KRISTOFOHI A SI HIMI
Bɔ Nɛ Waa Kɛ Bu Mawu Tue Womiyo ɔ Ma Tsu Ní Ha
A pee Bu Mawu Tue womiyo ɔ konɛ waa da fonihi nɛ ngɛ mi ɔ nɔ kɛ tsɔɔ nihi nɛ a nyɛ we ní kanemi tsɔ ɔ Baiblo mi anɔkualehi. Ní kasemi ɔ eko fɛɛ eko hɛɛ ba fa enyɔ. Fonihi nɛ a ngɛ fɛu ngɛ womiyo ɔ mi. A pee okadihi nɛ tsɔɔ bɔ nɛ foni ɔmɛ tsa a sibi a nɔ ha ngɛ womiyo ɔ mi.
Ningmahi nɛ ngɛ Bu Mawu Tue Nɛ́ O Hi Si Kɛ Ya Neneene ɔ mi ɔ hiɛ pe ningmahi nɛ ngɛ Bu Mawu Tue ɔ mi, se foni ɔmɛ lɛɛ a tsakee we. Waa kɛ nihi nɛ a le ní kanemi bɔɔ ɔ ma nyɛ maa kase Bu Mawu Tue Nɛ́ O Hi Si Kɛ Ya Neneene ɔ. Behi fuu ɔ, fiɛɛli suɔ kaa a maa hɛɛ lɔ ɔ, ke a kɛ nɔ ko ngɛ Bu Mawu Tue ɔ kasee. Waa kɛ nɔ ɔ ma nyɛ ma susu dakahi nɛ ngɛ Bu Mawu Tue Nɛ́ O Hi Si Kɛ Ya Neneene ɔ mi ɔ he, ke wa na kaa e maa ye bua lɛ.
Wa ma nyɛ ma ha nihi womiyo enyɔ nɛ ɔmɛ eko fɛɛ eko, ke tsa pi lɔ ɔ nɛ waa kɛ ngɛ ní tsue ngɛ nyɔhiɔ ɔ mi po. Ke o kɛ nɔ ko ngɛ kasee ɔ, ngɔɔ foni ɔmɛ kɛ tsɔɔ lɛ Baiblo mi sanehi a mi. Mo bi ní kaselɔ ɔ sanehi, konɛ o ye bua lɛ nɛ e nu níhi a sisi. Nyɛɛ kane ngmamihi nɛ ngɛ ba fa amɛ a sisi ɔ nɛ nyɛ susu he. Ke nyɛ kase womiyo ɔ ta a, nyɛɛ kase Mɛni Baiblo ɔ Ma Nyɛ Maa Tsɔɔ Wɔ? womi ɔ, konɛ ní kaselɔ ɔ nɛ ya e hɛ mi, nɛ e ha nɛ a baptisi lɛ.