Ke o na bɔ nɛ mɔmɔ ko ngɛ fɛu ha, bɔ nɛ dodoehi hyiɔ hiɔwe gbɔkuɛ ha, loo ke o na pa ko nɛ ngɛ bee kɛ ngɛ dɔgba ko mi puee ɔ, anɛ o naa kaa e ji Bɔlɔ ɔ nine nya ní tsumi lo? Nibɔ níhi nɛ a bɔle wɔ ɔ jeɔ Yehowa suhi nɛ wa nɛ kɛ hɛ ngmɛ ɔ kpo. (Ro 1:20) Ke wa he ɔ be nɛ wa pueɔ wa yi mi tɛ ngɛ níhi nɛ wa naa kɛ wa hɛ ngmɛ ɔmɛ a he ɔ, wa maa na kaa Mawu ngɛ he wami, suɔmi, nile, e yeɔ dami sane, nɛ jehanɛ hu e mi mi hi.​—La 104:24.

Mɛni ji ní komɛ nɛ Yehowa bɔ nɛ o naa daa ligbi? Ke o ngɛ ma ngua ko mi po ɔ, o ma nyɛ maa na lohwe pɛlitsɛmɛ aloo tsohi. Ke wa hyɛɛ Yehowa nibɔ ní ɔmɛ saminya a, e ma nyɛ maa ye bua wɔ nɛ wa be yeyeeye pee tsɔ ngɛ si himi mi, mohu ɔ, waa kɛ wa juɛmi maa ma níhi nɛ a he hia wawɛɛ ɔmɛ a nɔ, nɛ e ma ha nɛ hemi kɛ yemi nɛ wa ngɛ ngɛ Yehowa mi kaa e maa ye bua wɔ kɛ maa ya neneene ɔ mi maa wa. (Mat 6:25-32) Ke o ngɛ bimɛ ɔ, moo ye bua mɛ nɛ a na Yehowa suhi nɛ a nɔ kuɔ ɔmɛ. Ke wa yaa nɔ nɛ wa jeɔ hɛ sa kpo ngɛ nibɔ níhi nɛ bɔle wɔ nɛ wa naa amɛ a he ɔ, wa maa hɛ kɛ su wa Bɔlɔ ɔ he wawɛɛ nitsɛ.​—La 8:3, 4.

NYƐƐ HYƐ VIDEO NƐ JI ADEBƆ NÍHI WOƆ MAWU HƐ MI NYAMI—PU LA KƐ KƆLA, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni haa nɛ wa naa kɔla?

• Mɛni he je nɛ kɔla komɛ tsakeɔ?

• Mɛni he je nɛ wa naa kɔla slɔɔtohi ngɛ hiɔwe ɔ?

• Mɛni ji kɔla komɛ nɛ ngɛ nibɔ níhi a he nɛ o naa ngɛ o kpɔ ɔ mi?

• Mɛni he je nɛ e sa kaa wa he be kɛ hyɛ adebɔ níhi nɛ ngɛ je ɔ mi ɔ?