Wa bua jɔ wawɛɛ kaa wa ná womiyo kɛ womi ehe nɛ waa kɛ maa pee Baiblo mi ní kasemi! Wa sɔlemi ji kaa Yehowa maa jɔɔ mɔde nɛ wa ngɛ bɔe kaa wa maa pee nihi babauu kaseli ɔ nɔ. (Mat 28:18-20; 1Ko 3:6-9) Kɛ waa kɛ ga dade ehe nɛ ɔmɛ ma tsu ní ha kɛɛ?

Akɛnɛ O Ma Nyɛ Ma Ná Bua Jɔmi Kɛ Ya Neneene!, moo kase Baiblo ɔ nɛ o ná he se womi ɔ tsɔɔ blɔ ehe nɔ nɛ wa maa gu kɛ tsɔɔ ní he je ɔ, moo ngɔ blɔ tsɔɔmi nɛ ɔmɛ kɛ tsu ní ke o ngɛ o he dlae kɛ ha Baiblo mi ní kasemi, kɛ benɛ nyɛ ngɛ ní ɔ kasee. *

• Nyɛɛ kane nɔ́ nɛ nyɛ maa kase ɔ nɛ nyɛ susu sane bimi ɔmɛ a he

• Nyɛɛ kane ngmamihi nɛ a ngma ke “kane” ɔ, nɛ o ye bua Baiblo kaselɔ ɔ nɛ e na bɔ nɛ e kɛ ma tsu ní ha

• Nyɛɛ hyɛ video ɔmɛ nɛ nyɛɛ ngɔ sane bimihi nɛ piɛɛ a he ɔ kɛ susu he

• Be fɛɛ be nɛ nyɛ maa kpe ɔ, nyɛ susu ní kasemi kake he

Ke o ngɛ fiɛɛmi mi ɔ, mo ha nɔ ɔ womiyo ɔ kekle konɛ o kɛ hyɛ kaa e bua jɔ munyu ɔ he lo. (Hyɛ daka nɛ ji, “ Bɔ Nɛ O Ma Plɛ Kɛ Ngɔ O Ma Nyɛ Ma Ná Bua Jɔmi Kɛ Ya Neneene! Womiyo ɔ Kɛ Ha Ngɛ Kekle Ligbi Nɛ O Ya Na Nɔ Ko ɔ Nɔ.”) Ke nyɛ kase womiyo ɔ ta, nɛ Baiblo kaselɔ ɔ suɔ nɛ e ma tsa ní kasemi ɔ nɔ ɔ, mo ha lɛ womi ɔ eko nɛ nyɛɛ je sisi ngɛ ní kasemi 04 ɔ mi. Ke nyɛ ngɛ Tsɔɔ Wɔ womi ɔ aloo Mawu Suɔmi womi ɔ kasee momo ɔ, nyɛ tsa nɔ ngɛ O Ma Nyɛ Ma Ná Bua Jɔmi Kɛ Ya Neneene! womi ɔ mi, nɛ o hyɛ he nɛ nyɛ maa je sisi ngɛ.

NYƐƐ HYƐ VIDEO NƐ JI, MO HEE KƐ BA O BAIBLO KASEMI Ɔ SISI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni nɛ Baiblo kaseli ma nyɛ maa kase ngɛ womi ehe ɔ mi?

• Mɛni he je nɛ e sa nɛ o je video nɛ ɔ kɛ tsɔɔ Baiblo kaseli ehehi ɔ?

• Mɛni otihi nɛ e sa kaa o ya nɔ nɛ o ye bua Baiblo kaselɔ ɔ nɛ e kɛ ma e hɛ mi nɛ e bɔ mɔde nɛ su he?—Hyɛ daka nɛ ji, “ Nɔ́ Nɛ A Ma Susu He Kɛ Nɔ́ Nɛ Ní Kaselɔ ɔ Maa Pee Ngɛ Fã Fɛɛ Fã Mi”