NƆ́ HE JE NƐ E HE HIA: Ke ‘juɛmi nɛ ngɛ nɔmlɔ adesa yi mi ɔ mi kuɔ kaa nyu ngɛ vu mi tsitsaa lokoo’ ɔ, lɛɛ sane bimi ngɛ kaa goga nɛ a kɛ ma nyɛ ma sa. (Abɛ 20:5) Sane bimi haa nɛ wa tue buli ɔmɛ ngɔɔ a he kɛ woɔ ní sɛɛmi ɔ mi. Ke wa biɔ nihi sanehi nɛ sa a, hetohi nɛ a ma ha a ma ha nɛ wa maa le níhi nɛ ngɛ a tsui mi. Yesu ngɔ sane bimihi kɛ tsu ní saminya. Mɛni blɔ nɔ wa maa gu kɛ kase lɛ?

BLƆ NƆ NƐ O MAA GU KƐ PEE:

• Bi sanehi nɛ ma ha nɛ o maa le nɔ́ nɛ ngɛ nɔ ɔ tsui mi. Yesu bi e kaseli ɔmɛ sanehi nɛ sa konɛ e kɛ le a susumi. (Mat 16:13-16; be-E 238 ¶3-5) Mɛni sanehi o ma nyɛ ma bi nɔ ko konɛ o kɛ le nɔ́ nɛ ngɛ e tsui mi?

• Bi sanehi nɛ maa gbla nɔ ɔ juɛmi kɛ ba heto ɔ nɔ. Bɔ nɛ pee nɛ Yesu nɛ e nyɛ nɛ e dla susumi nɛ dɛ nɛ Petro hɛɛ ɔ, e ngɔ hetohi kɛ piɛɛ sanehi nɛ e bi Petro ɔ he. Enɛ ɔ ha nɛ Petro nyɛ nɛ e ma e juɛmi nya si ngɛ blɔ nɛ da nɔ. (Mat 17:24-26) Mɛni sanehi o ma nyɛ ma bi konɛ o kɛ ye bua nihi nɛ a nyɛ nɛ a ma a juɛmi nya si ngɛ blɔ nɛ da nɔ?

• Mo je nɔ ɔ yi. Benɛ womi ngmalɔ ko ha Yesu sane bimi ɔ “heto ngɛ ní lemi nya” a, Yesu je e yi. (Mak 12:34) Ke o bi nɔ ko sane nɛ e ha mo heto ɔ, kɛ o ma plɛ kɛ je e yi ha kɛɛ?

NYƐƐ HYƐ VIDEO NƐ JI, MO TSU NÍ TSUMI NƐ YESU TSU Ɔ EKO​—MOO TSƆƆ NÍ, KEKLEEKLE FàA. LƆ Ɔ SE Ɔ, NYƐ HA SANE BIMI NƐ ƆMƐ A HETO:

• E ngɛ mi kaa níhi nɛ a susu he ɔ da mohu lɛɛ, se mɛni he je nɛ e ji ní tsɔɔmi yaya a?

• Mɛni he je nɛ e sa kaa waa pee babauu pe níhi a mi nɛ wa maa tsɔɔ nihi kɛkɛ ɔ?

NYƐƐ HYƐ VIDEO Ɔ FÃ ENYƆNE Ɔ. LƆ Ɔ SE Ɔ, NYƐ HA SANE BIMI NƐ ƆMƐ A HETO:

• Ngɛ mɛni blɔ nɔ nɛ nyɛminyumu ɔ ngɔ sane bimihi kɛ tsu ní saminya?

• Mɛni ní kpahi wa ma nyɛ maa kase ngɛ e ní tsɔɔmi ɔ he?