JW Library ɔ ji kɔmpiuta blɔ nɔ tomi ko nɛ o ma nyɛ maa gbla nɛ a he we nɔ́ ko. E ma nyɛ maa ye bua mo konɛ o gbla Baiblo ɔ, womi kpahi, videohi kɛ munyuhi nɛ a fiaa nɛ a buɔ tue ɔ kɛ fɔ o fon, kɔmpiuta loo dɛ mi kɔmpiuta nɔ.

BƆ NƐ O MAA PEE KƐ NÁ EKO: Moo ya Intanɛti ɔ nɔ nɛ o ya gbla JW Library ɔ ngɛ he nɛ a toɔ app ɔmɛ ngɛ ɔ kɛ fɔ o klama a nɔ. O ma nyɛ maa gbla JW Library ɔ kɛ fɔ klama slɔɔtoslɔɔtohi a nɔ. Ke o gbla ta a, mo bli konɛ o gbla níhi nɛ o suɔ kɛ fɔ o klama a nɔ. Ke o be intanɛti ngɛ o we ɔ mi ɔ, lɛɛ o ma nyɛ maa ya Matsɛ Yemi Asa a nɔ, loo womihi a to he nɛ ngɛ nyɛ kpɔ ɔ mi, loo he kpahi nɛ o maa ná Intanɛti ngɛ. Ke o gbla womihi kɛ ní kpahi kɛ fɔ o klama a nɔ, nɛ o ngɛ he ko nɛ intanɛti be po o ma nyɛ ma bli. Se akɛnɛ a ngɔɔ ní hehi kɛ pɔɔ JW Library ɔ nɔ womi he je ɔ, e he maa hia nɛ o ya intanɛti ɔ nɔ ngɛ be kɛ behi a mi, konɛ ke a ngɔ ní hehi kɛ fɔ nɔ ɔ, o nyɛ nɛ o gbla kɛ fɔ o klama a nɔ.

MƐNI HE JE NƐ E SA NƐ O NÁ EKO? JW Library ɔ kɛ dɛ he ní kasemi yi kulaa, nɛ o kɛ ma nyɛ ma tsu ní ngɛ asafo mi kpehi a sisi hulɔ. E yeɔ bua ngɛ fiɛɛmi mi hulɔ, titli ɔ, ke wa ngɛ nihi odase yee bemi nɛ wa be fiɛɛmi mi.