NƆ́ HE JE NƐ E HE HIA: Ke Baiblo mi ní kaseli ɔmɛ dla a he ɔ, a ma nyɛ maa nu nɔ́ nɛ waa ngɛ mɛ tsɔɔe ɔ sisi mla, nɛ a ma nyɛ ma kai hulɔ. Ke a nu nɔ́ nɛ wa tsɔɔ mɛ ɔ sisi nɛ a nyɛɛ kai ɔ, lɔ ɔ ma ha nɛ a ma ya a hɛ mi mlamlaamla. Ke a baptisi mɛ se po ɔ, e ma bi nɛ a ya nɔ nɛ a dla a he kɛ ha asafo mi kpehi kɛ fiɛɛmi yami konɛ ‘a ya nɔ nɛ a hwɔɔ.’ (Mat 25:13) Enɛ he ɔ, ke a le bɔ nɛ a kaseɔ ní ha, nɛ a to blɔ nya kpakpa kɛ ha ní kasemi ɔ, e maa ye bua mɛ ngɛ nɔ́ fɛɛ nɔ́ mi. Ke waa kɛ mɛ je ní kasemi sisi nɔuu ɔ, e sa nɛ waa ye bua wa Baiblo mi ní kaseli ɔmɛ nɛ a le bɔ nɛ a ma dla a he kɛ ha ní kasemi.

BLƆ NƆ NƐ O MAA GU KƐ PEE:

• Moo pee nɔ hyɛmi nɔ́ kpakpa. (Ro 2:21) Mo dla o he kɛ ha ní kasemi ɔ eko tsuaa eko, nɛ ke o ngɛ o he dlae ɔ, mo susu ní kaselɔ ɔ he. (km 11/15 3) Ha nɛ e hyɛ bɔ nɛ o po sane bimi ɔmɛ a heto ɔmɛ a sisi ha ngɛ o womi ɔ mi

• Moo wo lɛ he wami konɛ e dla e he. Ke o kɛ lɛ bɔni ní kasemi ɔ, ha nɛ e le kaa e he nɛ e ma dla kɛ sɛ hlami ɔ piɛɛ ní kasemi ɔ he, nɛ́ o tsɔɔ lɛ se nami nɛ ngɛ he. Moo tsɔɔ lɛ bɔ nɛ e ma plɛ kɛ to e be he blɔ nya ha konɛ e ná deka kɛ dla e he. Fiɛɛli komɛ ngɔɔ a womi nɛ a po heto ɔmɛ a sisi ngɛ mi ɔ kɛ haa ní kaselɔ ɔ be mi nɛ a kɛ mɛ ngɛ ní ɔ kasee ɔ, konɛ e na se nami nɛ ngɛ he. Ke e dla e he ɔ, mo je e yi

• Tsɔɔ lɛ bɔ nɛ e ma plɛ kɛ dla e he ha. Fiɛɛli komɛ ngɔɔ ní kasemi be ɔ kɛ tsɔɔ a Baiblo mi ní kaseli ɔmɛ bɔ nɛ a ma plɛ kɛ dla a he kɛ ha ní kasemi ɔ ha