Ngɛ Mose Mlaa nya a, ke nyumu ko ngɛ hlae nɛ e po gba mi ɔ, e sa nɛ e pee gba mi pomi he womi ngɛ mlaa nya. Enɛ ɔ tsiɔ a nya konɛ a kɛ o ya yemi ko po gbahi a mi. Se ngɛ Yesu be ɔ mi ɔ, jami hɛ mi nyɛɛli ɔmɛ ha nɛ gba mi pomi ba pee nɔ́ nɛ pɔ he wawɛɛ. Nyumuhi nyɛɛ nɛ a daa nɔ́ saisaa ko nɔ nɛ a kɛ a yi ɔmɛ poɔ gba mi. (“yo fiemi womi” ní kasemi munyu Mak 10:4, nwtsty; “e kɛ e yo maa po gba mi,” “e puɛ gba kɛ si e yo ɔ” ní kasemi munyuhi Mak 10:11, nwtsty) Yesu ha nɛ e pee heii kaa, Yehowa ji nɔ nɛ to gba si himi sisi. (Mak 10:2-12) Huno ɔ kɛ e yo ɔ ba peeɔ “he lo kake” nɛ a maa hi si kɛ ya daa. Kaa bɔ nɛ Mateo womi ɔ tsɔɔ, nɔ́ nɛ ngmami ɔ ngmɛɛ blɔ kaa a ma nyɛ maa da nɔ kɛ po gba mi pɛ ji “ajuama bɔmi.”​—Mat 19:9.

Mwɔnɛ ɔ, nihi fuu nɛ́ gba si himi kaa bɔ nɛ Yesu naa lɛ ɔ, mohu ɔ a naa gba si himi kaa bɔ nɛ Farisi bi ɔmɛ naa lɛ ɔ. Ke nyagba ko baa, nihi nɛ a sɔmɔ we Yehowa a kɛ o ya yemi hlaa kaa a ma po gba a mi. Kristofohi nɛ a sɛ gba si himi mi ɔ naa gba si himi kita nɛ a ka a kaa e ji hɛdɔ nɔ. A bɔɔ mɔde kaa a kɛ Baiblo sisi tomi mlaahi ma tsu nyagbahi a he ní ngɛ gba si himi ɔ mi. Nyɛ hyɛ Video nɛ ji, Suɔmi Kɛ Bumi Haa Nɛ Kake Peemi Hii Wekuhi A Mi. Lɔ se ɔ, nyɛ ha sane bimihi nɛ nyɛɛ se nɛ ɔmɛ a heto:

• Ngɛ mɛni blɔ nɔ nɛ o kɛ Abɛ 15:1 ɔ ma nyɛ ma tsu ni ngɛ o gba si himi ɔ mi, nɛ mɛni he je nɛ e he hia?

• Mɛni blɔ nɔ nɛ o ma nyɛ nɛ o kɛ Abɛ 19:11 ɔ nɛ tsu ní kɛ tsi nyagbahi a nya ngɛ?

• Ke o gba si himi ɔ miɔ nɛ e ma puɛ, nɛ e ba o juɛmi mi kaa o po gba a mi ɔ, mɛni sane bimihi nɛ e sa kaa o susu he?

• Ke o kɛ Mateo 7:12 ɔ tsu ní ɔ, mɛni blɔ e maa ye bua mo ngɛ konɛ o pee huno aloo yogbayo kpakpa?