Wa suɔ nɛ wa pue anɔkuale wuhi nɛ wa du ɔmɛ a nɔ nyu. (1Kor 3:6) Ke wa na nɔ ko nɛ e bua jɔ munyu ɔ he ɔ, e maa hi kaa wa ma si sane bimi ko ha lɛ, konɛ ke wa kpale ya slaa lɛ ɔ, waa kɛ lɛ nɛ susu he. Enɛ ɔ ma ha nɛ wetsɛ ɔ maa hyɛ wa blɔ mi, nɛ e maa ye bua wɔ nɛ wa be be fuu puɛe kɛ dla wa he. Ke wa ya slaa lɛ ɔ, wa ma nyɛ ma de lɛ kaa wa ba konɛ wa ba ha sane bimi nɛ wa si ha lɛ ɔ heto.

• Ke o ngɛ o he dlae kɛ ha wehi a mi fiɛɛmi ɔ, hla sane bimi ko nɛ o kɛ ma si wetsɛ ɔ, konɛ ke o kpale ya slaa lɛ ɔ, nɛ o ha lɛ heto. Wa ma nyɛ ma bi lɛ sane ko nɛ a ha heto ngɛ womi nɛ waa kɛ ngɛ hae jamɛ a ligbi ɔ mi. Aloo wa ma nyɛ ma bi lɛ sane ko nɛ a ha heto ngɛ womi nɛ waa kɛ nihi kaseɔ ɔ eko mi, ke wa to kaa waa kɛ lɛ maa kase jamɛ a womi ɔ.

• Ke wetsɛ ɔ bua jɔ ní sɛɛmi ɔ he ɔ, ha nɛ e le kaa o suɔ nɛ nyɛ tsa ní sɛɛmi ɔ nɔ be kpa, nɛ o si lɛ sane nɛ o to kaa o ma bi lɛ ɔ loko o je. Ke e maa hi ɔ, moo ngɔ e tɛlifoo nɔma kɛ e adrɛs.

• Ke o wo wetsɛ ko si kaa o maa ya e ngɔ ngɛ be pɔtɛɛ ko mi ɔ, bɔɔ mɔde nɛ o ye o si womi ɔ nɔ.—Mat 5:37.