Nyɛmimɛ yihi yeɔ bua wawɛɛ ngɛ Matsɛ Yemi ní tsumi ɔ mi. (La 68:11) Mɛ lɛ a peeɔ Baiblo mi ní kasemi hiɛhiɛɛ, nɛ daa blɔ gbali nɛ wa ngɛ ɔ a kpɛti nihi hiɛhiɛɛ ji yihi. Nyɛmimɛ yihi akpehi abɔ tsuɔ ní ngɛ Betel, a ti ni komɛ ngɛ sɔmɔe kaa ma se sane kpakpa fiɛɛli, a ti ni komɛ yeɔ bua ngɛ tsuhi a mami mi nɛ a ti ni komɛ tsuɔ ní kaa gbi sisi tsɔɔli. Nyɛmimɛ yihi nɛ a nane pi si ɔ fiaa a weku ɔmɛ kɛ asafo ɔ kɛ maa si. (Abɛ 14:1) E ngɛ mi kaa nyɛmimɛ yihi be nyɛe ma sɔmɔ kaa asafo mi nikɔtɔmahi loo asafo mi sɔmɔli mohu lɛɛ, se a ma nyɛ maa ngɔ otihi kɛ ma a hɛ mi ngɛ Yehowa sɔmɔmi mi. Ke o ji nyɛmiyo ɔ, mɛni blɔ komɛ a nɔ o ma nyɛ maa gu kɛ tsu babauu ngɛ Yehowa sɔmɔmi mi?

• Bɔɔ mɔde nɛ o ná Kristofohi a su kpakpahi.—1Ti 3:11; 1Pe 3:3-6

• Moo ye bua nyɛmimɛ yihi nɛ a ngɛ asafo ɔ mi nɛ a be níhi a si kpami tsɔ ɔ.—Tit 2:3-5

• Bɔɔ mɔde nɛ o ngɔ o be fuu kɛ tsu fiɛɛmi ní tsumi ɔ nɛ o ha nɛ o ní tsɔɔmi ɔ nɛ nu tso

• Moo kase gbi kpa

• Moo hia kɛ ya je he nɛ fiɛɛli fuu a he hia ngɛ

• Moo ngma kɛ bi blɔ konɛ o ya sɔmɔ ngɛ Betel aloo o ngɔ o he kɛ ha ngɛ teokrase tsuhi a mami mi

• Moo ngma kɛ bi blɔ kɛ ha Sukuu Kɛ Ha Matsɛ Yemi Sane Kpakpa Fiɛɛli ɔ

NYƐƐ HYƐ VIDEO NƐ JI “YIHI NƐ A NGƐ NÍ TSUE WAWƐƐ NGƐ NYƆMTSƐ Ɔ MI,” LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Kɛ munyu nɛ nyɛmiyi ɔmɛ tu ɔ wo mo he wami ha kɛɛ?