E be kɛe nɛ Yehowa tsui si tomi ɔ maa ba nyagbe. A ma kpata lakpa jami hɛ mi, lɔ ɔ se ɔ, je ma amɛ maa pee kake kɛ ba tua Mawu we bi, enɛ ɔ se ɔ, Yehowa ma kpata yiwutsotsɛmɛ a hɛ mi ngɛ Harmagedon. Kristofohi ngɛ ní nɛ ɔmɛ nɛ maa ya nɔ ɔ blɔ hyɛe wawɛɛ nitsɛ.

Ngɛ anɔkuale mi ɔ, wa li níhi tsuo kɛ kɔɔ amanehlu ngua a he. Kaa nɔ hyɛmi nɔ́ ɔ, wa li be tutuutu nɛ amanehlu ngua a maa je sisi. Wa li nɔ́ nɛ nɔ yeli ɔmɛ maa da nɔ kɛ tua jami ɔmɛ. Wa li be abɔ nɛ tuami nɛ je ma amɛ ma tua Mawu we bi ɔ maa ye aloo níhi nɛ a maa pee ke a tua wɔ. Jehanɛ hu ɔ, wa li nɔ́ tutuutu nɛ Yehowa kɛ ma kpata yiwutsotsɛmɛ a hɛ mi ngɛ Harmagedon.

Se kɛ̃ ɔ, níhi tsuo nɛ wa hia konɛ wa nyɛ nɛ waa kɛ kã nɛ da níhi nɛ maa ba hwɔɔ se ɔ nya a ngɛ Baiblo ɔ mi. Kaa nɔ hyɛmi nɔ́ ɔ, wa le kaa wa ngɛ “nyagbe ligbi ɔmɛ” a nyagbe be ɔ mi. (2Ti 3:1) Wa le kaa a maa po be nɛ a kɛ ma tua jami ɔ “nɔ kpiti” bɔ nɛ pee nɛ a ko kpata anɔkuale jami hɛ mi. (Mat 24:22) Wa le hu kaa Yehowa ma kpɔ e we bi. (2Pe 2:9) Jehanɛ ɔ hu, wa le kaa Nɔ nɛ Yehowa hla nɛ e kpata yiwutsotsɛmɛ a hɛ mi nɛ́ e baa asafo ku ngua a yi kɛ gblee Harmagedon ta a mi ɔ ji anɔkualetsɛ nɛ e ngɛ he wami hulɔ.​—Kpj 19:11, 15, 16.

Ngɛ anɔkuale mi ɔ, níhi nɛ maa ya nɔ hwɔɔ se ɔ ma ha nɛ ‘gbeye maa nu nihi nɛ a maa hɛli.’ Se kɛ̃ ɔ, ke wa kane bɔ nɛ Yehowa he e we bi a yi wami ha blema, kɛ níhi nɛ e de kaa a maa ya nɔ hwɔɔ se, nɛ wa pue wa yi mi tɛ ngɛ he ɔ, lɔ ɔ maa ye bua wɔ nɛ wa maa ‘da si tlɔmɔɔ nɛ wa maa wo wa yi nɔ’ ejakaa wa ngɛ nɔ mi mami kaa e be kɛe nɛ a maa kpɔ wɔ.​—Luk 21:26, 28.