NƆ́ HE JE NƐ E HE HIA: Gbɔkuɛ nɛ e nɔ jena Yesu ma gbo ɔ, e sɔle konɛ “kake peemi nitsɛnitsɛ” nɛ hi e kaseli ɔmɛ a kpɛti. (Yo 17:23, sisi ningma) Bɔ nɛ pee nɛ kake peemi nɛ hi wa kpɛti ɔ, e sa nɛ wa je suɔmi kpo, suɔmi nɛ “kɛ tɔmi wui e mi.”​—1Ko 13:5.

BƆ NƐ O MAA PEE LƐ HA:

• Moo kase Yehowa kɛ gu o juɛmi nɛ o kɛ maa ma su kpakpahi nɛ nihi ngɛ ɔ nɔ

• Moo ngɔ nihi a tɔmi kɛ pa mɛ faa

• Ke o kɛ nɔ ko dla sane nɛ ngɛ nyɛ kpɛti ta a, koo tu he munyu hu.​—Abɛ 17:9

NYƐƐ HYƐ VIDEO NƐ JI “NYƐƐ SUƆ NYƐ SIBI”​—KOO NGƆ NƆ KO TƆMI KƐ WO O MI, LƆ Ɔ SE Ɔ, NYƐ HA SANE BIMI NƐ ƆMƐ A HETO:

• Ngɛ video ɔ kekle fã a mi ɔ, mɛni Helina pee kɛ tsɔɔ kaa e ‘ngɔ tɔmi nɛ a pee kɛ si lɛ ɔ kɛ wo e mi’?

• Ngɛ video fã enyɔne ɔ mi ɔ, mɛni Helina pee kɛ ye susumi nɛ dɛ nɛ e ná a nɔ, nɛ kɛ e plɛ kɛ ná susumi nɛ da ha kɛɛ?

• Kɛ bɔ nɛ Helina pee e ní nyagbe ɔ baa kake peemi nɛ ngɛ asafo ɔ mi ɔ yi ha kɛɛ?