KRISTOFOHI A SI HIMI
Yaa Nɔ Nɛ O Kɛ Si Fimi Nɛ Mlɛ
Be enyɛmɛ ji nɛ ɔ nɛ o ngɛ mlɛe kaa Mawu Matsɛ Yemi ɔ nɛ ba? Anɛ o kɛ si fimi ngɛ mlɛe ngɛ nyagbahi nɛ o kɛ ngɛ kpee ɔ tsuo se lo? (Ro 8:25) Kristofohi komɛ kɛ haomi nɛ ɔmɛ ngɛ kpee wawɛɛ: Ninyɛ, basabasa peemi, tsu womi, aloo a woɔ a he gbeye kaa a maa gbe mɛ. Nyagba nɛ ni kpahi hu kɛ ngɛ kpee ji hiɔ nɛ mi wa aloo bwɔmi.
Mɛni maa ye bua wɔ konɛ waa kɛ blɔ hyɛmi nitsɛ nɛ mlɛ ke waa kɛ haomi ko ngɛ kpee? E sa nɛ wa ha nɛ wa hemi kɛ yemi ɔ mi nɛ wa kɛ gu Baiblo ɔ nɛ wa maa kane daa ligbi nɛ wa ma pue wa yi mi tɛ ngɛ he ɔ nɔ. E sa nɛ waa ngɔ wa juɛmi kɛ ma wa hɛ kɛ nɔ fɔmi ɔ nɔ. (2Ko 4:16-18; Heb 12:2) E sa nɛ wa kpa Yehowa pɛɛ ngɛ sɔlemi mi nɛ e ngɔ e mumi klɔuklɔu ɔ kɛ wo wɔ he wami. (Luk 11:10, 13; Heb 5:7) Wa Tsɛ nɛ ngɛ suɔmi ɔ ma nyɛ maa ye bua wɔ konɛ waa “kɛ tsui si tomi kɛ bua jɔmi nɛ fĩ si saminya.”—Kol 1:11.
NYƐƐ HYƐ VIDEO NƐ JI E SA NƐ “WAA KƐ HƐ MI MIAMI NƐ TU FO Ɔ”—MO NÁ HEMI KƐ YEMI KAA O NINE MAA SU HIƆWO Ɔ NƆ, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:
-
Mɛni ji ‘haomihi nɛ a baa tlukaa’ a ekomɛ? (Fiɛlɔ 9:11)
-
Mɛni blɔ nɔ nɛ sɔlemi yeɔ bua wɔ ke waa kɛ haomihi ngɛ kpee?
-
Ke wa nyɛ we nɛ wa tsu babauu ngɛ Yehowa sɔmɔmi mi kaa bɔ nɛ wa pee be ko nɛ be ɔ, mɛni he je nɛ e sa kaa waa ngɔ wa juɛmi kɛ ma nɔ́ nɛ wa ma nyɛ maa pee ɔ nɔ ɔ?
-
O hɛ nɛ hi hiɔwo ɔ nɔ
Mɛni haa nɛ o náa nɔ mi mami kaa o nine maa su hiɔwo ɔ nɔ ɔ?
