Nɔ́ he nɛ wa maa nu kɛ ha nihi ɔ tsɔɔ kaa wa maa nu bɔ nɛ a susuɔ níhi a he, bɔ nɛ a nuɔ he ha ngɛ níhi a he, níhi nɛ a bua jɔ he kɛ níhi nɛ he hia mɛ ɔ sisi. Ke wa nuɔ nɔ́ he ha nihi ɔ, a naa, nɛ ke wa suɔ kaa wa maa ye bua ni kpahi ɔ, lɔ ɔ ma ha nɛ wa maa nu he ha mɛ. Ke wa nuɔ he ha nihi ngɛ fiɛɛmi ní tsumi ɔ mi ɔ, lɔ ɔ tsɔɔ kaa wa kaseɔ bɔ nɛ Yehowa jeɔ suɔmi kpo nɛ e susuɔ nihi a he ha a, nɛ lɔ ɔ ma ha nɛ a maa hɛ kɛ su Yehowa he.​—Flp 2:4.

Pi be mi nɛ wa ngɛ ní tsɔɔe pɛ nɛ wa nuɔ nɔ́ he ha nɔ, se wa peeɔ jã hulɔ kɛ guɔ bɔ nɛ wa buɔ munyu tue ha, bɔ nɛ wa tuɔ munyu ha, bɔ nɛ wa peeɔ wa ní ha, bɔ nɛ wa peeɔ wa nɔmlɔ tso ɔ kɛ bɔ nɛ wa peeɔ wa hɛ mi ha a nɔ. Ke wa susuɔ nihi a he ɔ, lɔ ɔ tsɔɔ kaa wa nuɔ nɔ́ he ha mɛ. Wa yɔseɔ níhi nɛ a bua jɔ he, níhi nɛ a heɔ yeɔ kɛ si fɔfɔɛhi a mi nɛ a ngɛ. Wa tsɔɔ mɛ níhi nɛ e he hia kaa a le ɔ, nɛ wa yeɔ bua mɛ se wa nyɛ we a nɔ kaa a pee tsakemi. Ke nihi nɛ wa fiɛɛɔ kɛ haa mɛ ɔ suɔ kaa waa ye bua mɛ ɔ, lɔ ɔ haa nɛ wa náa bua jɔmi babauu ngɛ fiɛɛmi ní tsumi ɔ mi.

NYƐƐ HYƐ VIDEO NƐ JI, MO NÁ KASELƆ PEEMI NÍ TSUMI Ɔ MI BUA JƆMI​—HA O NÍ TSƆƆMI NƐ NU TSO​—MOO NU HE HA NƆ, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Benɛ Lily kpɛ se ɔ, mɛni Neeta pee kɛ tsɔɔ kaa e nu he ha lɛ?

• Benɛ Lily de ke pɔ tɔ e he nɛ e be nyɛe maa kase ní ɔ, mɛni Neeta pee kɛ tsɔɔ kaa e nu he ha lɛ?

• Benɛ Lily de ke e li bɔ nɛ a toɔ níhi a he blɔ nya ha a, mɛni Neeta pee kɛ tsɔɔ kaa e nu he ha lɛ?