Yehowa naa gba si himi kita a kaa nɔ́ ko nɛ hɛdɔ ngɛ he, nɛ e suɔ kaa huno ɔ kɛ yo ɔ nɛ a mɛtɛ a sibi a he. (Mat 19:5, 6) Bua jɔmi ngɛ Mawu we bi fuu a gba si himi ɔ mi. Se kɛ̃ ɔ, gba si himi ko be nɛ e ye mluku, nyagbahi nyɛɔ baa. E sa kaa wa kua susumi nɛ nihi babauu hɛɛ kaa ke a je gba aloo a po gba mi ɔ, lɔ ɔ ji nɔ́ nɛ ma tsu nyagbahi nɛ a kɛ ngɛ kpee ɔ he ní. Mɛni nɛ Kristofohi nɛ a sɛ gba si himi mi ɔ maa pee kɛ po a gba si himi ɔ he piɛ?

Níhi enuɔ nɛ a he hia nɛ nyɛɛ se nɛ ɔ maa ye bua mo.

1. Moo po o tsui ɔ he piɛ kɛ gu níhi nɛ ma nyɛ ma puɛ o gba si himi ɔ nɛ o maa yu o he kɛ je he ɔ he. Ekomɛ ji, ní peepee nɛ ma ha nɛ nɔ kpa ma susu kaa o ná e he suɔmi kɛ hɛja jemi nɛ sɛ.​—Mat 5:28; 2Pe 2:14.

2. Ha nɛ huɛ bɔmi nɛ ngɛ o kɛ Mawu nyɛ kpɛti ɔ mi nɛ wa, nɛ o ya nɔ nɛ o pee níhi nɛ maa sa e hɛ mi ngɛ o gba si himi ɔ mi.​—La 97:10.

3. Yaa nɔ nɛ o wo su ehe ɔ, nɛ o pee ní tsɔwitsɔwihi kɛ je mi mi jɔmi kpo kɛ tsɔɔ o he piɛɛlɔ ɔ konɛ e bua nɛ jɔ.​—Kol 3:8-10, 12-14.

4. Nyɛ ha nɛ ní sɛɛmi kpakpa nɛ hi nyɛ kpɛti be fɛɛ be, nɛ nyɛɛ kɛ bumi nɛ pee jã.​—Kol 4:6.

5. Nyɛɛ je suɔmi mi nɛ nyɛ ha nyɛ sibi gba si himi blɔ nya nɔ́ ɔ, nɛ́ nyɛɛ nu he ha nyɛ sibi.​—1Ko 7:3, 4; 10:24.

Ke Kristofohi ngɛ bumi kɛ ha gba si himi ɔ, lɔ ɔ tsɔɔ kaa a woɔ Yehowa, nɛ ji gba si himi Sisi Tolɔ ɔ hɛ mi nyami.

NYƐƐ HYƐ VIDEO NƐ JI, E SA NƐ “WAA KƐ HƐ MI MIAMI NƐ TU FO Ɔ”​—MOO YE FO Ɔ KAMI HE MLAA AMƐ A NƆ, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• E ngɛ mi kaa ke nihi sɛ gba si himi mi ɔ, sisije ɔ níhi yaa nɔ saminya, se mɛni nyagbahi lɛ ma nyɛ maa ba?

• Ngɛ mɛni blɔ nɔ nɛ Baiblo sisi tomi mlaahi ma nyɛ maa ye bua nihi nɛ e peeɔ mɛ kaa suɔmi be a gba si himi ɔ mi ɔ?

• Mɛni blɔ tsɔɔmihi nɛ Yehowa kɛ ha ngɛ gba si himi he?

• Loko gba si himi maa ye manye ɔ, mɛni nɛ e sa kaa nyumu ɔ kɛ yo ɔ tsuo nɛ a pee?