Ngɛ je nɛ ɔ mi ɔ, nihi tsɛɛ kpakpa ke yayami nɛ a tsɛɛ yayami ke kpakpa. (Yes 5:20) Aywilɛho sane ji kaa ni komɛ peeɔ níhi nɛ Yehowa sume, kaa nyumu kɛ nyumu aloo yo kɛ yo nɛ a kɛ a he woɔ je mi bami yayami mi. Nihewi kɛ yihewi nɛ wa suɔ mɛ ɔ a juami bi nɛ a kɛ mɛ yaa sukuu aloo ni kpahi maa bɔ mɔde kaa a maa sisi mɛ konɛ a nyɛɛ a se. Kɛ o ma plɛ kɛ ye bua o bimɛ konɛ a nyɛ nɛ a da ka nɛ ɔ kɛ ka kpahi nɛ ngɛ kaa enɛ ɔ nya ha kɛɛ?

Moo tsɔɔ o bimɛ Yehowa mlaa amɛ. (3Mo 18:3) Moo tsɔɔ mɛ nɔ́ nɛ Baiblo ɔ de ngɛ bɔmi nami he ɔ bɔɔbɔɔbɔɔ. E sa nɛ o da jeha nɛ a ye kɛ níhi nɛ a ma nyɛ maa nu sisi ɔ nɔ kɛ pee jã. (5Mo 6:7) Mo bi o he ke: ‘Anɛ i tsɔɔ ye bimɛ blɔ nɛ da nɛ a guɔ nɔ kɛ jeɔ suɔmi kpo kɛ tsɔɔ ni kpahi lo? Anɛ i tsɔɔ mɛ nɔ́ he je nɛ e sa kaa a wo tade nɛ sa, kɛ nɔ́ he je nɛ e sɛ kaa a ngmɛ blɔ nɛ ni kpahi nɛ a na a nɔmlɔ tso ɔ hehi nɛ e sɛ kaa nɔ ko naa a lo? Anɛ ye bimɛ ɔmɛ le nɔ́ nɛ e sa kaa a pee ke nɔ ko ngɛ hlae nɛ e ngɔ ajuama bɔmi he fonihi loo videohi kɛ tsɔɔ mɛ aloo e de mɛ kaa a pee nɔ́ ko nɛ Yehowa sume ɔ lo?’ Ke a le nɔ́ nɛ a maa pee ɔ kɛ sɛ hlami ɔ, e ma nyɛ maa ye bua mɛ konɛ a ko sɛ haomi mi. (Abɛ 27:12; Fiɛlɔ 7:12) Ke o tsɔse o bimɛ ɔ, lɔ ɔ tsɔɔ kaa o ngɛ suɔmi kɛ ha weto ní nɛ e he jua wa nɛ Yehowa kɛ ha mo ɔ.​—La 127:3.

NYƐƐ HYƐ VIDEO NƐ JI, MOO MA TSU NƐ MAA DA SI​—BUU O BIMƐ A HE KƐ JE “NƆ́ YAYAMI” HE, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni he je nɛ e he waa kɛ haa fɔli komɛ kaa a maa tsɔɔ a bimɛ bɔmi nami he ní ɔ?

• Mɛni he je nɛ e sa nɛ fɔli nɛ a tsɔɔ a bimɛ ní ngɛ “Yehowa tsɔsemi kɛ e ga womi” mi ɔ?​—Efe 6:4

• Mɛni níhi nɛ Yehowa asafo ɔ pee nɛ maa ye bua fɔli konɛ a tsɔɔ a bimɛ bɔmi nami he ní?​—w19.05 12, daka

• Mɛni he je nɛ e sa nɛ o kɛ o bimɛ nɛ pɔ ní sɛɛmi loko a kɛ nyagbahi nɛ bɔni kpemi ɔ?