Ngɔɔ lɛ kaa o ngɛ Galilea ngɛ Yesu be ɔ mi. O hia blɔ kɛ ya Yerusalem konɛ o ya ye Gbasisihimi Nyami ɔ. Kristofohi fuu nɛ a je ma se tsitsaa hu ba, enɛ ɔ he ɔ, nihi a he hiɛ ngɛ ma a mi wawɛɛ nitsɛ. O suɔ nɛ o sã afɔle kɛ ha Yehowa. Enɛ ɔ he ɔ, o gu nimli asafo ɔ kpɛti kɛ yaa sɔlemi we ɔ kɛ o dɛ mi to nɛ o kɛ maa sã afɔle ɔ. Benɛ o su lejɛ ɔ, o na kaa ni kpahi nɛ mɛ hu a ba afɔle sami ɔ hyi sɔlemi we ɔ tɔ. Be bɔɔ se ɔ, e su o nɔ nɛ́ o kɛ o to ɔ ma ha osɔfo ɔmɛ. Amlɔ nɔuu nɛ o kai kaa o nyɛmi ko kɛ mo ngɛ sane. Eko ɔ, o nyɛmi ɔ hu piɛɛ nimli asafo ɔ he loo eko ɔ, e ngɛ ma a mi. Yesu tsɔɔ nɔ́ nɛ e sa kaa o pee. (Kane Mateo 5:24.) Kaa bɔ nɛ Yesu tsɔɔ ɔ, mɛni o kɛ o nyɛmi ɔ nɛ e mi mi fu mo ɔ maa pee kɛ di tue mi jɔmi se? Mo kadi heto nɛ da ngɛ munyuhi nɛ nyɛɛ se ɔ, a mi.

E SA KAA . . .

• loko o kɛ o nyɛmi ɔ maa tu munyu ɔ, o na kaa yi mi tomi kpakpa ko he je nɛ e mi mi fu mo ngɛ

• o bɔ mɔde kaa o ma dla o nyɛmi ɔ juɛmi ke o susu kaa e mi mi fuɔ mlamlaamla tsɔ, aloo nyagba a fã je lɛ

• o to o tsui si nɛ o bu lɛ tue ke e ngɛ mo sane ɔ nya tsɔɔe. Ke o nui lɛ sisi saminya po ɔ, moo je o tsui mi nɛ o kpa lɛ pɛɛ kaa pi nɛ o je blɔ kaa o maa wo e mi mi la

E SA NƐ O NYƐMI Ɔ NƐ E . . .

• ya bɔ nyɛmimɛ nɛ a ngɛ asafo ɔ mi ɔ nɔ́ nɛ o pee lɛ ɔ, konɛ a fĩ e se

• kã o hɛ mi, e tsɔɔ mo o tɔmi ɔ mi fitsofitso, nɛ e ha nɛ o kplɛɛ nɔ kaa o tɔ̃ e nɔ

• yɔse kaa o ba o he si, nɛ o pee kã loko o nyɛ nɛ o su e he, enɛ ɔ he ɔ, e sa nɛ e je e tsui mi nɛ e kɛ pa mo

E ngɛ mi kaa mwɔnɛ ɔ, waa kɛ lohwehi sɛ̃ afɔle ngɛ wa jami mi mohu lɛɛ, se kaa bɔ nɛ Yesu tsɔɔ ɔ, mɛni tsakpa ngɛ wa sɔmɔmi nɛ Mawu maa kplɛɛ nɔ kɛ tue mi jɔmi nɛ maa hi waa kɛ wa nyɛmimɛ wa kpɛti ɔ mi?