Ke waa kɛ mumi mi otihi ma wa hɛ mi ɔ, lɔ ɔ ma ha nɛ waa kɛ wa he wami ma tsu ní saminya. (1Ko 9:26) Be nɛ piɛ nɛ je yaya nɛ ɔ maa ba nyagbe ɔ pi, enɛ ɔ he ɔ, ke waa kɛ otihi ma wa hɛ mi ɔ, e maa ye bua wɔ nɛ waa kɛ wa be ma tsu ní saminya. (Efe 5:15, 16) Ke nyɛ ngɛ weku Mawu jami pee ɔ, nyɛ ma nyɛ ma susu otihi nɛ nyɛɛ kɛ maa ma nyɛ hɛ mi ngɛ sɔmɔmi jeha ehe nɛ ma a mi ɔ he. Bɔ nɛ pee nɛ o nyɛ nɛ o pee jã a, a tsɔɔ oti komɛ nɛ o ma nyɛ kɛ ma o hɛ mi ngɛ ní kasemi womi nɛ ɔ mi konɛ o kɛ sɔlemi nɛ susu a he.​—Yak 1:5.

Kaa nɔ hyɛmi nɔ́ ɔ, anɛ nɔ fɛɛ nɔ ngɛ nyɛ weku ɔ mi ɔ ma nyɛ maa ye bua konɛ ke e hí kulaa a, nɔ kake kɛ e he nɛ wo daa blɔ gbami ní tsumi ɔ mi lo? Ke o be nɔ mi mami kaa o ma nyɛ maa su ngmlɛfia nɛ a ngɛ hlae ɔ he ɔ, o kɛ daa blɔ gbali komɛ nɛ a si fɔfɔɛ ɔ ngɛ kaa o nɔ́ ɔ ma nyɛ maa sɛɛ ní. (Abɛ 15:22) Eko ɔ, o ma nyɛ ma bi daa blɔ gbalɔ ko munyu ngɛ nyɛ weku Mawu jami ɔ mi. Lɔ ɔ se ɔ, moo ngma blɔ nya komɛ nɛ o ma nyɛ maa to konɛ o nyɛ nɛ o su oti nɛ o kɛ ma o hɛ mi ɔ he ɔ kɛ fɔ si. Ke o tsu blɔ gbami ní tsumi ɔ be ko nɛ be ɔ, moo hyɛ kaa amlɔ nɛ ɔ, o si fɔfɔɛ ɔ maa ngmɛ mo blɔ konɛ o nyɛ nɛ o tsu ekohu lo.

Anɛ nyɛ weku ɔ mi nɔ ko kɛ e he ma nyɛ ma wo blɔ gbali a wami ní tsumi ɔ mi nyɔhiɔ kake loo nɔ́ nɛ pe jã lo? Ke o be nɔmlɔ tso mi he wami kpakpa po ɔ, o ma nyɛ maa ngɔ o he kɛ wo blɔ gbali a wami ní tsumi ɔ mi ke ji kaa daa ligbi ɔ, o kɛ ngmlɛfia bɔɔ komɛ tsuɔ fiɛɛmi ní tsumi ɔ. Ke o nyɛ we nɛ o ya fiɛɛmi ngɛ otsi ɔ mi akɛnɛ o kɛ o be tsuo tsuɔ ní aloo o ngɛ sukuu yae he je ɔ, o ma nyɛ maa hla nyɔhiɔ ko nɛ Hɔ kɛ Hɔgba enuɔ ngɛ mi loo he jɔɔmi ligbi ngɛ mi ɔ konɛ o kɛ tsu blɔ gbali a wami ní tsumi ɔ. Mo kadi be nɛ o to kaa o ma sɔmɔ kaa blɔ gbali a walɔ ɔ ngɛ kalenda nɔ, nɛ o ngma blɔ nya nɛ o maa to konɛ o nyɛ nɛ o su oti nɛ o kɛ ma o hɛ mi ɔ he kɛ fɔ si.—Abɛ 21:5.

NYƐƐ HYƐ VIDEO NƐ JI, MOO PEE KÃ . . . BLƆ GBALƆ, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni blɔ nɔ Yehowa gu kɛ hyɛ Nyɛmiyo Aamand nɔ? Nɛ mɛni enɛ ɔ tsɔɔ wɔ?