Suɔmi ji kpa nɛ fĩɔ weku mi bimɛ kɛ blaa. Ke suɔmi be weku ɔ mi ɔ, e he maa wa kaa kake peemi maa hi weku mi bimɛ a kpɛti nɛ a bla kɛ tsu ní. Mɛni blɔ nɔ nɛ hunomɛ, yigbayihi kɛ fɔli maa gu kɛ je suɔmi kpo ngɛ a weku ɔ mi?

Huno nɛ e suɔ e yo ɔ ma susu e yo ɔ hiami níhi, e susumi ngɛ níhi a he, kɛ e he numi he. (Efe 5:28, 29) E ma ha e weku ɔ he lo nya hiami níhi, nɛ e maa ye bua mɛ nɛ a hɛ kɛ su Yehowa he, nɛ e ma ha nɛ a pee gbɔkuɛ Weku Mawu Jami daa. (1Ti 5:8) Yo nɛ e suɔ e huno ɔ maa ba e he si kɛ ha lɛ nɛ e ma je “bumi nɛ mi kuɔ kpo” kɛ tsɔɔ lɛ. (Efe 5:22, 33; 1Pe 3:1-6) E sa kaa nyumu ɔ kɛ yo ɔ tsuo nɛ a je a tsui mi nɛ a ngɔ a sibi a tɔmi kɛ ke faa. (Efe 4:32) Fɔli nɛ a suɔ a bimɛ ɔ bua jɔɔ a bimɛ ɔmɛ a ti nɔ fɛɛ nɔ he nɛ a tsɔɔ mɛ ní konɛ a suɔ Yehowa. (5Mo 6:6, 7; Efe 6:4) Mɛni nyagbahi nɛ a bimɛ kɛ ngɛ kpee ngɛ sukuu? Mɛni blɔ nɔ a gu kɛ ngɛ juami bi a nɔ nyɛmi nya dae? Ke suɔmi ngɛ weku ɔ mi ɔ, weku mi bimɛ ɔmɛ tsuo maa nu he kaa a ngɛ slɔkee.

NYƐƐ HYƐ VIDEO NƐ JI, MO JE SUƆMI NITSƐNITSƐ KPO NGƐ O WEKU Ɔ MI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni blɔ nɔ nɛ huno nɛ e suɔ e yo ɔ hyɛɔ e yo nɔ saminya nɛ e fiɛ we e he?

• Ngɛ mɛni blɔ nɔ nɛ yo nɛ e suɔ e huno ɔ jeɔ bumi nɛ mi kuɔ kpo kɛ tsɔɔ lɛ?

• Mɛni blɔ nɔ fɔli nɛ a suɔ a bimɛ ɔ maa gu kɛ tsɔɔ mɛ Mawu Munyu ɔ?