Loko Baiblo kaseli maa sa Mawu hɛ mi ɔ, e sa nɛ a ná hemi kɛ yemi nɛ mi wa. (Heb 11:6) Wa ma nyɛ maa ngɔ O Ma Nyɛ Ma Ná Bua Jɔmi Kɛ Ya Neneene! womi ɔ kɛ ye bua mɛ konɛ a nyɛ nɛ a pee jã. A kɛ ngmami titli komɛ, níhi a he susumi nɛ ngɛ heii, sane bimihi nɛ nuu tso, videohi nɛ a taa nɔ tsui he kɛ fonihi tsu ní ngɛ womi nɛ ɔ mi. Ke wa ye bua Baiblo kaseli nɛ a je su kpakpahi kpo nɛ a ha nɛ huɛ bɔmi kpakpa ngɛ a kɛ Mawu a kpɛti ɔ, lɔ ɔ tsɔɔ kaa waa kɛ níhi nɛ la be nyɛe maa sã a ngɛ wa tsu ɔ mae.​—1Ko 3:12-15.

E he waa ha ni komɛ kaa a kɛ Mawu nɛ a nɛ́ lɛ ɔ maa pee huɛ. Enɛ ɔ he ɔ, e sa nɛ waa ye bua mɛ nɛ a le Yehowa nɛ a ngɔ a hɛ kɛ fɔ e nɔ.

NYƐƐ HYƐ VIDEO NƐ JI, NGƆƆ “O MA NYƐ MA NÁ BUA JƆMI KƐ YA NENEENE!” Ɔ KƐ TSU NÍ KƐ FIA NIHI A HEMI KƐ YEMI NGƐ YEHOWA MI Ɔ KƐ MA SI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Kɛ wa plɛ kɛ le kaa nyɛmiyo ɔ dla e he saminya kɛ ha ní kasemi ɔ ha kɛɛ?

• Mɛni blɔ nɔ nɛ e kɛ sane bimi kpahi nɛ a nuu tso ɔ tsu ní kɛ ye bua Baiblo kaselɔ ɔ nɛ e je e susumi kpo ngɛ Yesaya 41:10, 13 ɔ he?

• Kɛ video ɔ kɛ ngmami ɔmɛ ye bua Baiblo kaselɔ ɔ ha kɛɛ?

Nihi fuu nui kpɔmi nɔ́ ɔ sisi, loo a nɛ́ lɛ kaa e ji nike ní nɛ je Mawu ngɔ kɛ ha mɛ. (Gal 2:20) Enɛ ɔ he ɔ, e sa nɛ waa ye bua mɛ nɛ a ná hemi kɛ yemi ngɛ Yesu kpɔmi afɔle sami ɔ mi.

NYƐƐ HYƐ VIDEO NƐ JI, NGƆƆ “O MA NYƐ MA NÁ BUA JƆMI KƐ YA NENEENE!” Ɔ KƐ TSU NÍ KƐ FIA NIHI A HEMI KƐ YEMI NGƐ YESU MI Ɔ KƐ MA SI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Kɛ wa plɛ kɛ le kaa nyɛminyumu ɔ dla e he saminya kɛ ha ní kasemi ɔ ha kɛɛ?

• Kɛ e kɛ níhi nɛ a ngɛ “Ní Kpahi Nɛ Maa Ye Bua Mo” blɔ he ɔ tsu ní kɛ ye bua Baiblo kaselɔ ɔ ha kɛɛ?

• Mɛni he je nɛ sɔlemi nɛ e sɔle kɛ ha Baiblo kaselɔ ɔ he hia a?