Akɛnɛ haomi ngua a su si ta he je ɔ, e sa nɛ waa fiɛɛ sane kpakpa a kɛ kã. (Abɛ 24:11, 12, 20) Bɔ nɛ pee nɛ wa nyɛ nɛ waa ye bua nihi ɔ, wa ma nyɛ maa ngɔ kaadi tsɔwitsɔwi nɛ tsɔɔ nɔ blɔ kɛ yaa jw.org ɔ nɔ ɔ kɛ ha nihi konɛ wa kɛ gbla a juɛmi kɛ ba Mawu Munyu ɔ nɔ. Kadimi nɔ́ ko ngɛ kaadi ɔmɛ a nɔ nɛ e kɛ nɔ yaa he nɛ video nɛ ji Mɛni He Je Nɛ E Sa Kaa Waa Kase Baiblo ɔ? ngɛ ɔ. Ngɛ kaadi ɔ sisi ɔ, nihi maa na munyu ko nɛ tsɔɔ kaa a ma nyɛ ma bi nɛ a kɛ mɛ nɛ ba kase Baiblo ɔ. Ni komɛ a bua jɔɛ wa womi ɔmɛ a he, se a suɔ kaa a maa ya wa wɛbsaiti ɔ nɔ. Ke o na nihi kaa jã a, mo ha mɛ kaadi ɔ eko. Se ko ha nihi nɛ a be munyu ɔ he bua jɔmi ɔ kaadi ɔ eko.

He fɛɛ he nɛ o maa na nɔ ko ngɛ ɔ, o ma nyɛ ma de lɛ nɔ́ ko nɛ ma ha nɛ e bua maa jɔ he kaa e maa ngɔ kaadi ɔ eko. O ma nyɛ ma de ke: “I suɔ nɛ ma ngɔ nɔ́ ko kɛ tsɔɔ mo. Kaadi nɛ ɔ maa ye bua mo konɛ o ya wɛbsaiti ko nɛ videohi kɛ ní kpahi fuu ngɛ lejɛ ɔ. O be he hiɔ woe.” (Yoh 4:7) Akɛnɛ kaadi ɔmɛ klee we he je ɔ, o ma nyɛ maa hɛɛ bɔɔ ko ngɛ o he konɛ ke he blɔ ko ba a o gba ha nihi.