KRISTOFOHI A SI HIMI
Wa He Nɛ Maa Be Ngɛ Fiɛɛmi Ní Tsumi ɔ Mi
NƆ́ HE JE NƐ E HE HIA: Ja Baiblo mi ní kaseli jɔɔ a he nɔ kɛ ha Yehowa nɛ a ha nɛ a baptisi mɛ loko Yehowa maa kplɛɛ a nɔ. (1Pet 3:21) Ke a ya nɔ nɛ a ye Yehowa anɔkuale ɔ, e maa po huɛ bɔmi nɛ ngɛ e kɛ mɛ kpɛti ɔ he piɛ. (La 91:1, 2) Ke Kristofo no ko jɔɔ e he nɔ ɔ, Yehowa ji nɔ nɛ e jɔɔ e he nɔ kɛ ha, se pi adesa ko, ní tsumi ko, loo asafo ko. Enɛ ɔ he je ɔ, e he hia nɛ ní kaseli ɔmɛ nɛ a ná suɔmi kɛ ha Yehowa nɛ a bua nɛ jɔ e he wawɛɛ.
BLƆ NƆ NƐ O MAA GU KƐ PEE:
-
Ke nyɛ ngɛ ní kasee ɔ, moo tsɔɔ lɛ nɔ́ nɛ munyu nɛ nyɛ ngɛ kasee ɔ tsɔɔ ngɛ Yehowa he. Ha nɛ e na kaa e he hia nɛ e kane Baiblo ɔ daa ligbi nɛ e sɔle kɛ ha Yehowa “be tsuaa be.”
—1Tes 5:17; Yak 4:8 -
Moo wo ní kaselɔ ɔ he wami konɛ e kɛ pee oti kaa e maa jɔɔ e he nɔ nɛ a baptisi lɛ. Jehanɛ se hu ɔ, ye bua lɛ nɛ e nyɛ nɛ e ha sane bimihi a heto ngɛ asafo mi kpehi a sisi, nɛ e ye nihi nɛ a ngɛ e kpɔ ɔ mi, kɛ nihi nɛ e kɛ mɛ tsuɔ ní ɔ odase. O hɛ nɛ hi nɔ kaa Yehowa nyɛ we nɔ ko nɔ kaa e sɔmɔ lɛ. Wɔ nitsɛmɛ lɛ wa maa mwɔ wa yi mi kpɔ kaa wa maa jɔɔ wa he nɔ kɛ ha Yehowa aloo wa be jã pee.
—5Mo 30:19, 20 -
Moo wo ní kaselɔ ɔ he wami nɛ e pee tsakemihi nɛ ma ha nɛ Yehowa bua maa jɔ e he konɛ a nyɛ nɛ a baptisi lɛ. (Abɛ 27:11) Akɛnɛ su yaya komɛ a kpami yee he je ɔ, eko ɔ e ma bi nɛ o ya nɔ nɛ o ye bua Baiblo mi ní kaselɔ ɔ konɛ e je nɔmlɔ su momo ɔ kɛ fɔ he, nɛ e wo nɔmlɔ su ehe ɔ. (Efe 4:22-24) O kɛ lɛ nɛ susu munyu nɛ ji, “Baiblo ɔ Tsakeɔ Nihi A Si Himi” nɛ baa Hwɔɔmi Mɔ ɔ mi ɔ eko he.
-
Mo de lɛ jɔɔmihi nɛ o ngɛ náe akɛnɛ o ngɛ Yehowa sɔmɔe ɔ he je.—Yes 48:17, 18
