Nyɛmimɛ ɔmɛ bɔɔ mɔde wawɛɛ kɛ toɔ ní sɛɛmi he nɔ hyɛmi ní ɔmɛ a he blɔ nya, nɛ fiɛɛli fuu yɔse kaa ní sɛɛmi he nɔ hyɛmi ní ɔmɛ yeɔ bua ngɛ a zugba kpɔ ɔ mi. Se kɛ̃ ɔ, akɛnɛ e slo si fɔfɔɛ fɛɛ si fɔfɔɛ ngɛ je ɔ mi he je ɔ, fiɛɛli ma nyɛ maa gu blɔ kpa nɔ loo a ngɔ munyuyi kpa nɛ maa ta nihi nɛ a ngɛ a zugba kpɔ ɔ mi ɔ a tsui he ɔ kɛ tsu ní ngɛ a sɔmɔmi ní tsumi ɔ mi. Ngɛ anɔkuale mi ɔ, e sa nɛ wɔ tsuo waa nyɛɛ blɔ tsɔɔmihi nɛ a kɛ ma ha wɔ ngɛ fiɛɛmi klɛdɛɛ ko he ɔ se. Oti nɛ waa kɛ ma wa hɛ mi ji kaa wa maa fiɛɛ Mawu Matsɛ Yemi ɔ he sane kpakpa a nɛ Yesu fã wɔ kaa waa fiɛɛ ɔ.​—Mat 24:14.

Ke fiɛɛli ngɛ sukuu ní tsumi nɛ a kɛ wo a dɛ ɔ he ní tsue ɔ, e sa nɛ a ngɔ munyuyi nɛ ngɛ ní sɛɛmi he nɔ hyɛmi nɔ́ nɛ ngɛ Si Himi Kɛ Sɔmɔmi Ní Tsumi ɔ Ní Kasemi Womi ɔ mi ɔ kɛ tsu ní. Jehanɛ hu ɔ, fiɛɛli ngɛ he blɔ kaa a ma hla mɛ nitsɛmɛ a sane bimi, ngmami, sane bimi nɛ a ma susu he pee se, loo kɛ bɔ nɛ a maa pee lɛ ha nɛ maa sa kɛ ha a zugba kpɔ ɔ, lɛɛ ja eko ɔ, a tsɔɔ kaa a ko pee jã. Enɛ ɔ ji tsakemi nɛ a pee ngɛ blɔ tsɔɔmi nɛ ngɛ June 2020 ní kasemi womi ɔ ba fa 8 ɔ mi ɔ he.