KRISTOFOHI A SI HIMI
Dla O He Kɛ Ha Hiɔ Ko Nɛ Ma Nyɛ Maa Fia Mo Tlukaa a
Mɛni he je nɛ e sa nɛ o dla o he? Hiɔ ko ma nyɛ maa fia wɔ tlukaa nɛ wa be he okadi ko nae kɛ sɛ hlami. Lɔ ɔ he ɔ, moo pee nɔ́ fɛɛ nɔ́ nɛ o ma nyɛ kɛ dla o he kɛ fɔ si amlɔ nɛ ɔ konɛ ke hiɔ ko fia mo tlukaa a, o nine nɛ su hiɔ tsami blɔ nɔ tomi nɛ hi pe kulaa nɔ. Ke o pee jã a, lɔ ɔ tsɔɔ kaa o ngɛ bumi kɛ ha wami kɛ Yehowa mlaa nɛ kɔ muɔ he ɔ.—Nít 15:28, 29.
Mɛni o ma nyɛ maa pee kɛ dla o he?
-
Moo sɔle nɛ o ngma hiɔ tsami he mlaa womi (DPA) ɔ nɔ ní saminya. a Nihi nɛ a baptisi mɛ ɔ ma nyɛ maa ngɔ DPA ɔ eko ngɛ womi nɔ hyɛlɔ ɔ dɛ, nɛ jehanɛ se hu a ma nyɛ maa ngɔ Identity Card (ic) ɔ eko kɛ ha a bimɛ tsɔwihi
-
Ke hɔ ngɛ o he ɔ, mo bi asafo mi nikɔtɔma amɛ nɛ a ha mo Information for Expectant Mothers (S-401) womi ɔ eko. Womi nɛ ɔ maa ye bua mo konɛ o mwɔ yi mi kpɔhi nɛ da ngɛ hiɔ tsami sanehi nɛ ma nyɛ maa ba ngɛ o hɔ ngɔmi kɛ o fɔmi mi ɔ he
-
Ke o maa hia hiɔ tsami blɔ nɔ tomi ko aloo e ma bi nɛ o ya hwɔ hiɔ tsami he ko ɔ, ha nɛ o we asafo mi nikɔtɔma amɛ nɛ a le kɛ sɛ hlami nɛ o de dɔkita a kaa Yehowa Odasefo ɔmɛ a kpɛti ni komɛ ma nyɛ ma ba slaa mo
Mɛni asafo mi nikɔtɔma amɛ ma nyɛ maa pee kɛ ye bua? A ma nyɛ maa ye bua mo kɛ ngma o DPA womi ɔ nɔ ní. Se kɛ̃ ɔ, asafo mi nikɔtɔma amɛ be yi mi kpɔ mwɔe ha mo ngɛ hiɔ tsami blɔ nɔ tomi nɛ e sa nɛ o kɛ tsu ní loo ngɛ níhi nɛ e sa kaa mo nitsɛ o mwɔ o yi mi kpɔ ngɛ a he ɔ he. (Ro 14:12; Gal 6:5) Ke o de o we asafo mi nikɔtɔma amɛ kaa o kɛ hiɔ tsami blɔ nɔ tomi ko nɛ a kɛ muɔ ma tsu ní ngɛ mi he sane ko ngɛ kpee ɔ, a kɛ oya yemi maa bɔ Hiɔ Tsami He Kɛ Ní Sɛɛmi Ajla Toli (HLC) ɔmɛ amaniɛ.
Mɛni blɔ nɔ nɛ HLC bi ɔmɛ maa gu kɛ ye bua mo? A tsɔse nyɛmimɛ nyumuhi nɛ a sɔmɔɔ kaa HLC ɔ saminya konɛ a ye bua dɔkitahi nɛ á le wa si dami kɛ kɔɔ muɔ he. A kɛ o dɔkita a ma nyɛ maa sɛɛ hiɔ tsami blɔ nɔ tomi slɔɔtohi nɛ a kɛ muɔ tsu we ní ngɛ mi ɔ he ní. Ke e he maa hia a, a ma nyɛ maa ye bua mo konɛ o na dɔkita kpa nɛ e kɛ muɔ be ní tsue ngɛ o blɔ fami.
NYƐƐ HYƐ VIDEO NƐ JI, BƆ NƐ O MAA MWƆ YI MI KPƆ NGƐ HIƆ TSAMI NƐ A KƐ MUƆ MA TSU NÍ NGƐ MI Ɔ HE HA, LƆ Ɔ SE Ɔ, NYƐ HA SANE BIMI NƐ Ɔ HETO:
-
Mɛni o kase ngɛ video nɛ ɔ mi nɛ ma nyɛ maa ye bua mo konɛ o dla o he kɛ ha hiɔ ko nɛ ma nyɛ maa fia mo tlukaa nɛ ma bi nɛ a ha mo muɔ ɔ?
a Ní kasemi 39 nɛ ngɛ Ná Bua Jɔmi Kɛ Ya Neneene womi ɔ mi ɔ maa ye bua mo konɛ o mwɔ yi mi kpɔ nɛ da ngɛ hiɔ tsami blɔ nɔ tomi nɛ a kɛ muɔ ma tsu ní ngɛ mi ɔ he.
