Akɛnɛ wa ngɛ nyagbe ɔ he sue haa nɛ ɔ, wa ma nyɛ maa hyɛ blɔ kaa basabasa peemi, yi wu tso ní peepee, kɛ ta maa pɔ he wawɛɛ. (Kpj 6:4) Mɛni blɔ nɔ wa maa gu kɛ dla wa he kɛ ha nyagbahi nɛ ma nyɛ maa ba a?

• Dla o he ngɛ mumi mi: Mo kadi Baiblo sisi tomi mlaahi kɛ Baiblo mi sanehi nɛ ha nɛ hɛ kɛ nɔ fɔmi nɛ o ngɛ ngɛ Yehowa kɛ e we asafo ɔ mi ɔ mi wa, kɛ bɔ nɛ e ye bua mo nɛ o je o he kɛ je je ɔ he ha a kɛ fɔ si. (Abɛ 12:5; jr-E 125-126 ¶23-24) Amlɔ nɛ ɔ ji be nɛ e sa nɛ wa ha nɛ huɛ bɔmi nɛ ngɛ waa kɛ wa nyɛmimɛ nɛ a ngɛ asafo ɔ mi ɔ a kpɛti ɔ mi nɛ wa.​—1Pe 4:7, 8

• Dla o he ngɛ he lo nya: Mo hla he ko nɛ o maa laa o he ngɛ, nɛ́ o hla níhi nɛ maa hia mo ɔ kɛ to. Jehanɛ hu, moo le nɔ́ nɛ o maa pee ke e ba lɛ kaa o maa je o we ɔ mi ɔ. Moo hyɛ níhi nɛ a ngɛ o we oslaa be mi baagi ɔ mi ɔ nɛ o ngɔ níhi nɛ o kɛ ma nyɛ maa po o he piɛ kɛ sika kɛ wo mi. Moo le blɔ nɔ nɛ o maa gu nɛ o nine maa su asafo mi nikɔtɔma amɛ a nɔ, nɛ o ha nɛ a le blɔ nɔ nɛ mɛ hu a ma nyɛ maa gu nɛ a nine maa su o nɔ.​—Yes 32:2; g17.5-E 3-7

Ke basabasa peemi ngɛ nɔ yae, Yaa nɔ nɛ o pee níhi nɛ ma ha nɛ o he nɛ wa ngɛ mumi mi. (Flp 1:10) Mo ko pɔɔ kpo jemi kaa ja e he hia kaa o pee jã. (Mat 10:16) O kɛ ni kpahi nɛ dla niye ní kɛ ní kpahi nɛ o ngɛ ɔ.​—Ro 12:13.

NYƐƐ HYƐ VIDEO NƐ JI, ANƐ O DLA O HE KƐ HA OSLAAHI LO? LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni blɔ nɔ Yehowa maa gu kɛ ye bua wɔ ngɛ oslaa behi a mi?

• Mɛni ji ní komɛ nɛ wa ma nyɛ maa pee kɛ dla wa he kɛ to?

• Mɛni wa ma nyɛ maa pee kɛ ye bua nihi nɛ oslaahi ba a nɔ ɔ?