Benɛ a wo Paulo kɛ Sila tsu ɔ, a la kɛ je Mawu yi. (Níts 16:25) Ngɛ wa be nɛ ɔ mi hu ɔ, nyɛmimɛ komɛ nɛ a wo mɛ tsu ngɛ Germany kɛ Siberia a la Matsɛ Yemi lahi. Nazi nɔ yemi ɔ wo a ti ni komɛ tsu ngɛ Sachsenhausen tsu womi he ɔ, nɛ a kɛ ni komɛ hu ho Siberia ya. Nɔ hyɛmi ní nɛ ɔmɛ haa nɛ wa naa kaa ke Kristofohi kɛ kahi ngɛ kpee nɛ a la a, e ma nyɛ maa wo mɛ kã.

E be kɛe nɛ gbi kpahi fuu ma ná la womi ehe nɛ ji “Sing Out Joyfully” to Jehovah a eko. Ke wa nine su wa nɔ́ ɔ nɔ pɛ ɔ, wa ma nyɛ maa kase la a mi munyu ɔmɛ saminya ngɛ wa weku Mawu jami ɔ mi konɛ a tlɔ wa yi mi. (Efe 5:19) Ke wa pee jã a, mumi klɔuklɔu ɔ maa ye bua wɔ nɛ wa ma kai la amɛ ke waa kɛ kahi kpe hwɔɔ se. Matsɛ Yemi lahi yeɔ bua wɔ nɛ wa juɛmi hiɔ wa hɛ nɔ kami ɔ nɔ. A woɔ wɔ kã ngɛ ka behi a mi. Ngɛ bua jɔmi behi hu a mi ɔ, la a mi munyu ɔmɛ woɔ wɔ he wami, nɛ wa ‘laa kɛ bua jɔmi’ ejakaa bua jɔmi hyi wa tsui mi tɔ. (1Kron 15:16; La 33:1-3) Nyɛ ha waa bɔ mɔde nɛ wa la Matsɛ Yemi la amɛ konɛ wa ná he se.

NYƐƐ HYƐ VIDEO NƐ JI, LA KO NƐ WO NYƐMIMƐ NƐ A WO MƐ TSU HE WAMI. LƆ Ɔ SE Ɔ, NYƐ HA SANE BIMIHI NƐ NYƐƐ SE Ɔ A HETO:

• Mɛni si fɔfɔɛ mi nɛ nyɛminyumu Frost po la ko ngɛ?

• Kɛ la a wo nyɛmimɛ nyumuhi nɛ a ngɛ Sachsenhausen tsu womi he ɔ kã ha kɛɛ?

• Mɛni si fɔfɔɛhi a mi nɛ o ma nyɛ ma la Matsɛ Yemi lahi ngɛ konɛ e wo mo kã?

• Mɛni Matsɛ Yemi lahi o suɔ kaa o maa kase kɛ wo o yi mi?