɔmɛ,
Kaa bɔ nɛ pu teɔ si daa ligbi ɔ.
Se nihi nɛ a dɛ ɔ lɛɛ, a zo tɔ ywia.
6 “I kpata je ma amɛ a hɛ mi; a si a mɔ gagaaga amɛ nɛ a ngɛ gbogbo ɔ kɔnya a kɛ fɔ si gu.
I puɛ a gbɛjegbɛ ɔmɛ, konɛ nɔ ko nɛ ko be ngɛ nɔ.
A ma amɛ a hɛ mi kpata, nɛ nɔ ko nɔ ko be mi.
7 I de ke, ‘Bɔ fɛɛ bɔ nɛ ji ɔ, o maa ye mi gbeye nɛ o maa kplɛɛ tsɔsemi nɔ,’*
Konɛ a ko kpata e hi he ɔ hɛ mi
Ma gbla e tue ngɛ ní nɛ ɔmɛ tsuo nɛ e pee ɔ he je.
Se mɛ tsuo a fia a pɛɛ si kaa a maa pee nɔ́ yayami mohu.
8 ‘Lɔ ɔ he ɔ, nyɛɛ ya nɔ nɛ nyɛɛ hyɛ mi blɔ,’* Yehowa lɛ de,
‘Kɛ yaa si be nɛ ma te si* nɛ ma tua nihi nɛ ma mwɔɔ a níhi,
Ejakaa i to ye yi mi kaa ma bua je ma amɛ kɛ nɔ yemi ɔmɛ a nya,
Nɛ́ ma plɛ ye mi mi la kɛ abofu nɛ nya wa a tsuo kɛ pue a nɔ;
Ejakaa ye mi mi fumi ɔ ngɛ kaa la nɛ maa sã zugba a tsuo.
9 Ejakaa jamɛ a be ɔ mi ɔ, ma tsake je ma amɛ a gbi kɛ pee gbi nɛ ngɛ klɔuu,
Konɛ mɛ tsuo a tsɛ Yehowa biɛ ɔ,
Nɛ́ a pee kake kɛ sɔmɔ lɛ.’*
10 Nihi nɛ a ngɛ mi pɛɛ kpae, nɛ ji ye we bi nɛ a gbɛ mɛ fĩa a maa ngɔ nike níhi ba ha mi,
Kɛ je Etiopia pa a kpokpa a nɔ.
11 Ngɛ jamɛ a ligbi ɔ nɔ ɔ, a be nyɛ zo gbee
Ngɛ ní yayahi nɛ nyɛ pee kɛ tsɔ ye hɛ mi atuã a tsuo se,
Ejakaa ma je he nɔ woli nɛ́ a fĩaa a kɛ je nyɛ kpɛti;
Nɛ o be o he nɔ woe hu ngɛ ye yoku klɔuklɔu ɔ nɔ.
12 Ma ha nɛ nihi nɛ a baa a he si kɛ nihi nɛ a he jɔ ɔ maa piɛ ngɛ nyɛ kpɛti,
Nɛ a maa sa we ngɛ Yehowa biɛ ɔ mi.
13 Israelbi nɛ maa piɛ ɔ be ní yayahi pee;
A be lakpa yee, nɛ a be sisimi lilɛ ko nae ngɛ a nya mi.
A maa ye ní nɛ a maa hwɔ si, nɛ nɔ ko be a he gbeye woe.
14 Oo Zion biyo, mo nya wawɛɛ!
Oo Israel, mo he kunimi yemi ose!
Oo Yerusalem biyo, o bua nɛ jɔ nɛ o kɛ o tsui tsuo nɛ nya!
15 Yehowa je kojomi ɔmɛ ngɛ o nɔ.
E fiee o he nyɛli ɔmɛ kɛ je.
Yehowa, Israel matsɛ ɔ kɛ mo ngɛ.
O be amanehlu ko gbeye yee hu.
16 Jamɛ a ligbi ɔ, a ma de Yerusalem ke:
“Koo ye gbeye, Oo Zion.
Ko ha nɛ o kɔni mi nɛ jɔ̃.
17 Yehowa o Mawu ɔ kɛ mo ngɛ.
E ngɛ he wami, e ma he o yi wami.
E bua maa jɔ o he wawɛɛ nɛ e ma nya.
E bua maa jɔ ngɛ suɔmi nɛ e ngɛ kɛ ha mo ɔ he je.
E ma nya ngɛ o he je, nɛ e ma he ose.
18 Nihi nɛ ngɛ aywilɛho yee akɛnɛ a ba piɛɛ we o he ngɛ o gbijlɔ ɔmɛ a mi he je ɔ, ma bua a nya;
A ba piɛɛ we o he ejakaa e we ahlua bɔmi ɔ ngɛ a nɔ.
19 Hyɛ! Jamɛ a be ɔ mi ɔ, ma te si kɛ wo nihi nɛ waa mo yi mi ɔ;
Nɛ ma he nɔ nɛ ngɛ kpɛ̃ɛ̃e ɔ yi wami,
Nɛ ma bua nihi nɛ a gbɛ fĩa a, a nya.
Ma ha nɛ nihi ma je nyɛ yi nɛ nyɛ ma he biɛ
Ngɛ zugbahi tsuo nɛ a hɛ mi pue si ngɛ nɔ ɔ nɔ.
20 Jamɛ a be ɔ mi ɔ, ma kpale nyɛ kɛ ba we mi.Ee, jamɛ a be ɔ mi ɔ, ma bua nyɛ nya.
Ma ha nɛ nyɛ ma he biɛ nɛ nihi ma je nyɛ yi ngɛ nihi tsuo nɛ a ngɛ zugba a nɔ ɔ a kpɛti,Benɛ ma ha nɛ o nihi nɛ a nuu mɛ nyɔguɛ ɔ tsuo maa kpale a se kɛ ba a,” Yehowa lɛ de.
Sisi Ningmahi
^ Aloo “o ma ha nɛ a dla mo.”
^ Aloo “nyɛɛ to nyɛ tsui si kɛ mlɛ.”
^ Baiblo komɛ de ke “ma te si kaa odase.”
^ Aloo “a pee kake kɛ ja lɛ.”
