Ngɛ jeha 30 nɛ be ɔ mi ɔ, nihi fuu susu kaa kake peemi ngɛ ma amɛ a kpɛti, nɛ a nu he kaa kake peemi nɛ ɔ mi ngɛ wae po. Se níhi nɛ ngɛ nɔ yae lingmi nɛ ɔ tsɔɔ kaa susumi nɛ ɔ be nyɛe maa pee anɔkuale.

•   “Nihi fuu ngɛ gbeye yee kaa ta nɛ a ngɛ hwue ngɛ Gaza a maa sa ma kpahi a he, akɛnɛ Israel kɛ Hezbollah bɔni ta hwumi ngɛ Lebanon huzu ɔ nya a he je.”​—Reuters, January 6, 2024.

•   “Kuuhi nɛ a ngɛ Iran nɔ yemi ɔ sisi nɛ́ a kɛ Iran pee kake ɔ gu hehi slɔɔtohi kɛ ngɛ nihi tuae, nɛ jehanɛ hu Iran bɔni oplɛmihi nguahi peemi ekohu oya nɔuu. Nɛ Russia kɛ China fĩ Iran se, enɛ ɔ ha nɛ gbeye nu mahi nɛ a ngɛ kɛ yaa Pusinɔ He je ɔ.”​—The New York Times, January 7, 2024.

•   “Ta nɛ Russia kɛ Ukraine ngɛ hwue ɔ ngɛ níhi puɛe wawɛɛ ngɛ Ukraine ma a mi tsuo.”​—UN News, January 11, 2024.

•   “China ma a sika he blɔ nya tomi nɛ́ ngɛ hɛ mi yae, kɛ ta hwumi ní nguanguahi kɛ ta buli babauu nɛ a ngɛ, Taiwan ma a nɛ nihi kɛ fiãa wawɛɛ, kɛ jehanɛ hu pɛ nɛ ngɛ Beijing kɛ Washington ma a kpɛti ɔ ha nɛ e yi kulaa kaa ta maa ba.”​—The Japan Times, January 9, 2024.

 Anɛ Baiblo ɔ de nɔ́ ko ngɛ bɔ nɛ níhi ngɛ puɛe ngɛ je ɔ mi tsuo mwɔnɛ ɔ ha a he lo? Anɛ lɔ ɔ maa ngɔ ta kɛ ba je ɔ mi tsuo lo?

 Ngɛ tahi nɛ wa ngɛ nae mwɔnɛ ɔ blɔ fa mi ɔ, Baiblo ɔ tu we eko pɔtɛɛ he munyu kɛ fɔ si kaa e maa ya nɔ. Se kɛ̃ ɔ, e gba kɛ fɔ si kaa tahi maa pɔ he wawɛɛ ngɛ wa be nɛ ɔ mi nɛ a ma je “tue mi jɔmi kɛ je zugba a nɔ.”​—Kpo Jemi 6:4.

 Daniel womi ɔ gba kɛ fɔ si kaa ngɛ “nyagbe be” ɔ mi ɔ, mahi nɛ a ngɛ he wami ngɛ je ɔ mi nɛ́ a kɛ a he yi ɔ ma ‘si koli,’ aloo a kɛ a sibi maa plee nɔ yemi he. Nɔ́ he pleemi nɛ ɔ ma bi nɛ a pee ta hwumi ní nguanguahi nɛ a kɛ tsɔɔ bɔ nɛ a ngɛ he wami ha, nɛ lɔ ɔ hu ma bi nɛ a puɛ sika babauu aloo ‘níhi nɛ a he jua wa.’​—Daniel 11:40, 42, 43.

 Baiblo ɔ tsɔɔ kaa níhi ma puɛ ngɛ je ɔ mi loko níhi ma ba hi. Yesu gba kɛ fɔ si kaa “amanehlu ngua maa ba nɛ́ eko kaa jã bɛ hyɛ kɛ je je ɔ sisije kɛ ba si amlɔ nɛ ɔ.” (Mateo 24:21) “Amanehlu ngua” nɛ ɔ maa ngɔ Harmagedon ta a kɛ ba. A kale ta nɛ ɔ kaa “Mawu Ope ɔ ligbi ngua a nɔ ta.”​—Kpo Jemi 16:14, 16.

 Harmagedon ta a ma he adesahi a yi wami, se pi nɛ e ma kpata adesahi tsuo a hɛ mi. Mawu maa gu ta nɛ ɔ nɔ kɛ po adesa nɔ yemihi nɛ́ a ha nɛ tahi ngɛ nɔ yae ɔ a se. Moo kane munyuhi nɛ nyɛɛ se nɛ ɔmɛ konɛ o le bɔ nɛ Harmagedon ma plɛ kɛ ngɔ tue mi jɔmi nɛ́ maa hi si daa a kɛ ba ha:

•   “What Is the Battle of Armageddon?”

•   “Hamagedɔn Ji Sane Kpakpa!”