Amlɔ nɛ ɔ nɛ jeha 2023 ɔ je sisi ɔ, wɔ tsuo wa ngɛ blɔ hyɛe kaa níhi maa ya nɔ saminya ha waa kɛ wa weku li. Mɛni he je nɛ wa ma nyɛ ma ná hɛ nɔ kami nɛ ɔ?

 Baiblo ɔ de kaa nyagbahi nɛ waa kɛ ngɛ kpee amlɔ nɛ ɔ ji be kpiti nɔ́ ko kɛkɛ, nɛ e be kɛe nɛ a se maa po, nɛ enɛ ɔ ji sane kpakpa. Ngɛ anɔkuale mi ɔ, ‘a ngma Baiblo ɔ kɛ ha wɔ ní tsɔɔmi, konɛ kɛ gu. . . bua womi nɛ jeɔ Ngmami ɔ mi ɔ nɔ ɔ, wa ná hɛ kɛ nɔ fɔmi.’​—Roma Bi 15:4.

•   Ke o suɔ nɛ o le babauu kɛ kɔ Baiblo ɔ mi si womi ɔmɛ a he ɔ, kane munyu nɛ e yi ji, “A Real Hope for a Better Tomorrow.”

 Hɛ nɔ kami nɛ Baiblo ɔ haa wɔ ɔ ma nyɛ maa pee kaa “osɛkɛ kɛ ha wa wami ɔmɛ.” (Hebri Bi 6:19, sisi ningma) Hɛ nɔ kami nɛ ɔ ma nyɛ ma ha nɛ wa fĩ si. E ma nyɛ maa ye bua wɔ nɛ waa da nyagbahi nɛ waa kɛ ngɛ kpee ɔ nya, nɛ́ waa hyɛ blɔ kaa si himi ɔ maa pee kpakpa hwɔɔ se, nɛ́ wa ná bua jɔmi nɛ maa hi si kɛ ya neneene. Kaa nɔ hyɛmi nɔ́ ɔ:

•   Hyɛ bɔ nɛ hɛ nɔ kami nɛ Baiblo ɔ kɛ haa wɔ ɔ ye bua nyumu ko nɛ́ e he wa ha lɛ kaa e ma kpa su yaya ko ɔ ha. Moo hyɛ video nɛ ji Si Himi Ba Gbe Ye Nya.

•   Moo hyɛ bɔ nɛ hɛ nɔ kami nɛ Baiblo ɔ kɛ haa wɔ ɔ ma nyɛ maa ye bua wɔ ha ke wa suɔlɔ ko gbo. Moo hyɛ video nɛ ji Bua Womi Kɛ Ha Nihi Nɛ A Suɔli Gbo.

 Nihi babauu hyɛɛ blɔ kaa níhi maa ya nɔ saminya ha mɛ, se a be nɔ mi mami kaa níhi nɛ a ngɛ blɔ hyɛe ɔ maa ba mi. Se si nɛ Baiblo ɔ wo ɔ ngɛ ekpa. Mɛni he je? Ejakaa Baiblo ɔ mi si womi ɔmɛ je Yehowa Mawu a nitsɛ “nɛ e be nyɛe maa ye lakpa a” ngɔ. (Tito 1:2) Yehowa pɛ ji nɔ nɛ e ngɛ he wami nɛ e ma nyɛ ma ha nɛ e si womi ɔmɛ nɛ a ba mi; e ma nyɛ maa pee ‘nɔ́ tsuaa nɔ́ nɛ́ e suɔ kaa e maa pee ɔ.’​—La 135:5, 6.

 Waa kɛ bua jɔmi ngɛ mo nine fɔe nɛ o ba kase hɛ nɔ kami nɛ ngɛ Baiblo ɔ mi nɛ́ o kɛ o hɛ ma nyɛ maa fɔ nɔ ɔ he ní konɛ o ná he se. O ma nyɛ maa wo o hɛ nɔ kami ɔ mi he wami kɛ gu ‘Ngmami ɔ nɛ o ma susu he’ be fɛɛ be ɔ nɔ. (Ní Tsumi 17:11) Moo ka wa Baiblo mi ní kasemi nɛ nɔ ko maa ye bua mo nɛ́ a he we nɔ́ ko ɔ nɛ o hyɛ. Ngɛ jeha 2023 nɛ ɔ mi ɔ, o kɛ nɔ mi mami nɛ hyɛ hwɔɔ se si himi kpakpa blɔ!