KRISTOFOHI A SI HIMI
Nɔ́ Nɛ O Maa Pee Kɛ Ye Bua Ke Oslaa Ko Ba
Adebɔ mi oslaa pɔ he wawɛɛ lingmi nɛ ɔ. Ke oslaa ko ba a, e sa nɛ a to níhi nɛ a kɛ maa ye bua a he blɔ nya saminya. Enɛ ɔ he ɔ, Blɔ Tsɔɔmi Ajla Toli ɔmɛ kɛ blɔ tsɔɔmi ha kaa a to Disaster Relief Department he blɔ nya ngɛ asafo ɔ ní tsumi kɔni ɔmɛ eko fɛɛ eko mi.
Ke nyɛmimɛ nɛ a tsuɔ ní ngɛ Department nɛ ɔ ná le kaa oslaa ko ba a, a kɛ asafo mi nikɔtɔmahi nɛ ngɛ lejɛ ɔ sɛɛɔ ni oya nɔuu konɛ a le nɔ́ nɛ fiɛɛli ɔmɛ maa hia. Ke oslaa nɛ ba a puɛ ní wawɛɛ nɛ nyɛmimɛ ɔmɛ be nyɛe ma tsu he ní ɔ, asafo ɔ ní tsumi kɔni ɔ maa hla nyɛmimɛ nyumuhi nɛ a he sa konɛ a nyɛɛ oslaa be mi yemi kɛ buami ní tsumi ɔ hɛmi. Nyɛmimɛ nyumu nɛ ɔmɛ ma bi konɛ nyɛmimɛ nɛ a ngɔ a he kɛ ha nɛ a ye bua loo a ma ha nɛ nyɛmimɛ ɔmɛ nɛ a ngɔ ní pɔtɛɛ komɛ kɛ ye bua aloo a ma he ní komɛ nɛ nyɛmimɛ ɔmɛ maa hia konɛ a gba ha mɛ.
Ke a gu blɔ nɛ ɔmɛ a nɔ kɛ tsu níhi a he ní kikɛ ɔ, se nami fuu ngɛ he nɛ e haa nɛ níhi yaa nɔ saminya. Se ke nyɛmimɛ ɔmɛ tsu níhi a he ní ngɛ mɛ nitsɛmɛ a dɛ he ɔ, e haa nɛ a puɛɔ be, sika kɛ ní kpahi.
Nyɛmimɛ nyumuhi nɛ asafo ɔ ní tsumi kɔni ɔ hla mɛ ɔ, ma nyɛ maa le sika kɛ nihi abɔ nɛ e sa nɛ a ngɔ a he kɛ ha ke oslaa ko ba. A kɛ ma nikɔtɔma amɛ hu ma nyɛ maa sɛɛ ní konɛ a ye bua nɛ ní tsumi ɔ nɛ ya nɔ mlamlaamla. Lɔ ɔ ke oslaa ko ba a, nyɛmimɛ ko sɛ hlami kɛ bua sika nya, a ko ngɔ níhi kɛ ya ha ni nɛmɛ nɛ oslaa a ná mɛ ɔ, nɛ a kɛ oya yemi hu ko ya he nɛ oslaa a ba ngɛ ɔ kaa ja a de mɛ ke a pee jã.
Se kɛ̃ ɔ, ke oslaa ko ba a, wa yeɔ bua wa nyɛmimɛ ɔmɛ akɛnɛ wa suɔ mɛ ɔ he je. (Heb 13:16) Lɔ ɔ mɛni wa ma nyɛ maa pee? Nɔ́ nɛ he hia pe kulaa a, wa ma nyɛ maa sɔle kɛ ha nihi nɛ oslaa a ba a nɔ ɔ kɛ nihi nɛ a ye ɔ bua ngɛ oslaa be mi ɔ. Wa ma nyɛ ma ha yemi kɛ buami kɛ fĩ je kɛ wɛ ní tsumi ɔ se hulɔ. Kɛ gu Blɔ Tsɔɔmi Ajla Toli ɔmɛ a blɔ tsɔɔmi nɔ ɔ, asafo ɔ ní tsumi kɔni ɔmɛ ma nyɛ maa le hehi nɛ a kɛ yemi kɛ buami nɛ ɔmɛ ma nyɛ ma tsu ní ngɛ saminya. Ke wa suɔ nɛ wɔ nitsɛmɛ hu waa ye bua a, wa ma nyɛ maa ngma Local Design/Construction Volunteer Application (DC-50) womi ɔ nɔ ní.
NYƐƐ HYƐ VIDEO NƐ JI, HIƆMI KO NƐ PUƐ NÍ WAWƐƐ NGƐ BRAZIL, NƐ LƆ Ɔ SE Ɔ NYƐ HA SANE BIMI NƐ NYƐƐ SE NƐ Ɔ HETO:
Mɛni lɛ o bua jɔ he ngɛ yemi kɛ buami nɛ Yehowa Odasefo ɔmɛ kɛ ha benɛ hiɔmi ko puɛ ní wawɛɛ ngɛ Brazil ngɛ jeha 2020 ɔ mi ɔ?
